Molimau Mama Atoatoa

Faatoa ou taliu mai talu ai nei mai se tofiga i Asia, lea sa matou feiloai ai ma le Au Paia faamaoni ma faifeautalai. O se tasi o sauniga sa faia i se eria i le taulaga lea pe tusa ma le 14,000 tagata o le Ekalesia mai se aofaiga o tagata toeitiiti atoa le 21 miliona. Afai e fuafaatatau lena aofai i lenei sauniga, i le Nofoaga Autu mo Konafesi, o lona uiga e na o le 13 tagata o le Ekalesia o loo taape i lenei faapotopotoga e silia ma le 20,000.

O lenei aafiaga na uunaia ai a’u, e tatau ia i tatou uma ona loto faafetai ina ua tatou iloa, ina ua mavae le tele o tausaga o le pogisa ma le liliuese, sa vaaia e Iosefa Samita se faaaliga ofoofogia o le Tama ma le Alo i le Togalaau Paia. E manino lava i lo tatou lalolagi i nei ona po, o se mea e tulaga ese ma taua le i ai o se molimau o loo soifua lo tatou Atua ma lo tatou Tama Faalelagi, o Lona Alo o Iesu Keriso o lo tatou Faaola ma le Togiola, ma o le pule o le perisitua e galueaiina ai le talalelei a Iesu Keriso ua toefuatai mai i le fogaeleele. E le mafai ona fuatia pe manatu mama i le faamanuiaga maoae o le i ai o se molimau i nei mea moni.

O le molimau patino a le tagata lava ia o le faavae lea o lo tatou faatuatua. O le mana mausali lea e tulaga ese ai le Ekalesia a Iesu Keriso o le Au Paia o Aso e Gata Ai, i olaga o ona tagata pe a faatusatusa i isi faapotopotoga faalelotu uma i le lalolagi. O le aoaoga faavae o le Toefuataiga e mamalu lava ia, ae o le mea e afua ai ona mamana ma ‘anoa tele ai o molimau patino a tagata o le Ekalesia i le lalolagi atoa, o i latou ua talia le Toefuataiina mai o le talalelei ma ua taumafai e ola i ona aoaoga i aso uma o o latou olaga.

O le molimau o se molimau lea po o se faamaoniga o le upumoni e faavavau, e uunaia ai loto ma agaga o tagata taitoatasi e ala i le Agaga Paia, o lē o lana galuega muamua lava o le molimauina mai lea o le upumoni, aemaise lava ona e faatatau i le Tama ma le Alo. A maua e se tagata se molimau o le upumoni e ala i lenei auala na to mai i lagī, e vave lava ona amata i ai se aafiaga i le olaga o lena tagata. E tusa ai ma le tala a Alema le Itiiti, “e amata ona tupu ai i totonu o outou fatafata; pe a outou lagona foi le tupu ole fatu, ona amata ai lea ona outou faapea ifo— … o le upu lelei lenei, aua ua amata ona faateleina ai lo’u loto; ioe, ua amata ona faamalamalamaina ai lo’u mafaufau; ioe, ua amata ona suamalie ia te au” (Alema 32:28).

O le molimau e faigofie ona faaupu—molimau moni lava, e tuuina mai i le Agaga ma faamaonia e le Agaga Paia—e suia ai olaga. E suia ai le auala e te mafaufau ai ma mea e te fai. E suia ai mea e te tautala ai. E aafia ai faamuamua uma lava e te faatuina, ma faaiuga uma foi e te faia. Ina ia i ai se molimau moni ma le mausali i le talalelei a Iesu Keriso e tatau ona “fanauina … faaleagaga i la le Atua,” ia “[maua] lona foliga i o outou mata” ma ia lagonaina se “liliu tele i o outou loto” (Alema 5:14).

E toetoe lava faapei o isi mea uma i le olaga, e tupu ma atiina ae molimau i aafiaga ma le auauna atu. E masani ona tatou faalogo i nisi tagata o le ekalesia, aemaise lava o tamaiti, o tuuina mai molimau, ma lisi mai ai mea latou te faafetai ai: o lo latou alolofa i aiga, o le Ekalesia, o le perofeta, o o latou faiaoga, ma uo. Ia i latou, o le talalelei o se mea latou te faafetai ai ona ua latou fiafia ma saogalemu ai. O se amataga lelei lena, peitai, e manaomia le sili atu i le na o lena. E manaomia le vave faamautuina i uluai mataupu faavae o le talalelei.

O se molimau i le moni o le alofa o le Tama Faalelagi, o le soifua ma le galuega a Iesu Keriso, ma le aoga o Lana Togiola i atalii ma afafine uma o le Atua, e aumaia ai le naunau e salamo ma ola agavaa mo le mafutaga a le Agaga Paia. E aumaia ai foi se faamautinoaga i o tatou agaga, o le Toefuataiga o le talalelei i nei aso e gata ai. O le molimau moni o nei upumoni taua, e maua mai o se molimau a le Agaga Paia, pe a mae’a se taumafaiga faamaoni ma le naunautai, e aofia ai aoaoga i le aiga, o le tatalo, o le suesueina o tusitusiga paia, galuega auauna atu i isi, ma le usitai ma le maelega i poloaiga a le Tama Faalelagi. Ina ia maua ma uumau e faavavau i se molimau o upumoni o le talalelei, e talafeagai lelei ma pe o le a lava le tau i a tatou sauniuniga faaleagaga e ono manaomia tatou te totogiina.

O lo’u aafiaga i le Ekalesia ua oo ai ina ou popole o le tele naua o molimau a o tatou tagata, o loo tumau lava i le “Ou te faafetai” ma le “Ou te alofa” ae ua matua toaitiiti o loo mafai ona faapea mai ma le lotomaulalo ae manino ma faamaoni, “Ou te iloa.” O le taunuuga, o nisi taimi e le maua i a tatou sauniga le faavae ‘oa faaleagaga o le molimau lea e faaosofia ai le agaga, ma maua ai le aafiaga ‘anoa lelei i olaga o i latou e faafofoga i ai.

Ua tatau ona saga taulai atu a tatou sauniga molimau i le Faaola, o aoaoga faavae o le talalelei, o faamanuiaga o le Toefuataiga, ma aoaoga a tusitusiga paia. Ua tatau ona sui a tatou tala faaleaiga, o faamatalaga o ni malaga, ma lauga i molimau mama atoatoa. O i latou ua tofia e lauga ma faiaoga i a tatou sauniga po o fonotaga, e tatau ona latou faia i le mana o aoaoga faavae ia e le gata o le a faalogoina ae ia lagonaina foi, siitia ai agaga o tagata ma faamalamalamaina ai. Tou te manatua i le ogatotonu o le lauga mamana a le Tupu o Peniaminia i lona nuu sa aumai ai lana molimau patino e uiga i le Faaola, ae e le’i soifua mai o Ia i lena taimi.

I se vaega o le lauga a le tupu, ina ua ia faatoa tuuina atu lana molimau i tagata, “Ua oo mai le Agaga o le Atua ia te i latou, ma ua faatumuina i latou i le olioli, … ona o lo latou faatuatua tele ia Iesu Keriso o Lē afio mai” (Mosaea 4:3).

Ma e mafua ona e le mafai ona taofia le Agaga pe a tuuina atu le molimau mama atoatoa e uiga ia Keriso. O le mea lea, sa matua musuia ai le nuu o le Tupu o Peniamina i lana molimau ma sa suia ai o latou olaga iina, i lena lava taimi, ma avea ai i latou o se nuu fou.

Manatua foi Apinati ma Alema. Sa matuai faaita e Apinati le Tupu amioleaga o Noa, i lana molimau lototele e uiga i le Alii o Iesu Keriso. Na i’u lava ina ofoina atu e lenei faifeautalai maoae lana taulaga faaiu mo lana molimau ma le faatuatua, ae ina ua mavae lena ona pa’i atu o lana molimau mama atoatoa i se loto e toatasi na talitonu. O Alema, o se tasi o ositaulaga a le Tupu o Noa, “ua oo ina salamo i ana agasala, [ma talia Iesu o le Keriso] ma ua fealuai faalilolilo i le nuu, ua amata foi ona aoao atu ai upu a Apinati” (Mosaea 18:1). E toatele sa liua i le talalelei a Iesu Keriso, ona o se taunuuga tonu o le molimau mamana a Apinati e uiga i le Faaola, lea sa talitonuina e se agaga e toatasi, o Alema lea.

Sa tuuina atu foi e le Aposetolo o Paulo se molimau naunauta’i e uiga ia Keriso ma sa liua ai le toatele i lana galuega faafaifeautalai. E le i meia o ia i le tuuina atu o lana molimau i luma o le Tupu o Akeripa. O le malosi tele o ana upu na oo ai lava i le sui e tele lana faatosina o le Malo o Roma, sa uunaia e tali atu: “Toeitiiti ona e faaililiuina lea o a’u e fai ma Kerisiano” (Galuega 26:28).

Ou te talitonu, ua manino le lesona: o le na o le i ai o se molimau, ua le lava lena. O le mea moni, pe a tatou liua moni, e le mafai ona taofia lo tatou molimau atu. Ma e faapei ona i ai i Aposetolo ma le au paia faamaoni i aso anamua, ua faapena foi ona avea ma o tatou avanoa, o lo tatou tiute, ma a tatou matafaioi paia le “tala’i atu o mea ua [tatou] … iloa e moni” (Mataupu Faavae ma Feagaiga 80:4).

Ou te toe fai atu, faamolemole ia manatua o loo tatou talanoa e uiga i le fetufaai atu o se molimau moni, ae le na ona talanoa lautele i mea tatou te faafetai ai. E ui lava ina lelei i taimi uma le faaali atu o le alofa ma le faafetai, ae o na uiga e le o i ai le ituaiga molimau e faamumuina se afi o le talitonu i olaga o isi. O le tuuina atu o se molimau, o le “molimau atu lea e ala i le mana o le Agaga Paia; ia tuuina atu se tautinoga paia o le upumoni e faavae i le malamalama po o le talitonuga patino” (Guide to Scriptures, “Testify” 241). O le tautinoga manino o le upumoni, e maua ai se eseesega i olaga o tagata. O le mea lena e suia ai le loto. O le mea lena e mafai e le Agaga Paia ona faamaonia i loto o fanau a le Atua.

E ui ina mafai ona tele mea e mafai ona tatou molimau ai, o ni tagata o le Ekalesia, ae e i ai lava upumoni faavae e tatau ona aoao atu ai e le tasi le isi ma fetufaai ma i latou e le auai i lo tatou faatuatuaga. Molimau atu o le Atua o lo tatou Tama, ma o Iesu o le Keriso. Na toefuatai mai e Iosefa Samita le atoaga o le talalelei faavavau a Keriso, ma o le Tusi a Mamona o le faamaoniga lea e moni la tatou molimau.

E tutupu mea ofoofogia pe a galulue faatasi le au paia ma faifeautalai i le fetufaai atu o le molimau mama atoatoa ia i latou e le o ni tagata o le Ekalesia. Mo se faataitaiga, e ui ina toatele tagata na ootia i le molimau a Alema i le nuu o Amonaea, ae ina ua tula’i Amoleka ma faaopoopo atu lana molimau ia Alema, “ua amata ona taufaiofo ai le nuu, aua ua le toatasi ua molimau atu” (Alema 10: 12). E mafai foi ona tupu lena lava mea e tasi ia i tatou i aso nei. A tatou tutu faatasi, o le a fesoasoani le Alii ina ia tatou maua nisi e toatele o Ana mamoe o le a iloa Lona leo a o tatou fetufaai atu a tatou molimau ia i latou.

I tausaga e tele ua mavae, sa faamatala ai e Polika Iaga se uluai faifeautalai o le Ekalesia, sa talosagaina ina ia faamatala atu lana molimau i se potopotoga tele o tagata. I le faamatalaga a Peresitene Iaga, o lenei faifeau patino, “sa le’i mafai e ia ona ta’u mai faapea sa ia iloa o Iosefa Samita o se Perofeta.” E sili ia te ia le na o le fai o se tatalo ma alu loa, peitai sa le mafai ona o le tulaga sa i ai. O lea na amata ai ona tautala, ma “o le taimi lava na matala mai ai le ‘o Iosefa o se Perofeta’ … na sosoo mai loa, ona matala lona laulaufaiva, ma sa faaauau ai ona ia tautala seia toeitiiti goto le la.”

Sa faaaogaina e Peresitene Iaga lenei aafiaga e aoao atu ai, “e liligi mai e le Alii Lona Agaga i luga o se tagata pe a ia molimau atu i le mea e tuu atu e le Alii e molimau atu ai” (Millennial Star, faaopoopoga, 1853, 30).

Sa malamalama Ailama le uso o le Perofeta i lenei mea, ma sa ia molimau atu e aunoa ma le fefe e uiga i le upumoni paia e pei ona faaalia i lona uso, o Iosefa, ma faamaonia ai i lona lava loto. O lana molimau sa faamanuiaina ai le tele o ola, e aofia ai ma Parley P. Pratt. Ina ua faatoa vaai Parley i le Tusi a Mamona, sa aveina e Ailama o ia i lona fale ma faaalu ai le po atoa e aoao atu ai ma molimau atu ia te ia. Sa ia tuuina atu lana molimau i le matafaioi faaperofeta ua tuuina atu i luga o Iosefa ma le moni o le Tusi a Mamona. E le’i leva ae tuu ese e Ailama ona lava manaoga ae [o atu]… . ma Parley e talia lana talosaga ina ia papatisoina (tagai Autobiography of Parley Parker Pratt, ed. Parley P. Pratt Jr. [1938], 35–42).

Atonu tatou le malamalama atoatoa pe mafai foi ona fuafaatatau le mamao o aafiaga o le molimau a Ailama na tuuina atu ia Parley P. Pratt. E le gata i tupulaga fāi mai faatuatua a Parley, ae o lana molimau faaaposetolo ma lana galuega faafaifeautalai ua tosina mai ai agaga e le mafaitaulia i le malo o le Atua. O se mea mata’ina, o i latou sa auai mai i le Ekalesia o se taunuuga tuusa’o o lana galuega i Kanata, sa aofia mai ai ma Iosefa Filitia ma ona tuafafine o Mary ma Mercy. Ina ua maliu lona faletua muamua, o Jerusha, sa feiloai Ailama ma Mary Fielding ma la faaipoipo ai, ma o la la’ua faaipoipoga na maua ai Peresitene Iosefa F. Samita ma isi tagata ma taitai e le mafaitaulia o le Ekalesia. Ua ou iloa nei e le faapea o molimau uma o le a toe maua mai ai se faamanuiaga e faapei ona i ai Ailama.

O Joseph Kimber, o se tagata lotomaulalo faatoa liliu mai i Thatcham, i Egelani, sa tuuina atu lana molimau faatauvaa i se tagata sa galue i se faatoaga. Ou te talitonu o le molimau a Uso Kimber e uiga ia Iosefa Samita ma le Toefuataiga, sa faamumu ai le afi o le molimau i le loto o le alii e 17 tausaga o Henry Ballard ma mafua ai ona talosaga atu o ia ina ia papatisoina. O augatupulaga o le aiga o Ballard o faamanuiaga na o se molimau faatauvaa.

O le au paia ma faifeautalai i o tatou taimi, e mafai ona maua le poto masani e faaliliu mai ai isi e ala i lo latou ola ai i le mea sili latou te mafaia, ma sauniuni ai e “laulaututu e fai ma molimau a le Atua i aso uma, ma mea uma, atoa ma nuu uma” (Mosaea 18:9). Sa faamatala mai talu ai nei e se uo, lona i ai i se malaga e 90-minute i se pasi i Pasila. Sa uunaia o ia e alu i le pito i tua o le pasi, e talanoa ai i le autalavou sa galulue o ni ta’iala mo lana vaega o tagata faipisinisi. Sa mulimuli atu ia te ia se paaga a lona tamā i tua o le pasi, ma faalogo ai i lana molimau e uiga i le moni o le talalelei toefuataiina. Sa fai mai mulimuli ane lenei tagata: “Ina ua ou faalogo i lau molimau, sa oo mai i lo’u tino atoa se faalogona uiga ese e moni nei mea.” E le o toe mamao ona papatiso lea o ia ma lona faletua.

Ua saunia nei faifeautalai e aoao atu lesona, e le pei o ni talanoaga ua taulotoina po o ni lesona foi ua tauloto; ae o le a latou otootoina mai mataupu faavae o le talalelei i se ala faatulagaina lelei, ma valaau atu i le Agaga e faasino i latou pe faapefea ona latou avatu upumoni o le talalelei i tagata sailiili, o le agaga i le agaga ma le loto i le loto. Uso e ma tuafafine, ia auai faatasi ma faifeautalai i le fetufaaiina atu o lau molimau taua i aso uma, ma molimau atu i avanoa uma e uiga i le savali mamalu o le Toefuataiga. O le afimumu o lau molimau, ona pau lava lena o le mea e te manaomia ina ia folasia atu ai le talalelei i le toatele o isi fanau a le Tama. Faalagolago i le Alii, ma aua lava nei manatu faatauvaa i le aafiaga e mafai ona avatu e lau molimau i olaga o isi, a o e tuuina atu faatasi ma le mana o le Agaga. O le faalotolotolua ma le fefe o meafaigaluega na a Satani. Ua oo mai le taimi mo i tatou uma e faatoilalo le fefe, ae faaaoga ma le lototetele avanoa uma e fetufaai atu ai a tatou molimau o le talalelei.

Ia faamanuia atu le Alii, a o faaauau pea ona faafailele a outou molimau e ala i tatalo, o au lava suesuega o le talalelei, ma au faatinoga o le tautua. Ma lo’u fiafia tele, ou te molimau atu ma le lotomaulalo e alofa le Atua lo tatou Tama Faalelagi ia i tatou, o Iesu o le Keriso; o Iosefa Samita na toefuataiina mai le atoaga o le talalelei faavavau; ma o loo molimau mai le Tusi a Mamona i le moni o nei mea. O loo taitaiina i tatou e se perofeta soifua. Ma ou te tatalo ia faamanuia atu le Alii ia te outou, o’u uso e ma tuafafine pele, a o outou aoao atu ma molimau atu, ou te tatalo atu ai, i le suafa o Iesu Keriso, amene.