“Ou te Tu i le Faitotoa ma Tuitui Atu”

I nai vaiaso ua tuanai atu sa ou i ai i se faatasiga faalauaitele ma se uo o tausaga e tele—e le’i leva nei ona litaea, e aoaoina lelei, ma sa matuai faamanuiaina foi. E iloa o ia i lona atunuu o se taitai i lana matata. A o ma nonofo faatasi i le taumafataga sa ia faliu mai ia te a’u ma fesili mai e uiga i le Ekalesia. O se mea lea na ou ofo ai aua ou te malamalama lelei, o ia, e pei foi o le toatele o i le lalolagi i aso nei, e taumafai lava e faamaonia e le o i ai se Atua. O lana fesili sa faamaoni. Ma na foliga mai sa i ai se mea sa ia mafaufau i ai aua e leai ma se mea i le ma talanoaga na muamua atu e ono uunaia ai lea fesili.

Sa ou tali atu i ai e ala lea i le faamatalaina atu ia te ia o le toefuataiga, ma na faaali atu le Atua le Tama Faavavau ma Lona Alo, o Iesu Keriso, ia Iosefa Samita ma na auala mai ia te ia le toefuataiina mai o le perisitua ma le pule a le Atua i le lalolagi. Na tuu atu la’u molimau ia te ia ou te iloa ma le mautinoa o mea na ou ta’uina atu ia te ia e moni. Sa umi se taimi o faatali a o o’u vaavaai atu ia te ia o loo mafaufau loloto i mea na ou ta’u atu ia te ia. Ina ua ou iloa o loo ia tau malamalama i mea na ia faalogo i ai, sa ou soso atu ma faapea atu: “E mafai ona e iloa ma le mautinoa e pei ona ou iloa o mea na ou molimau atu ai e moni, pe afai o le a e ‘ole atu i le ‘Atua le Tama Faavavau, … ma le loto faamaoni, … ma le faatuatua ia Keriso, [ou te folafola atu] na te faaalia le tonu i ai ia te [oe] i le mana o le Agaga Paia. O le mana foi o le Agaga Paia [e] te iloa ai le tonu i mea uma lava.’”¹

Sa faaauau pea ona ia manatunatu loloto. Ae paga lea, na faalavelaveina i ma’ua e isi malo faaaloalogia ma sa faapea ona mou atu lena taimi sili ona taua, ae na ou iloa i totonu o lona loto sa ia tau malamalama i mea na ia faalogo ma lagonaina. Ou te faamoemoe o le a toe oo mai se isi avanoa aua e tele naua ni mea ou te fia faasoaina atu ia te ia. Ou te iloa e pei lava ia o le fia afe po o le fia miliona o isi o i le lalolagi i le taimi nei o loo fiafia lava i le tulaga o loo i ai le olaga. E pei ona ta’ua e Nifae, o i latou, na faamalieina ma faamoe ia te i latou i le “filemu i la le tino.”² Sa matuai aafia lava i latou i uputuu ma aoaoina e ala i mataupu a tagata.

A o o’u toe mafaufau atu i lena taimi, sa ou fesili ifo ia te a’u le fesili “O le a le taui mo le mulimuli i manatu o tagata?” E foliga mai e manino lava le tali. O i latou o e talitonu i nei manatu e maliliu lava e aunoa ma le faamoemoe i le taui e faavavau. Sa ou lagona na ootia la’u uo e ala i le agaga o le Alii. E le taitai ona fiu lo tatou Tama Faalelagi ia i tatou. Na fetalai mai le Faaola, “Faauta, ou te tu atu i le puipui ma tuitui atu; ai se tasi e faalogo mai i lo’u leo, ma tatala mai le puipui, ou te ulufale atu ia te ia, ma te tali sua foi ma ia, o ia foi ma a’u.”³

Ae tatau ona ia i tatou le manao e tatala atu le faitotoa e tusa lava pe aafia ai le faavae o o tatou talitonuga ua mavae ma le auala o loo tatou ola ai. Ma e faatatau lea i tagata o le ekalesia ua le toe toaaga mai, e faapea foi ia i latou e le o ni tagata o le Ekalesia. E faamanatu mai ai ia te a’u ia upu o le viiga:

O le a le aveeseina lava e lo tatou Tama o i le Lagi lo tatou saolotoga. E tatau ona tatou saili i ai po o le mananao ina ia iloa lo tatou Tama ma Lona Alo, o Iesu Keriso. E i ai se auala e mafai ai e tagata uma ona iloa pe moni pe le moni ia aoaoga a Iesu Keriso. E pei ona tali atu Iesu i le au le talitonu i le Tausamiga o Fale Apitaga, na Ia fetalai atu, “Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava a’u.”⁵

Na saunoa Peresitene Tavita O. MaKei e faapea “o le tofotofoga sili lenei ona faigofie e tuuina atu ai le malamalama i se tasi lea e mafai e le mafaufau o se tagata ona mafaufau i ai. O le faia o se mea, o le faailoa atu i lou lava tagata, o le a faatalitonuina oe pe lelei pe leaga. Atonu e le mafai ona e faatalitonuina a’u i mea ua e iloa, ae ua e iloaina, aua sa e ola ai.”⁶

O le a le finagalo o le Tama? “O Le Ekalesia a Iesu Keriso o le Au Paia o Aso e Gata Ai o loo molimau atu i le lalolagi faapea o le finagalo o le Atua ua uma ona faailoa mai i lenei tisipenisione, ma ua uma ona faailoa mai mataupu faavae o le talalelei ma mataupu faavae o le olaga, ma e ogatasi ma mataupu faavae sa aoaoina atu e Keriso i le vaeluaga o aso”⁷ ma o le “togiola a Keriso e mafai ona faaolaina ai tagata uma e ala lea i le usiusitai i le tulafono ma sauniga o le Talalelei.”⁸

O loo tatou ola i se vaitaimi o le taumafai e faamaonia; ua mananao tagata e tuumaualaloina ia aafiaga faaleagaga, ma ua latou teenaina e i latou lava ia faaaliga. O le a le mea ua tupu i le mafaufau sailiili, le mafaufau matala, le mafaufau tuufesilisili, o se tasi o loo saili ia iloa le upumoni ma le malamalama? Ua tatou matele e faaaoga o tatou lava mana e taumafai e faamaonia ai. E finagalo le Alii ina ia tatou malamalama i le Agaga ma ua Ia tuuina mai ia i tatou se ata:

“O lenei foi, ou te tuuina atu ia te outou se faatusa i mea uma, ina ia le faaseseina outou; aua o loo i ai Satani i le atulaulau ma o loo fealua’i na te faaseseina atunuu—

“O lea o le agaga maulalo ma tatalo, o ia lea e talia e a’u pe afai na te usiusitai i a’u sauniga.

“O le na te tautala atu, e aga maulalo, e filemu ma faamatagofieina lana gagana, o ia lava lea e mai le Atua pe afai na te usiusitai i a’u sauniga.”⁹

Aisea e taua ai mo oe le saili ina ia iloa le upumoni?

O Iesu, lo tatou Togiola, a o le’i sopoia e ia le alia o Keterona ma faalataina ai e Iuta, sa ia tuuina atu se tatalo mamalu faapuluvaga. Na Ia ole atu i le Tama mo i tatou, na Ia fetalai, “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.”¹⁰

O le iloa o le Atua ma Lona Alo o le ola lena e faavavau. E mafai faapefea ona tatou aoao ia iloa le Atua pe afai tatou te le o naunau e saili ia te Ia ma faia Lona finagalo? O le ola faavavau o le mea lena e tatau ona tatou mananao i ai e sili atu nai lo soo se isi lava mea i lenei lalolagi.

E le mafai e se tasi ona suesue e uiga ia Iesu Keriso ma Ana aoaoga e aunoa ma le aafia ai ma suia ai mo le lelei. A o atiina ae e se tasi se molimau o le Faaola ua e manao foi e te avea faapei o Ia ma mulimuli ia te Ia, ma o lea e te ulu ifo ai i le vai o le papatisoga ma osia se feagaiga paia ma Ia.

O loo manatu popole lo tatou Faaola mo i tatou uma taitoatasi:

“Ia manatua e taua tele le aoga o agaga i le silafaga a le Atua;

“Aua, faauta, o le Alii, lo oulua Faaola, na maliu tiga i le tino; o le mea lea na tigaina ai o ia i le tiga o tagata uma, ina ia salamo tagata uma lava ma o mai ia te ia.

“Ma ua toetu mai o ia nai le oti, ina ia aumai e ia tagata uma ia te ia, e tusa ma le salamo.

“Faauta i le silisili o lona olioli i le agaga ua salamo!”¹¹

Talu ai ona o Lona alofa tele mo i tatou, o se alofa e paia, ua Ia finagalo ai ina ia tatou maua le ituaiga olioli, o loo Ia olioli ai. Na Ia fetalai, “Ua ou fai atu nei mea ia te outou, ina ia tumau ai lo’u olioli ia te outou, ia atoatoa foi lo outou olioli.”¹² O le a Ia faamanuiaina i tatou i se filemu moni—faalemafaufau, faalelagona, faaletino, faaleagaga, ma le tamaoaiga—“e le o se [filemu] e pei ona avatu e le lalolagi,”¹³ ae o se “filemu … e silisili lava i mea uma e manatu i ai.”¹⁴

A o usitaia e se tasi le finagalo o lo tatou Tama o i le Lagi, o le a oo mai le alualu i luma ma le faamautinoaga faaleagaga, faaleatamai ma lagona e ala i le Agaga Paia o le upumoni. E mafai ona faatupulaia lena mautinoa ma le olioli ma avea ma malamalama atoatoa. Na fetalai mai le Faaola, “Afai e te ole mai, o le a e maua lea faaaliga ma lea faaaliga, o lea poto ma lea poto, ina ia e iloa mea lilo atoa ma mataupu tau le filemu—e aumaia le olioli, e aumaia foi le ola faavavau.”¹⁵

Mo i latou ua le toe toaaga mai, o e faamaoni i le loto, o la’u uo, ma tagata lelei o le lalolagi, ou te valaaulia outou ina ia ala maia mai le leai o se manatu popole i mataupu o le faavavau ma le faamalieina sese o loo outou i ai ma omai ia Keriso ma faia soo se mea e moomia ina ia sailia ai ma le faamaoni le upumoni, ina ia iloa le Atua, le Tama Faavavau ma Lona Alo, o Iesu Keriso. Aua “o le ala lava lenei; e leai foi se isi ala po o se isi igoa i lalo o le lagi e mafai ona faaolaina ai tagata i le malo o le Atua.”¹⁶

Ou te tuuina atu la’u molimau afai tou te faia Lona finagalo, o le a outou lagona le latalata atu ia te Ia ma amata ona iloa le mea e ta’u o le olioli faavavau ma o le ola faavavau e mafai ona maua. O le a outou iloa ai o loo i ai o Ia, ma o Ia o lo tatou Tama o le na faaali mai ma le alofa ia i tatou le moni o le togiola ma le toetu ma le paia o lenei galuega tele. Ou te molimau atu ai i nei mea uma ma le faamaualalo, i le suafa o Iesu Keriso, amene.