O Le Ki i le Poto o le Atua

Uso e o le perisitua a le Atua, ua ou toe nofo foi i lalo ma tuuina atu la’u savali i lenei afiafi. E pei ona outou silafia, o lenei ou te feagai ma se faafitauli le tumau i le papatua. O outou o loo maua i le ma’i tua o le a malamalama i ai. O outou e le o maua ai—faatali mo sina taimi! Soo se isi faamalamalamaga o le mea o loo o’u tiga ai e le moni.

Ou te tautala atu ma le faamaualalo ia te outou i lenei afiafi ma se tatalo i lo’u loto ina ia mafai ona outou malamalama ia te a’u e ala i le mana o le Agaga. E faigata tele ona mafaufau i se isi mea e sili atu ona taua mo i tatou i le avea ai ma e ua umia le perisitua nai lo le ki i le poto o le Atua. O le afiafi nei ou te fia tautala ai e uiga i lena ki.

O le perisitua maualuga e taitaia le talalelei ma umia “ki o mea lilo a le malo, o le ki lea o le poto o le Atua.”¹ O le a le ki o le poto o le Atua, ma e mafai ea e se tasi ona mauaina? Ana leai le perisitua semanu e le mafai ona i ai se atoatoa o le poto o le Atua. Na saunoa le Perofeta o Iosefa Samita e faapea o le “Perisitua Mekisateko … o le auala lea e faaalia mai ai le malamalama uma, o aoaoga faavae, le ata o le faaolataga ma mataupu taua uma mai le lagi.”² Na ta’ua e Peresitene Iosefa F. Samita e faapea, “O se tasi e mafai ona matuai faamautuina moni lava o Iosefa Samita o se perofeta a le Atua, ma o Iesu o le Faaola, ua ia umiaina se taui sili atu e mafai ona mafaufauina e se tasi. Afai tatou te iloa lenei mea ua tatou iloa le Atua, ma ua tatou maua se ki i le poto uma.”³

Na silafia e le Tama i a Aperaamo le taua o lenei ki silisili a o ia toe faamatalaina le mea na ia oo i ai: “Na ou saili ai ia ou maua faamanuiaga o o’u tama, atoa ma le aia tatau e ao ina faauuina ai au, ina ia ou galue i lea lava aia tatau; ma, talu ai ona o a’u o se sa mulimuli atu pea i le amiotonu, ma naunau ia ou maua le poto tele, ma faasilisili atu ona lelei ona ou mulimuli atu i le amiotonu, ma fia maua le poto maoae silisili, … ma naunau i faatonuga ma tausi i poloaiga a le Atua, o lea na avea ai au ma suli moni, o se Faitaulaga Sili, o loo i ai le aia tatau sa i ai i augatama.”⁴

Soo se tasi e amiotonu ma manao e maua le poto maoae silisili ma ia “avea ma se tasi e mulimuli atu i le amiotonu” e mafaia, i lalo o le pule o le perisitua, ona mauaina se poto maoae silisili o le Atua. Ua ta’u mai e le Alii ia i tatou se auala manino e tasi, e pei ona tuuina mai i totonu o le Mataupu Faavae ma Feagaiga: “Afai e te ole mai, o le a e maua lea faaaliga ma lea faaaliga, o lea poto ma lea poto, … e aumaia le olioli, e aumaia foi le ola faavavau.”⁵

Atonu e fesili se tasi, “E faapefea ona avea i tatou ma tagata e mulimuli atu pea i le amiotonu?” O se tagata amiotonu o se tasi lea e osia ma tausia feagaiga o le talalelei. O ni maliliega paia nei,⁶ e masani lava i le va o tagata taitoatasi ma le Alii. O nisi taimi e aofia ai isi tagata, e pei o taitoalua. E aofia ai folafolaga ma tautinoga sili ona paia, e pei o le papatisoga, o le tuuina atu o le perisitua, o faamanuiaga o le malumalu, faaipoipoga, ma le avea ma matua. O le tele o faamanuiaga a le Tama i a Aperaamo na oo mai ao liligi atu le Agaga Paia i luga o tagata uma.⁷ Soo se alii po o se tamaitai agavaa e taliaina le Agaga Paia e mafai ona avea ma se “foafoaga fou.”⁸

Ina ia maua le atoatoaga o nei faamanuiaga mai le lagi ma maua se poto atoatoa o le Atua, e tatau i se alii ona ulu atu ma tausia le tautoga ma le feagaiga a le perisitua.⁹ Na matuai malamalama lelei ona faailoa mai e Peresitene Marion G. Romney:

“E na o le pau lava le auala e mafai ai e se tagata ona ola i le olaga, lea ua fuafuaina i ai le olaga faaletino, o le maua lea ma faalauteleina le Perisitua Mekisateko… . E matuai taua lava le matuai manino i o tatou mafaufau le mea o loo moomia mai e le faalauteleina o o tatou valaauga i le perisitua mai ia i tatou … . e moomia ai ni mea se tolu:

“1. Ia tatou maua se atamai o le talalelei.

“2. Ia ogatasi lo tatou olaga taitoatasi ma faatulagaga o le talalelei.

“3. Ia tatou tuuina atu le auaunaga faamaoni.”¹⁰

E lua feagaiga e ao ona osia e se tasi ua umia le perisitua. O le feagaiga muamua o le faamaoni lea i le mauaina o le Perisitua Arona ma le Perisitua Mekisateko.¹¹ O le perisitua Arona e aoaoina ma saunia ai le perisitua mo tiute sili atu o le Perisitua Mekisateko ma saunia ai o ia e mauaina ia faamanuiaga o le tautoga ma le feagaiga o le perisitua. O le umiaina uma o le Perisitua Arona ma le Mekisateko e taua uma i le mauaina o le atoatoaga o faamanuiaga o loo i le Alii mo Ona atalii faamaoni. O le feagaiga lona lua i le avea ai ma Ana auauna i lenei pule paia o le faamaoni lea i le faalauteleina o le valaauga o se tasi ma le faatuatua atoatoa i le Atua.¹²

O se vaega o le tautoga ma le feagaiga o le perisitua, ua tuuina mai ai e le Alii ni folafolaga i Ona atalii faamaoni lea “na te le mafai ona solia.”¹³ Muamua, o e umia le perisitua e “faapaiaina e le Agaga i le faafouina o o latou tino.”¹⁴ Ou te manatu o Peresitene Hinckley o le faataitaiga sili lava lea o lenei mea. Ua faafouina o ia i le tino, mafaufau, ma le agaga i se tulaga sili ona ofoofogia. Lona lua, e “avea i latou ma atalii o Mose ma Arona ma fanau a Aperaamo.”¹⁵ Tolu, e avea i latou ma “au filifilia a le Atua.”¹⁶ I le avea ai ma Ona sui, latou te momoliina atu lenei galuega paia i o tatou vaitaimi i luga o le fogaeleele. Fa, “o i latou uma o e maua lenei perisitua” ua taliaina le [Alii].”¹⁷ Lima, o i latou o e taliaina auauna a le Alii ua taliaina o Ia.¹⁸ Ono, o i latou o e taliaina le Faaola ua taliaina le Atua le Tama.⁹ Fitu, latou te talia foi le malo o le Tama.²⁰ Valu, e tuuina atu foi ia i latou mea uma o i ai i le Tama.²¹ O i latou o e mauaina mea uma o i ai i le Tama e leai se isi mea e sili atu e mafai ona toe mauaina.

O outou alii talavou o le perisitua Arona ua tuuina atu i ai le pule ma tiutetauave maoae. I lalo o le taitaiga a le epikopo, e lua lava sauniga e faatatau tonu lava i le Togiola e faatinoina e le perisitua Arona. O le tasi o le faamanatuga, o le faamanatuina lea o le toto o le Faaola na faamaligiina mo a tatou agasala ma Lona tino lea na Ia tuuina mai e fai ma sui o i tatou.²² O lona lua o le papatisoga. O loo i ai i ositaulaga le pule e faia ai papatisoga mo le faamagaloina o agasala. O le perisitua Arona o se mana moni lava. Na tusia e se tasi alii talavou lona aafiaga i le faaaogaina o lenei mana:

“I se tasi taimi sa ou auai atu ai i se uarota na toetoe lava a leai se Perisitua Mekisateko e i ai. Ae le’i faapea sa i ai se mea na tau faaletonu ai le faaleagaga. I le isi itu, o le toatele o ona tagata sa molimauina le faaaliga silisili o le mana o le perisitua latou te le’i iloaina muamua.

“Sa totonugalemu le mana i le au ositaulaga. O le taimi muamua lea i o latou olaga ua valaauina ai i latou ina ia faia uma tiute o ositaulaga ma tali atu i manaoga o o latou uso a tagata i le uarota. Sa matuai maelega i latou i le valaauga e aoao i aigale na o le avea ma se soa e na o le sioa, e o ma se toeaina e fai se asiasiga faasamasamanoa, ae ia latou faamanuia atu i o latou uso ma tuafafine.

“A o le’i oo i le taimi lea, sa matou faatasi ma ni ositaulaga se toafa i se isi tulaga e ese mai ai … O latou sa mafua ai ona mumusu uma faiaoga seminare ae le’i atoa se lua pe tolu ni masina o faiaoga. O latou e faatupuina le vevesi ma le pisapisao i ni malaga a le Sikauti. Ae ina ua manaomia i latou—ina ua faatuatuaina i latou i se misiona taua—sa faitaulia i latou faatasi ma i latou o e na sili atu ona maoae i le auaunaga faaperisitua.

“O le mea lilo na mafua ai ona sa valaauina e le epikopo ana Perisitua Arona ina ia tulai i le tulaga faatamatane o e e mafai ona faaali i ai agelu; ma sa latou tulai i lena tulaga, tuuina atu le faaolatotoga i e sa manaomia ma faamalolosi ia i latou o e na moomia le faamalosia. E le gata sa faamalosia tagata o le uarota ae sa faapea foi i sui o le korama lava latou. Sa sosolo atu le lotogatasi i totonu o le uarota atoa ma na amata ona tofo tagata uma i le uiga o ni tagata e tasi le mafaufau ma tasi le loto. E leai ma se mea na faigata ona malamalama i ai i lenei mea atoa; sa na o le faaaogaina tonu lava o le Perisitua Arona.”²³

Na ta’u atu talu ai nei lava e Peresitene Gordon B. Hinckley i Perisitua Arona, e faapea o outou na o e ola i ni olaga agavaa e mafai ona faamanuiaina e ala i le “puipuiga a agelu” ma o loo ia outou “se mea matagofie e ao ona ola agavaa i ai.”²⁴

O le a le uiga o le avea ma atalii o Aperaamo? E loloto atu sona uiga i le faatusipaia nai lo lona uiga moni o ni ana fanau. Na osi feagaiga le Alii ma Aperaamo, le peteriaka sili, e faapea o le a faamanuiaina malo uma ona o ia.²⁵ E mafai e soo se alii ma soo se tamaitai ona mauaina faamanuiaga o Aperaamo. E avea i latou ma ana fanau ma ona suli i faamanuiaga folafolaina e ala i le taliaina o le talalelei, i le papatisoina, i le ulu atu i le faaipoipoga o le malumalu, i le faamaoni i le tausiga o a latou feagaiga, ma le fesoasoani e momoli atu le talalelei i atunuu uma o le lalolagi.

Ina ia faatagaina e “tauave lenei galuega ma le Perisitua i atunuu uma”²⁶ e tatau i se alii ona maua le perisitua Mekisateko ma ona faamanuiaga. Ma o le faamaoni e avea ai o ia ma suli i le atoaga o le ola faavavau. E pei ona fai mai Paulo, “Afai foi e o Keriso outou, e moni, o le fanau outou a Aperaamo, o suli foi e tusa ma le mea na folafolaina.”²⁷

I le avea ai ma fanau a Aperaamo ua tatou maua ai nisi o matafaioi. Ua poloaiina i tatou ina ia omai ia Keriso e ala lea i le faia o “galuega a Aperaamo.”²⁸ O nei galuega e aofia ai le usitai i le Atua, mauaina ma tausia o sauniga ma feagaiga o le perisitua ma le malumalu; talai atu le talalelei; fausia se iunite faaleaiga ma aoaoina a tatou fanau; ma ia faamaoni e oo i le iuga.

E mataina tele le faaaogaina e le Alii o le upu fanau i Lana folafolaga ia Aperaamo. E i ai sona uiga atoatoa nai lo le upu o e tupuga mai aua o lona uiga o le faateleina lea o faamanuiaga o le feagaiga a Aperaamo i “atunuu uma.”²⁹ Na folafola atu e le Alii ia Aperaamo ni fanau “e le mafaitaulia e pei o fetu” po o le “oneone i le matafaga.”³⁰

O fanau amiotonu a Aperaamo ua faamanuiaina foi i le avea ma tamafai i totonu o le aiga e faavavau o Iesu Keriso. E aofia ai le aia e maua ai feagaiga e faavavau i totonu o le malumalu, lea, pe afai latou te agavaa, o le a faatulagaina ma faaeaina i le aiga e faavavau o Keriso.³¹ E aofia ai foi “faamanuiaga o le faaolataga, ma le ola e faavavau.”³²

O le faatulagaga faapeteriaka e amata mai ia Aperaamo ia Isaako e oo ia Iakopo. O le laina o le perisitua lea e faaauauina mai ai lava e oo mai i o tatou aso ma o tatou taimi. I le gasologa mai o tupulaga, na tuu mai ai faamanuiaga ma folafolaga mai tama i o latou atalii faamaoni. O se faataitaiga i onaponei e maua mai lea i le soifuaga o Elder John B. Dickson o le Au Fitugafulu. Na ia ta’ua.

“Ina ua oo mai le taimi ou te malaga ai i le misiona, sa ou fiafia e galue mo le Alii. Ae ou te le’i malaga, sa maua a’u i le kanesa o ponaivi. O lo’u avanoa mo le ola umi ma faataunuuina le misiona sa le mautinoa. Sa ou faatuatua o le a saunia e le Alii se auala pe afai e finagalo o Ia ou te alu. Sa tuuina mai e lo’u tama ia te a’u se faamanuiaga sa ia taua ai, o le a ou auauna atu i le misiona i Mekisiko, auauna i le Ekalesia i lo’u olaga atoa, ma o le a faia so’u aiga. Sa tipieseina lo’u ogalima i luga a’e o lo’u tulilima, ae sa ou ola pea, ma o folafolaga uma sa tuuina mai ia te au, sa faataunuuina.

“Sa manatu nisi, o le aveesea o se ogalima o se avega matautia ma le tiga, ae peitai o se tasi lea o faamanuiaga silisili i lo’u olaga. Sa ou aoaoina le taua o le i ai o lu’i ma le tali atu i ai.”

O Elder Dickson sa masani ona lima taumatau ae o lea ua aoao nei e faia mea uma i le lima tauagavale. O se tasi tauiviga sa ia aoao i ai o le seleina lea o ona fusiua. Na ia fai mai: “I se tasi taeao o le Aso Sa a o o’u i ai i lo’u potumoe faatasi ma lofusiua i lo’u lima, sa ou mafaufau ai, O le a faapefea ona ou seleina? Sa ou mafaufau i se fusiua e faamau i le kilipa. Sa ou mafaufau ou te fai atu ia Tina e fesoasoani mai ia te au. Ae le mafai ona ou aveina o ia i le misiona mo na o le seleina o o’u fusiua. O lea na ou mafaufau ai loa, o le a ou aoao ina ia ou faia lava e a’u. Na i’u ina ua ou fuafua e faaaoga o’u nifo. O loo o’u faaaogaina pea lena auala, e tusa lava pe ua faafiaafe ona seleina.”³³

Tatou te le iloa le auiliiliga uma o mea o le a moomia mai tagata o le Au Paia i aso le mautonu o loo lumanai. O le a faateleina le faigata o le ola amiotonu i aso uma. E faaopoopo atu i ai, o e umia le perisitua e ono mafai ona fetaiai ma nisi luitau faaopoopo i le malupuipuia ma le tausiga o o latou aiga. E pei ona faailoa mai e se tasi taitai o le lalolagi, o le a i ai “tulaga matautia e laugatasia ai i tatou uma. O faiga taufaamata’u i aso nei e sau mai ni malosiaga matautia ma le faatafuna ma e le faapito i se atunuu se tasi a tagata faatupu faalavelave o e e leai lava se isi mea o mananao i ai ae o le inoino i le paia o le ola o le tagata faapea ma mataupu faavae malamalama o loo faapelepele i ai malo.”³⁴

E mafai ona tatou faamoemoe e fetaiai uma lava ma faigata. Ae ua uma ona faalauteleina atu ia folafolaga maoae e faavavau ia i latou o e mausali i le amiotonu. Ua uma ona tuuina mai e le Alii Lana fetalaiga e faapea “ai foi se … e tumau i le faamaoni i mea uma, o le a le vaivai le mafaufau, pe faapouliuligia, po o le tino, itutino, po o gauga ivi; … Latou te le fia aai foi, pe fia inu.”³⁵ Ou te matuai mautinoa lava le mea o loo i le lumanai mo le Ekalesia a le Alii ma ona tagata, ae o le a ao ia i tatou ona tumau i le amiotonu ma ia “faamaoni i mea uma.”³⁶ O le ki o le poto o le Atua, o loo faatonutonuina e i latou o e tausia le tautoga ma le feagaiga a le Perisitua Mekisateko, o le a mafai ai ona tatou o ese mai o ni atalii o le Atua. Ia faapea ona tatou faia, ou te ole atu ai i le suafa o Iesu Keriso, amene.