Faamautuina o a Tatou Molimau

Sa faia talu ai nei se ma talatalanoaga manaia ma se alii talavou o le sa manatunatu i se misiona. A o ma talanoa, sa manino mai ai sa tauivi o ia ma lana faaiuga, aua sa ia fesiligia le malosi o lana molimau i le talalelei a Iesu Keriso. Na ia manao e fia iloa pe aisea na te le’i mauaina ai se tali manino i ana tatalo ma ana suesuega o tusitusiga paia.

O lenei alii talavou, o le a ou faaigoaina ia Simi, sa ola a’e i totonu o le misiona i se aiga e i ai ni matua agalelei o e sa faia le mea sili e aoao atu ai mataupu faavae o le talalelei i le la fanau.

O ia o se tagata maoae i afeleti ma e lauiloa i ana uo i le aoga. Ae peitai, e na o ia lava ma nai isi tamaiti toalaiti o le Au Paia o Aso e Gata Ai i totonu o se aoga maualuga toatele.

Ona sa ola a’e lo matou aiga i totonu o le misiona, o lea na vave ai ona ou malamalama i luitau o Simi i le manao e tumau faamaoni i mataupu faavae o le talalelei a o taliaina foi e ni uo lelei, ae o ni uo e matuai ese lava tulaga latou te faatauaina ma talitonuga mai ia te ia.

Sa saili o ia mo se isi faamaoniga o lana molimau ia Iesu Keriso ma le Toefutaiga o le talalelei.

O le aso ou te tautala atu ai ia Simi ma isi e toatele e pei o ia—o alii talavou ma tamaitai talavou i itu eseese o le lalolagi, o e e le o mautinoa e uiga i a latou molimau ae o loo matuai mananao ia atiina ae ni molimau malolosi ma le ola ia o le a taialaina ai i latou i faigata o le olaga o loo faatalitali mai.

Ou te tautala atu foi i tagata matutua o e e le’i lagonaina lava le loloto o le agaga o le talalelei i o latou olaga. Talu ai ona e le o maua ia i latou se molimau malosi o lea ua faatagaina ai lava e nisi o latou manatunatuga ma gaoioiga o aso taitasi ina ia taulai atu i mea o le lalolagi ma o lea ua latou tuuitiitia ai le uunaiga a le malamalama o le talalelei i o latou olaga i aso uma.

Ma e pei ona faamatala manino mai e Elder Neal A. Maxwell, o loo aofia ai foi “na tagata lelei o le Ekalesia o loo faataetaealuga ae lē matua’i tuu i le loloto le avea ai ma soo, po o isi foi o loo fai ia tau lava ina fai ae lē faia ma le ‘naunautai i ai’ (MFF 76:75; 58:27)” (i le Conference Report, Oke. 1992, 89; po o le Liahona, Ian. 1993, 82).

A o o’u auai atu i sauniga o falelauasiga o Elder Neal A. Maxwell ma Elder David B. Haight ma faalogologo atu i saafiafiga talafeagai ia i laua, sa sili atu ona ou malamalama i totonu ia te a’u lava ia i faataitaiga maoae o le molimau ma le avea ma soo na faaalia i soifuaga o nei uso maoae e toalua. Sa ou manatunatu pea pe mafai faapefea e a la faataitaiga ona faamalosia a tatou molimau ma matuai faalolotoina lo tatou tautinoga ina ia latalata atu ia Keriso.

O nei soo maoae e toalua o Keriso sa faataitaia le apoapoaiga a Peresitene Gordon B. Hinckley ia i tatou uma ina ua ia saunoa mai: “Sa ta’ua faapea ua ou fai atu, ‘Fai le mea sili e te mafaia.’ Ae ou te fia faamamafa atu ia fai le mea e matua sili. Ua tatou matele atu i le faamalieina i le faatinoga ua masani ai. Tatou te mafaia ona faia mea e matua sili atu ona lelei (“Tu Malosi ma le Mausali,” Fonotaga Faaleaoaoga a Taitai i le Lalolagi Atoa, 10 Ian. 2004, 21).

E mautinoa lava o le fautuaga ma le faamalosiau a Peresitene Hinckley e faatatau foi pe sili atu i le atiina ae ma le faamalolosia o a tatou molimau ia Iesu Keriso, nai lo se isi lava mea.

O molimau moni e aumaia ai le malamalama o le talalelei toefuataiina a Iesu Keriso i o tatou olaga ma taulai uma atu ai i tatou i le sini e tasi o le toe foi atu lea i lo tatou Tama o i le Lagi—ae peitai o a tatou molimau taitoatasi e oo mai i aafiaga e tele ma tulaga eseese i o tatou olaga.

E pei lava o Simi, i le avea ai ma se alii talavou sa faamanuiaina a’u i le i ai o ni “matua lelei” (1 Nifae 1:1). Sa la’ua aoaoina mataupu o le talalelei ma tulaga tausaafia i lo matou aiga e ala i aoaoga ma faataitaiga. A o o’u laitiiti sa ou manatu sa i ai sa’u molimau. Sa ou talitonu! Ona oo mai ai lea o nisi aafiaga faaleagaga faaletagata e ala i le faatuatua, tatalo, suesuega o tusitusiga paia, aemaise o faamanuiaga faaletama i totonu o lo matou aiga, lea na mafua ai ona ou manatunatu loloto e uiga i mataupu faavae sa ou aoaoina ma talitonu i ai—ae sa sili atu ona ou manatunatu loloto i mea sa amata ona ou lagonaina. O le a faavavau pea la’u faafetai i matua o e na fesoasoani e taialaina a’u i na aafiaga sili ona taua. E i ai so la aafiaga tumau ia te a’u faapea le malosi o la’u molimau.

Ou te manatu sa i ai i tatou i le mafaufau o Alema a o ia aoaoina ia sa Sorama i le auala e maua ai ni molimau o le upumoni:

“Ae peitai, faauta, afai tou te ala mai, ma fagua o outou mafaufau e oo i le tofotofo i a’u upu, ma faaaoga sina faatuatua itiiti lava, ioe, afai tou te le mafaia se mea e sili i le manao i le fia faatuatua, ina tuu ia lenei manao e galue i totonu ia te outou, seia lava lo outou faatuatua e talia ai nisi o a’u upu” (Alema 32:27).

Ona “faatusatusa lea e [Alema] le upu i se fatu.” Na ia faamalamalamaina faapea a o tatalaina le loto “o le a amata ona tupu ai i totonu o o outou fatafata” (Alema 32:28). Ona tuu mai ai lea e Alema ia i tatou le ki i le atiina ae o se molimau faamanuiaina.

“Ae peitai, afai tou te tausia le upu, ioe, tausi le laau pe a amata ona tupu, i lo outou faatuatua, ma le filiga tele, ma le onosai, ma le faatalitali i ona fua, e mau aa; faauta foi e avea ai ma laau e tupu ae i le ola faavavau” (Alema 32:41).

Ona sosoo lea ma le folafolaga!

“Ona outou selesele ai lea, o’u uso e, le taui o lo outou faatuatua, ma lo outou filifiliga, ma lo outou faatoatoa, ma lo outou onosai, ina o faatalitali seia fua mai le laau i ona fua mo outou” (Alema 32:43).

Tatou mafaufau faatasi mo sina taimi i le mea ua aoao mai e Alema ia i tatou.

Muamua, e tatau lava ona i ai so tatou manao faamaoni e talitonu. O fuaitau e pei o le “ala mai,” “fagua o outou mafaufau,” “tofotofo i a’u upu,” ma le “faaaoga sina faatuatua itiiti lava” o ni upu faatino e fautua mai ai ni taumafaiga faifaipea i la tatou pitolaau.

O lana faamatalaga o le faaupuga o le tupu ai i totonu o o tatou fatafata, sa ia faamatalaina ai lagona o le Agaga Paia. Ma e pei ona folafola mai Moronae, “O le mana foi o le Agaga Paia tou te iloa ai le tonu i mea uma lava” (Moronae 10:5).

Ina ia tausia pea le tuputupuae o lena Agaga, ua fai mai Alema e tatau ona tatou tausia “e ala i le faatuatua ma le filiga tele ma le onosai” Ona ia folafola mai lea faapea o taui o le faatuatua, filiga tele, onosai, ma le faatalitali o le a maua ai le ola faavavau (Alema 32:41; tagai foi f. 43).

Ua matuai manino lava aoaoga a o tatou perofeta o aso e gata ai, e pei o Alema, i mea e moomia ona tatou faia ina ia atiina ae ai ma faamalosia ai a tatou molimau.

Ua auina mai i tatou iinei ina ia galueaiina lo tatou lava faaolataga e ala i tofotofoga ma luitau o le olaga i aso taitasi. E le mafai ona tatou faia lena e ala lea i le faalagolago tele atu i le malamalama e nono mai i se molimau a se tasi. A o tatou mauaina ia musumusuga pe a tatou faalogo i perofeta, taitai, ma uo o tuuina mai a latou molimau, o na lagona faaleagaga e tatau ona faateleina ai lo tatou manao ina ia faamalosia o tatou lava talitonuga.

I la’u uo talavou, ma outou uma i soo se mea o outou i ai, aua ne’i taofia lo outou talitonu e fesoasoani mai le Alii. O le tali i a outou tatalo atonu e le manino pe le vave ona oo mai e pei ona outou mananao i ai, ae ia tatalo pea. O loo faafofoga mai le Alii! A o e tatalo, ia ole atu mo le fesoasoani ina ia malamalama lelei i uunaiga a le Agaga Paia. Ona e faia lea o le mea sili e te mafaia ina ia agavaa mo le mauaina o na uunaiga. A e iloa pe faalogoina ia uunaiga ma musumusuga, ona faatino loa lea.

O tatalo faatauanau i aso taitasi e saili ai le faamagaloga ma le fesoasoani ma le taitaiga faapitoa e taua tele i o tatou olaga ma le faafaileleina o a tatou molimau. Afai tatou te faananati, tautu i upu, po o le faatalanoa, po o le galo ona faia a tatou tatalo, ua tatou matele atu lava i le le mauaina o le Agaga lea e matuai taua lava i le taitaiga faaauau pea lea tatou te moomia ina ia pulea lelei ai ia luitau o o tatou olaga i aso uma. O tatalo faaleaiga i afiafi ma taeao taitasi e faaopoopo mai ai faamanuiaga faaopoopo ma le mana i a tatou tatalo ma a tatou molimau.

O le aafia ma le faamaoni o le tagata lava ia i tusitusiga paia e maua mai ai le faatuatua, faamoemoe, ma tali i o tatou luitau i aso taitasi. O le faitau soo, mafaufau loloto i ai, ma le faaaogaina o lesona o tusitusiga paia, a tuufaatasi ma le tatalo, o le a avea ma se vaega e le mafai ona suia i le mauaina ma le lagolagoina o se molimau malosi ma le ola.

Na toe faamanatu mai e Peresitene Spencer W. Kimball ia i tatou le taua o le faitauina pea o tusitusiga paia ina ua ia saunoa mai, “Ua ou iloaina pe a ou faasamasamanoa i lo’u sootaga ma le lagi ma foliga mai … ua leai lava se leo paia o musumusu mai, … pe afai ou te tuuina a’u lava ia fiafia i tusitusiga paia ona ou latalata ai lea i lo’u sootaga ma toe faafoisia mai ai lo’u malosi faaleagaga” (The Teachings of Spencer W. Kimball, ed. Edward L. Kimball [1982], 135).

Na aoao mai le Faaola, “E suesue outou i Tusi aua ua outou manatu tou te maua ai le ola e faavavau: o Tusi foi ia o loo molimau ia te au” (Ioane 5:39).

O molimau malolosi, ma le le maluelue o loo i ai i totonu o le toatele o outou o tagata sili ona lelei ma le faamaoni o le Ekalesia, na maua mai le mulimuli ma le agaga tatalo i fautuaga mai o tatou perofeta ma tusitusiga paia. O lena foi lava faamanuiaga taua o loo avanoa mo i tatou taitoatasi o e saili ma le faamaoni i ai.

I la’u uo talavou o Simi, ma i latou uma o e o loo i ai ni atugaluga faavaitaimi e uiga i le malolosi o a latou molimau, ia iloa o loo alofagia ma vaavaaia outou i aso taitasi e lo outou Tama o i le Lagi. O le a Ia tali atu a o e tauivi e tausia Ana poloaiga ma aapa atu mo Lona aao alofa.

Tatou te fetufaai uma i le folafolaga lava e tasi lea na tuuina atu e le Alii i le Perofeta o Iosefa Samita: “Ia faalatalata mai ia te a’u ona ou faalatalata atu ai lea ia te outou; ia saili ia te a’u ma le filifiliga ona outou maua ai lea o a’u; ia ole mai ona outou maua ai lea; ia tuitui mai, ona toina ai lea ia te outou” (MFF 88:63).

O le valaau mai a lo tatou perofeta ina ia tatou “faia le mea sili,” ua luitauina ai i tatou uma, o tagata taitoatasi ma totonu o o tatou aiga, ina ia iloiloina ma le faaeteete o tatou olaga faaletagata, ona tautino atu lea e suia na mea ia o le a mautinoa atoatoa ai o loo malolosi ma mausali a tatou molimau.

O molimau malolosi e avea ma uunaiga malosi mo i tatou ina ia faia ai ia “sili atu ona lelei.” E avea ma talipupuni anagata e puipuia ai i tatou mai mea faafatiatama’i o le lalolagi.

Ou te molimau atu o loo i ai so tatou Tama o i le Lagi alofa ma manatu tele mai, ma sa faaali mai i la’ua ma Lona Alo Pele o Iesu Keriso, i le taulealea o Iosefa e tatala mai ai le Toefuataiga o le talalelei i lenei tisipenisione mulimuli.

O Iesu Keriso o loo taitaia lenei Ekalesia. O Peresitene Gordon B. Hinkcley o Lana perofeta filifilia.

Ia tofu maua e i tatou taitoatasi le lototoa ma le talitonuga maumaututu, e mulimuli ai i fautuaga a le perofeta. A tatou faia, o le a mausali a tatou molimau patino. Ia faapea ia ona faia ou te ole atu ai i le suafa o Iesu Keriso, amene.