Tausia o a Tatou Feagaiga

Mai i aso anamua e oo mai i aso nei, ua malamalama ia soo moni o Iesu Keriso i le taua o le osia ma le tausia o feagaiga ma le Alii.

Pe tusa o le 64 T.L.M., sa nonofo ai le nuu o sa Nifae i taimi sili ona faigata. Ona o le amioletonu, fouvale, ma taupulepulega, ua faapea ona tuuina atu i latou i le faigata matua tele (tagai Alema 53:9). Sa tautevateva le malo na toetoe a solofa i lalo. O le taua ma le nuu o sa Lamana sa faia pea mo le tele o tausaga. O tagata na tetee sa tuua sa Nifae ina ia au faatasi ma le fili. E tele aai o sa Nifae na osofaia ma faoa.

I le totonugalemu o lenei tulaga matautia ma le faigata, sa filifilia ai ni alii amiotonu e taitaia autau a sa Nifae—o alii e pei o Moronae ma Helamana. Sa malamalama lelei nei taitai sa Nifae, o le mafaia e lo latou nuu ona puipuia i latou lava, e faalagolago moni lea i lo latou usiusitai i le Alii. Sa latou tauivi i taimi uma e uunaia le motu o tagata ina ia manatua le Alii ma tausia Ana poloaiga.

I lenei taimi aupito sili ona taua, i le mavae ai o le faoa o le tele o aai o sa Nifae, ma na foliga mai ua sili atu le malosi o sa Lamana, sa tupu ai se mea ofoofogia. O se vaega o tagata, sa avea muamua ma tagata sa Lamana, lea ua taua nei o sa Amona, ona ua latou liliu mai i le talalelei a Iesu Keriso, e ala i le talaiga a Amona, sa latou o mai ma le naunautai e fetagofi i auupega e leoleoina ai lo latou laueleele, malo, ma le olaga (tagai Alema 53:13).

O tama o nei aiga sa Amona, sa latou osia muamua se feagaiga i le Alii, e le toe fetagofi lava i le auupega. Sa fautuaina nei alii e Helamana, o le perofeta sa Nifae, ina ia tausia la latou folafolaga i le Alii (tagai Alema 53:15). Sa faamatalaina e Helamana le mea na tupu ina ua uma ona ia tuuina atu lena fautuaga:

“Ae peitai, faauta, ua oo ina ia te i latou atalii e toatele o e na le osia le feagaiga e le fetagofi i latou i la latou auupega o le taua e leoleo ia te i latou ai e ita mai ia te i latou; o le mea lea na latou faapotopoto faatasi ai i ia ona aso, o i latou uma lava o e ua lava fai auupega, ma ua latou ta’ua i latou o sa Nifae.

“Ua latou osia foi le feagaiga e tau ina ia saoloto sa Nifae, ioe, e leoleoina le nuu e oo lava i le tuuina atu o latou ola; ioe, na latou osia le feagaiga, latou te le tuua lava la latou saolotoga… .

“O lenei, faauta, ua i ai le toalua afe o na taulelea o e na osia lena feagaiga, ma ua fetagofi i la latou auupega o le taua e leoleo ai o latou nuu… .

“O taulelea foi i latou uma, ma ua matua totoa foi i le loto tele ma le malosi atoa ma le atamai; ae peitai, faauta, ua le gata i lea—o tagata faamaoni i latou i aso uma, i mea uma ua tuuina atu ia te i latou.

“Ioe, o tagata faamaoni ma le faautauta i latou, aua ua aoaoina i latou e tausi i poloaiga a le Atua, ma savavali ma le amio sao i ona luma.

“O lenei, ua oo ina savali atu Helamana i luma o ona tagata tau e lua afe o taulelea, e fesoasoani i le nuu” (Alema 53:16–18, 20–22).

Sa tau ma le lototele Helamana, faatasi ma lana autau taulelea e lua afe, i le puipuia o o latou aiga ma lo latou saolotoga. O lo latou ulufale atu i le malae o le taua na suia ai le ala o le taua. Sa toe foi mai le malosi ia sa Nifae.

I se tusi sa tusi atu ia Moronae, na faamatalaina ai e Helamana le faatuatua ma le totoa na faaalia e nei alii talavou:

“O lenei foi ou te fai atu ia te oe, lo’u uso pele e, Moronae, ou te lei iloa i sa Nifae uma le lototele e faapena ona tele… .

“O lenei e lei tau se taua e i latou, a e ui i lea, ua latou le matatau i le oti; ma ua sili i o latou manatu le saolotoga a o latou tama ai o latou lava ola; ioe, ua aoaoina i latou e o latou tina, pe afai latou te le masalosalo, e laveaiina i latou e le Atua” (Alema 56:45, 47).

Uso e ma tuafafine, “latou te lei masalosalo [ma] [na] laveaiina i latou e le Atua.” I la latou taua maoae muamua, e le’i i ai se tasi o le luaafe na fasiotia. Ina ua uma le taua, sa toe faaopoopo atu isi alii talavou sa Amona e onosefulu i la latou autau toaitiiti. Ua tau mai e Helamana ia i tatou “ua latou usiusitai ma anaana ma le sao i poloaiga uma; ioe, ma ua faia ia te i latou e tusa ma lo latou faatuatua” (Alema 57:21).

O le taua lona lua sa tau ai lenei autau toalaiti, sa sili atu ona faigata nai lo le [taua] muamua. Ina ua maea le taua, sa tusia e Helamana:

“Ua i ai le toalua selau o lou luaafe ma le onosefulu na matapogia ona o le masaa o le toto; e ui i lea, e tusa ma le agalelei o le Atua, … ua le oti se toatasi o i latou… .

“O lenei foi, ua taufaiofo a matou au uma i lo latou faasaoina, ioe, … Matou te tuuina atu ai e pei ona tatau i le mana ofoofogia o le Atua, aua latou te faatuatua tele” (Alema 57:25–26).

Sa malamalama ia Helamana ma lana autau taulelea i le taua o le osia o feagaiga ma le Alii. O i latou foi o e maua ia faamanuiaga lea e oo mai ia i latou o e tausia ma le faamaoni a latou feagaiga.

I le avea ai ma tagata O Le Ekalesia a Iesu Keriso o le Au Paia o Aso e Gata Ai, ua tatou tauaveina foi i o tatou luga ni tautinoga paia. Na tatou faia lenei mea i le vai o le papatisoga ma totonu o malumalu o le Alii. Tatou te taua nei tautinoga o feagaiga. O feagaiga o ni folafolaga ia tatou te faia i le Alii. E matuai paia lava lo latou uiga. O le mea aupito sili ona taua e mafai ona tatou faia i lenei olaga, o le tausia lea o feagaiga ua tatou faia ma le Alii. A tatou tausia a tatou folafolaga i le Alii, Na te faatagaina i tatou ina ia tatou alualu i luma faaleagaga.

O le lua tausaga ua tuanai, sa tofia ai i ma’ua ma Tuafafine Maynes e auauna atu i Filipaina. Na ma feiloai ai i le tele o aiga Filipino ma tagata taitoatasi o ni faataitaiga o e ua malamalama ma tausia ia feagaiga na latou osia ma le Alii. Sei ou faasoaina atu se aafiaga sa ma maua i se tasi o aiga.

O ni nai masina ua mavae, sa tofia ai a’u ou te pulefaamalumalu i le Konafesi a le Siteki a Talisay Filipaina. I le taimi o le sauniga aoao i le Aso Sa, sa ou amataina lau tautalaga i le faafetai atu i le aofia mo lo latou faaaloaalo. A o o’u tautala, sa ou vaavaai atu i lalo i le itu agavale ma ou vaaia ai se aiga toatele o loo nonofo i le laina nofoa lona lua mai le pito i luma o le falesa. Sa uunaia a’u e faailoa atu ma faaaoga i latou o se faataitaiga o se aiga o e na malamalama ma ola i le mataupu faavae o le faaaloalo. Sa saofafai ai iina na matua, ma sa siomia e le anoanoai o tamaiti faaaloalo.

I le maea ai o le sauniga, sa ma maua le avanoa matagofie e feiloai atu ai i le aiga o Abasanta. O le tele o mea na ou iloa e uiga ia i latou, o le tele foi lea o le lofituina o a’u i le mea moni, sa latou malamalama lelei i le uiga o le tausia o feagaiga ma le ola i le talalelei a Iesu Keriso.

Sa auai Uso Lani ma Tuafafine Irenea Abasanta i le Ekalesia i le 22 tausaga ua mavae. E toa 17 le la fanau. Mai tamaiti e toa 17, e tasi le masaga tolu. Ua tatou iloa uma lava, o le tausia o se aiga e le o se mea faigofie i soo se mea lava i le lalolagi, ma e le ese ai foi Filipaina. O le aiga o Abasanta, o se faataitaiga ola lea, e mafai ona faia [le tausia o se aiga toatele], ma e mafai ona faia i le ala sao.

O le manuia ua latou fiafia ai i le tausia o le la fanau i totonu o le Ekalesia, o loo faaalia lava i le tele o auala. O se aiga e toa 19 e saofafai ma le faaaloalo i sauniga lotu, ua na o le tasi lea o faataitaiga.

O le isi faataitaiga o loo faaalia i le ala o loo latou galulue malosi ai, ma le ala latou te galulue faatasi ai e faafetauia o latou manaoga tautupe i aso taitasi. O Uso Abasanta e faigaluega o se fai eletise. O Tuafafine Abasanta, faatasi ai ma le fesoasoani a lana fanau teine, e faia ma faatau atu teuga ma asoa mai lo latou fale. Ua faamanuiaina faatasi i latou i le tuuina atu o mea e manaomia o le olaga mo lo latou aiga.

Ae o le mea e sili atu ona taua nai lo le la faataitaiga o le lagolagoina o le la aiga toatele i tulaga tautupe, o le ala la te aoaoina ai le la fanau ia ola i le talalelei a Iesu Keriso. O a latou afiafi faaleaiga e faia e le aunoa, e i ai sona vaega taua i le aoaoina o le latou aiga. E faatatau i a latou afiafi faaleaiga faalevaiaso, sa faamatalaina e Uso Abasanta, “Muamua lava, matou te talanoaina ni faafitauli e i ai i totonu o le aiga, ma pe faapefea ona matou maua atili le lotogatasi; ona fai ai lea o se mafaufauga faaleagaga po o se lesona; ona matou faia lea o ni taaloga.”

I se afiafi faaleaiga lata mai nei, sa faaaoga ai e Uso Abasanta le mekasini o le Liahona o se meafaigaluega e fesoasoani ia te ia e aoao ai lana fanau, ina ia aua le faaaluina le tele o le taimi e matamata ai i le televise, ae ia faaaoga lena taimi e fai ai se mea e sili atu ona aoga, e pei o meaaoga po o le faitauina o tusitusiga paia. O tausaga ua tuanai i le taimi o afiafi faaleaiga, sa aoaoina ai tamaiti ina ia faataitai ona faaaloalo. Talu ai ona sa aoaoina le la fanau ina ia faaaloalo i totonu o le latou aiga, ua faigofie ai ona latou faaalia le faaaloalo i le lotu i Aso Sa.

O le isi faataitaiga o le ola ai i le talalelei ma tausia a latou feagaiga, o le faamuamua lea sa la tuuina atu i le aoaoina o le la fanau i le taua o le totogiina ma le faamaoni o se sefuluai atoa. Fai mai Uso Abasanta, “Ma te aoaoina le ma fanau o meaai ua matou maua o le taunuuga tonu lea o le matou totogiina o le sefuluai. A maua e le ma fanau ni a latou lava galuega, ma te mautinoa e tau atu ia i latou e tatau ona totogi a latou sefuluai. E faigata le tausiga o se fanau toatele, ae a ou faatuatua ma faamaoni i le totogiina o le sefuluai, e le faigata lava. E selau pasene lo matou faatuatuaina o le Alii, afai matou te totogiina ma le faamaoni le sefuluai, o le a mafai ona matou aai i aso uma lava.”

Manatua foi na ou taua e toa 17 le fanau a Uso ma Tuafafine Abasanta. Sei ou faamatala atu e uiga i le masaga tolu. O tama uma i latou. Ua 19 o latou tausaga. O o latou igoa o Amona, Ominae, ma Ominea. Ioe, ua tou mateiaina. O i latou uma e toatolu o loo auauna atu i le Alii o ni faifeautalai faamisiona faamaoni ma le galulue malosi. O Amona o loo galue i le Misiona a Baguio Filipaina, o Ominae o loo galue i le Misiona a Davao Filipaina, ma Ominea o loo galue i le Misiona a Manila Filipaina.

O lea, ou te le manao tou te faapea ane o le aiga o Abasanta e atoatoa. E leai se tasi o i tatou e atoatoa. Peitai, e ala i lo latou faia o le mea sili latou te mafaia, ina ia ola i poloaiga ma tausia a latou feagaiga, ua mafai ai e le aiga o Abasanta ona olioli i faamanuiaga a le Alii i o latou olaga.

Uso e ma tuafafine, o loo tatou tulimatai uma atu i le aso o le a tatou toe foi atu ai i lo tatou Tama Faalelagi. Ina ia mafai ona tatou agavaa mo le faaolataga i le malo selesitila, e tatau ona faatuatuaina i tatou e le Alii iinei i le lalolagi. Tatou te maua mai le faatuatuaga a le Alii e ala i le galue ina ia maua mai, ma e ausia lena mea e ala i a tatou faatinoga moni o le ola ai i Lana talalelei ma tausia a tatou feagaiga. I se isi faaupuga, tatou te maua mai le faatuatuaga a le Alii e ala i le faia o Lona finagalo.

Manatua le taimi na lapataiina ai e le Alii ia Iosefa Samita e faatatau ia i latou o e “faalatalata mai ia te au i o latou laugutu, a o o latou loto ua taumamao mai ia te au” (Talafaasolopito Iosefa Samita, 2:19).

Manatua le apoapoaiga a Iakopo, “A ia fai outou ma e anaana i le upu, a e aua le na ona faalogologo i ai” (Iakopo 1:22).

E moni lava e leotetele atu galuega nai lo upu. O le mea moni, o galuega e sili atu ona taua i le Alii nai lo na o upu. Na folafola mai e le Alii i le Mataupu Faavae ma Feagaiga, “Afai e te alofa mai ia te au, e te auauna mai ia te au, ma tausi au poloaiga uma” (MFF 42:29).

O Helamana ma lana autau talavou o se faataitaiga anamua lea o faamanuiaga e oo mai ia i latou o e tausia ma le faamaoni a latou folafolaga i le Alii. O le aiga o Abasanta o se faataitaiga o aso nei, o se aiga o loo faia le mea sili latou te mafaia e tausia ai a latou feagaiga ma ola i mataupu faavae o le talalelei a Iesu Keriso.

Ua faia e tagata uma O Le Ekalesia a Iesu Keriso o le Au Paia o Aso e Gata Ai ni folafolaga i le Alii. Ua tatou folafola atu o le a tatou tauave i o tatou luga le suafa o Iesu Keriso, manatua pea o Ia, ma tausi Ana poloaiga (tagai i le MFF 20:77). O tagata faamaoni o le Ekalesia e tausia na folafolaga.

O lau tatalo i lenei aso, ina ia tatou toe faia ni tautinoga ina ia faia mea uma tatou te mafaia ina ia tatou maua ai le faatuatuaga o le Alii e ala i le faia o Lona finagalo, e ala i le ola ai i Lana Talalelei, ma le tausia o a tatou feagaiga, i le suafa o Iesu Keriso, amene.