Faapaia Mai A’u

Na faatalanoaina i ma’ua ma Sister Burton a o lumanai le ma faaipoipoga e le tama o Elder Richard. Ua ma iloa lelei le mea na saunoa ai Elder Richards i lenei sauniga o le konafesi.

I se konafesi faalesiteki talu ai nei, na oo mai ai se tamaitai talavou ia te a’u i le faaiuga. A o ma faatalofa, sa ia faapea mai, “Epikopo, e mafai ona faaleleia au lauga i le konafesi aoao e ala i le ataata.” Ou te fia ta’uina atu ia te ia e uiga i le fefe ma le ataata, ae le lava so’u taimi. Ae o le a ou taumafai ma faamoemoe mo le mea sili.

I le faaiuga o konafesi aoao uma lava, ou te oo ai i se aafiaga o le naunau ina ia faateleina pea—ia tele pea le mamalu o le faatasiga, ia tele pea le mafuta mai o le Agaga, ia tele pea le tausiga lea na faamalamalamaina ma faamanuiaina ai lo’u agaga.

O le poto masani o loo i ai nei e faapea o le tele e lelei ae o le itiiti e masani lava ona le manaomia. O nisi, o le sailiga ina ia maua ni oloa ma ni galuega se tele o lenei lalolagi ua avea lea ma se naunautaiga. Ae o isi, o le tele o le tamaoaiga o lenei lalolagi e talafeagai ia na ona tausia ai le ola po o le siitia ai ia tulaga o le olaga i se tulaga talafeagai. O le le taofiofia o le manao mo ni mea se tele e matautia ona taunuuga. Mo se faataitaiga, na faamanatu mai e Peresitene Boyd K. Packer ia i tatou e faapea: “E mafai ona pei i tatou o se tama e mafaufau e saunia mea uma mo lona aiga. Na te tuuina atu lona malosi uma i lena mea ma faamanuiaina ai; ae faatoa ia iloaina mulimuli ane o le mea sili o loo latou moomia ae ua le amanaiaina, o le faatasia lea o se aiga. Ma sa ia maua le faanoanoa e suitulaga i le lotomalie” (“Matua i Siona,” Liahona, Ian. 1999, 25).

O matua o e ua faamanuiaina i le mauaina o mea e tele o lenei lalolagi e masani lava ona faigata ona fai atu e leai i le tauanau mai a ni fanau e toetoe lava o mea uma e tuuina atu i ai. E oo atu a latou fanau i se tulaga matautia o le le aoaoina o tulaga e faatauaina e pei o le galue malosi, faatalitali mo se faamalieina, faamaoni, ma le lotoalofa. O matua maumea e mafai ona faia ma tausia ni fanau lelei, alolofa, ma amiolelei, ae o tauiviga ina ia faatuina ni tapulaa, ia malilie i nai mea ua maua, ma aloese mai faafitauli o le manao “tele, tele, tele lava” ua matuai faateleina le faigata. Ua faigata ona fai atu e leai pe a fai mai i ni mea se tele ae o loo mafai lava ona e fai atu ioe.

E tonu lava ia popolega o matua e uiga i le lumanai. E faigata ona fai atu e leai i ni mea se tele e faaaoga mo taaloga, o masini eletonika, ma lesona, lavalava, ma le auai i ni au taalo ma isi mea, pe afai e talitonu matua o le a tele atu le fesoasoani i a latou fanau ia alualu ai i luma i se lalolagi ua faateleina le faatautava. O talavou ua foliga mai ua manao tele, o se tasi o mafuaaga o le tele naua o mea e latou te tosina atu i ai o latou mata; ua fuafuaina e le Aoga Faafomai mo Tamaiti o Amerika e faapea e silia ma le 40,000 faasalalauga faapisinisi e vaai i ai le tamaitiiti Amerika i se tausaga.

Ua toalaiti lava ia matua o loo fai atu i a latou fanau e fai ni feau i o latou aiga aua ua latou manatu ua lofituina tele i latou i le tele o mea e fai faalauaitele ma aoga. Ae o fanau e le o tuuina atu i ai ni tiutetauave e matuai pagatia lava i latou i le le aoaoina lea faapea e mafai e tagata uma taitoatasi ona auauna atu i isi ma maua ai se uiga o le olaga e sili atu nai lo lo latou lava fiafia.

I totonu o lana tusi My Grand-father’s Blessings, o loo faamatala ai e Dr. Rachel Remen le avea ma ni uo lelei a se ulugalii ma le la atalii laitiiti, o Kenny. Afai e asiasi atu o ia, e nofo o ia i lalo faatasi ma Kenny ma taaalo i ana taavale meataalo e lua. O nisi taimi e ia te ia le taavale e leai se apaapa ae ia Kenny le isi e leai se faitotoa ae o nisi taimi e felafoai ai. E fiafia tele o ia i na taavale!

Ina ua ofo atu e se pamu penisini se taavale meataalo mo taavale uma e utu faatumu ai, sa ia faatauanauina lana aufaigaluega e o atu uma i le pamu lena ma ao mai taavale. Ina ua ia mauaina uma ituaiga taavale eseese, sa ia afifiina loa i totonu o se pusa lapoa ma ave loa ia Kenny. Sa ia faamoemoe o le a ia le faatiga i ona matua o e sa ola tau faasoasoa. Sa tatala ma le naunau e Kenny le pusa ma auauai mai i fafo ia taavale. Sa faatumulia ai lalo o faamalama ma na oo ifo lava i luga o le fola. Oka se tele! Mulimuli ane, a o asiasi atu i le aiga, na matauina ai e Rachel sa na o le sioa mai lava o Kenny i le faamalama. Ina ua ia fesili atu ia Kenny, “O le a le mea ua tupu? E te le fiafia i au taavale fou?” sa ia tilotilo ifo i lalo ma le matamuli. “Ou te faamalie atu Rachel, ou te matea ua ou leiloa pe faapefea ona ou alofa i ni taavale meataalo se tele.” (Tagai i le “Owning” [2000], 60–61.)

Ua tatou faalogo uma lava i tamaiti, a uma ona latou tatala le tele o meaalofa o le Kerisimasi po o aso fanau, e faapea mai, “Pe le o i ai nisi mea se tele?” Faatasi ai ma luitau uma ua tuuina mai i lenei ‘tupulaga manao tele,” o loo tumau ai pea le fautuaga faalelagi ina ia aoao a tatou fanau ia “malamalama le mataupu o le salamo, ma le faatuatua ia Keriso, le Atalii o le Atua soifua, ma le papatisoga ma le meaalofa o le Agaga Paia … ia tatalo ma ia savavali tonu i luma o le Alii, … [ma ia] tausia le aso Sapati ia paia” (MFF 68:25, 28–29).

O le uiga o le tele ma le itiiti e masani lava ona le manino. Ua i ai taimi ua avea le mea itiiti ma mea telē, ma taimi ua avea le mea telē ma mea itiiti. Mo se faataitaiga, o le itiiti o le manao i meatotino e mafai ai ona tele ai le taimi e faatasia ai le aiga. O le tele o mea faaletino e tuuina atu i fanau e mafai ona itiiti ai lo latou malamalama i tulaga e faataua i le olaga.

O nisi vaega o le olaga e mafai ona matuā faaleleia atili e le manatu lea faapea e sili atu lava le tele. O le viiga paia “Faapaia Mai A’u” (Viiga, nu. 70) e faamanatu mai ai ia i tatou ia uiga mama agavaa e tele tatou te taulai atu i ai. Na faamatalaina e Iesu lava Ia le mea e moomia ina ia “paia tele ai, e pei o le Faaola.” Na Ia fetalai, “Ou te loto ina ia atoatoa ona lelei la outou amio, e pei o a’u ma lo outou Tama i le lagi e atoatoa ona lelei” (3 Nifae 12:48).

O le agamalu e taua i le faateleina ona avea e pei o Keriso. A aunoa ma lea uiga e le mafai e se tasi ona atiina ae isi uiga taua. Na faailoa mai e Mamona, “E le talia e le Atua se tasi, na o e agamalu ma loto maualalo” (Moronae 7:44). O le mauaina o le agamalu o se faagasologa. Ua poloaiina i tatou ina ia “ave [le] satauro i aso fai soo” (Luka 9:23). O lo tatou siiina o le satauro e le tatau ona avea ma se mea e fai faavaitaimi. O le tele o le agamalu e le faaliliuina faapea o le tele o le vaivai, ae o le “faailoga lea o le tagata ua i ai uiga o le agalelei ma le filemu, e atagia ai le malosi, toamalie, ma se lagona lelei atoatoa o le tagata ia te ia lava ma le lotopulea” (Neal A. Maxwell, “Meekly Drenched in Destiny,” in Brigham Young University 1982–83 Fireside and Devotional Speeches [1983], 2). O le tele o le agamalu o le a tuu atu ai i tatou ina ia aoaoina e le Agaga.

O uiga mama o loo faailoa mai i totonu o le “Faapaia Mai A’u” e mafai ona tuufaatasia i ni vaega se tele. O nisi o sini faaletagata, e pei o le faapaia tele mai a’u; tele tauiviga i totonu; tele le faatuatua, tele le faafetai, tele le mama; ia fetaui lelei mo le malo; ia tele le faamoemoega i le tatalo; ma tele le faalagolago i le Alii. O isi e faaautu i faigata. E aofia ai le tele o le onosai i puapuaga, agamalu i faigata, vivii mo le faaolaina, malosi e faatoilalo ai, saoloto mai le pisipisia o le lalolagi, ma le naunau mo le aiga. O isi vaega uma e faalatalata atu ai i tatou i lo tatou Faaola: ia tele le manatu i Lana tausiga; ia tele le mitamita i Lona mamalu; ia tele le faamoemoe i Lana afioga; ia tele le olioli i Lana galuega; ia tele loimata mo Ona faanoanoaga; tele tiga i Lona faanoanoa; tele le faamanuiaina ma le paia; ma ia tele ona avea e pei o le Faaola lava Ia. O le tele o nei uiga, e sili atu ona lelei. O le itiiti e le manaomia.

E toatele ua olioli i Lana galuega e ala i le aoaoina atu o le talalelei a Iesu Keriso ma lona Toefuataiga ma molimau atu i le Faaola, o Lona soifuaga, galuega, ma le Togiola.

Na manatunatu se faifeautalai taitai itu pe aisea na faamanuiaina ai Elder Parker, o le sa tau faaiuiuina lana misiona, e ui i lona le mafaia ona taulotoina ia lesona. Ina ia malamalama i ai, o lea sa la faatasi ai ma Elder Parker i le tuuina atu o se lesona. Sa matuai le faatulagaina lelei le lesona a Elder Parker o lea e oo atu ai i le faaiuga o le lesona aloaia, ua fenumiai le taitai itu ma manatu atonu o le lagona foi lea o loo i le aiga na aoaoina.

O le taimi lea, sa punou atu ai i luma ia Elder Parker ma tuu lona lima i luga o le lima o le tama. Sa ia pulatoa atu i ona mata, ma ta’u atu ia te ia le tele o lona alofa ia te ia ma lona aiga, ona tuuina atu lea o se tasi o molimau sili ona faamaualalo ma malosi ua faatoa faalogo i ai le taitai itu. E uma ane, e le gata i faifeautalai ma tagata uma o le aiga ua matuai tafe ifo loimata i o latou alafau. O le mea na sosoo ai na aoaoina e Elder Parker le tama i le auala e tatalo ai. Sa latou tootutuli uma a o tatalo le tama ina ia mafai ona latou maua ni a latou lava molimau ma faafetai atu i le Tama Faalelagi mo le alofa tele ua ia lagonaina. Na papatisoina le aiga atoa i le lua vaiaso mulimuli ane.

Mulimuli ane, sa faatoese atu Elder Parker i le taitai itu mo lona leiloaina lelei o lesona. Na ia faapea atu sa tauivi lava o ia ma le taulotoina o lesona e ui ina tele itula na te faaaluina i aso taitasi i ai. Fai mai o ia e tootuli o ia e tatalo a o le’i aoaoina aiga taitasi ma ole atu i le Tama Faalelagi ina ia faamanuia o ia, ina ia mafai e tagata ona lagona lona alofa faapea ma le Agaga pe a tuu atu lana molimau ma iloa na aoaoina atu ia i latou le upumoni (tagai i le Allan K. Burgess ma Max H. Molgard, “That Is the Worst Lesson I’ve Ever Heard!” in Sunshine for the Latter-day Saint Soul [1998]. 181–83).

O a mea e mafai ona tatou aoaoina mai lenei tala faigofie? E te manatu na lagonaina e Elder Parker le moomia ona tauivi tele ina ia aoaoina ia lesona? Pe mafai ona oo se malamalama ia Elder Parker i le moomia ona tuuina atu ia tatalo ma se faamoemoega? E te manatu na faatumulia ana tatalo i ni aioiga ina ia maua le malosi tele e faatoilaloina ai? Faamata o le le mafai ona taulotoina ia lesona na oo mai ai le onosai i puapuaga ma le agamalu i faigata? Pe na ia faaalia le faatuatua tele i le Faaola ma faalagolago i le Alii? E mautinoa lava sa ia faia!

I le fitu vaiaso ua tuanai, e fa ni afa tetele na afea le talafatai o Florida faapea ma le Faga o Mekisiko. O le tele o malo o le Atu Keripiane na matuai aafia lava i ni faatafunaga maoae. Ua matuai utiuti lava meaai, lavalava, ma fale. O le tele o otaota ma lapisi ua punitia ai auala ma lotoa. O galuega tetele i le lotoifale ua faatafunaina po o le moomia ona toe faaleleia.

O le vaiaso na te’a nei sa ou i ai i Tallahassee, Florida ma taliaina le tele o faamatalaga o le talisapaia ma le faafetai mo fesoasoaniga na tuuina atu e le Ekalesia i le taimi o nei faalavelave. O Kovana Bush o Florida, ma le Lutena Kovana o Toni Jennings, ma paaga e pei o le Koluse Mumu ma le Salvation Army, faatasi ai ma tagata faigaluega a le malo ma le setete mo faalavelave faafuasei sa faaalia uma le faafetai faamaoni lea ou te momoliina atu ia te outou o e na faatinoina ia galuega e faamamāina ai le avega o le toe faamamaina ma le toe faatulagaina faapea ma outou o e na foai atu i le Tupe mo Fesoasoaniga Alofa a le Ekalesia. Faafetai tele lava. Ou te talitonu ua tele atu le olioli ua outou maua ma tele atu ona aoga i Lana galuega.

I le mulimuli ai lava i le faatulagaga lea o faaiuga o vaiaso na muamua atu i isi nofoaga, e silia ma le luaafe volenitia mai saute i sasae o le Iunaite Setete na potopoto atu i Pensacola, Florida i le faaiuga o le vaiaso na te’a nei e fesoasoani atu ina ua mavae le aafiaga o le afa o Ivan. Sa fofola o latou fala moe i luga o fola o falelotu, totonu o isi falesa, ma fale o tagata o le ekalesia. Sa latou tali atu i le fiaafe o galuega e faatonuina ai ina ia fesoasoani atu i soo se mea e manaomia ai. Sa auai faifeautalai i le ufiufiina o le taualuga o se Falesa Metotisi i tapoleni lanumoana. O tagata faigaluega mo Faalavelave Faafuasei na muamua valaau e o atu i le faalavelave ae tuua o latou aiga, na faailoa mai le faafetai ona o le tofia atu o le Au Paia o Aso e Gata Ai e fesoasoani i o latou aiga a o toesea i latou.

O nei mea uma na faia i le taimi lava e tasi na lalata atu ai le afa o Jeanne i talafatai ina ua mavae le tele o le faatafunaga na faia i Haiti ma isi vaega o le Atu Keripiane. E toe faafetai atu ai ia te outou o e na tuuina atu a outou meatotino ma o outou lima e faamama ai le avega a le toatele. Ou te faamalo atu ia te outou mo le naunau ina ia faateleina ona faamanuiaina ma faapaiaina ma avea atili ai e pei o le Faaola. O le faaiuga o lenei vaiaso, e 2,500 o le a fesoasoani i taunuuga o le afa o Jeanne.

I le talanoaina o lo tatou faananau mo nisi mea se tele eseese, ou te le o fautua atu ai ina ia tatou faaaoga ia Scrooge e avea ma faataitaiga mo le avea ma matua lelei. Ou te fautua atu, e taua mo aiga ma tagata taitoatasi ina ia matuai faamalosia le saili ia faateleina ia uiga taua lea e i luga atu o lenei olaga faaletino. O se faalatalata atu ma le agaga tatalo o le ki lea i le lelei ona taulimaina o le ola ai i se lalolagi ua manuia i mea tau tupe ma le fausia o uiga faaletagata lea e maua mai le faatalitali, fetufaai, faasao, galue malosi, ma le faamalieina i mea ua tatou maua. Ia faamanuiaina i tatou i le manao ma le mana e malamalama ai i le taimi e leai ai se aoga o le tele, ma le taimi e sili ona lelei ai le tele. I le suafa paia o Iesu Keriso, amene.