Faatuatua ma Ki

I se falelotu e mamao mai le Aai o Sate Leki, i se nofoaga e seasea oo i ai se uso o le Korama a le Toasefululua, sa agai mai ai se tamā ia te au. Sa ta’ita’i mai le lima o lona atalii laitiiti. Ina ua taunuu mai ia te au, sa tilotilo ifo i le tamaitiiti, ma ta’u lona igoa, ma fai atu i ai, a o luelue mai lona ulu ia te au, “O se Aposetolo lea.” Sa mafai ona ou iloa i le leo o le tamā, sa faamoemoe o ia o le a sili atu se lagona o lona atalii, nai lo le na o se faapea na feiloai i se tagata faaaloalogia. Sa faamoemoe o ia, o le a lagonaina e lona atalii se talitonuga maumaututu o loo i ai ki o le perisitua i le fogaeleele i le Ekalesia a le Alii. O le a saga manaomia pea lava pea e lona atalii lena talitonuga maumaututu. O le a ia manaomia pe a ia tatalaina se tusi mai se perofeta i le lumanai na te le’i vaai lava i ai, e valaau ai o ia mo se misiona. O le a ia manaomia pe a ia tanuina se i si o le fanau po o se toalua. O le a ia manaomia mo le lototele e mulimuli ai i faatonuga e auauna atu. O le a ia manaomia mo le faamafanafanaga e maua mai i le faatuatuaina o se mana faamau lea e fusia ai e faavavau.

O le a valaaulia e faifeautalai ia tagata sailiili e feiloai ma se epikopo po o se peresitene o le paranesi i le taimi nei ma le faamoemoe lava lena e tasi. Latou te faamoemoe o le a lagonaina e tagata sailiili ni mea e sili atu i le na ona latou feiloai atu i se alii lelei, po o se alii maoae. O le a latou tatalo ia lagona e tagata sailiili se tautinoga maumaututu o loo umia e lenei tagata faatauvaa ia ki o le perisitua i le Ekalesia a le Alii. O le a manaomia e tagata sailiili lena tautinoga maumaututu pe a latou o ifo i le vai o le papatisoga. O le a latou manaomia pe a totogi a latou sefuluai. O le a latou manaomia lena tautinoga maumaututu pe a musuia le epikopo e tuuina atu ia i latou se tofiga. O le a latou manaomia pe a latou vaai atu ia te ia o pulefaamalumalu i le sauniga faamanatuga ma pe a ia faafaileleina i latou e ala i le aoaoina atu o le talalelei.

Ma o lea la, o faifeautalai ma tamā, ma i tatou uma o loo auauna atu mo isi i le Ekalesia moni, e mananao e fesoasoani atu ia i latou tatou te alolofa i ai e maua se molimau mausali o ki o le perisitua o loo umia e auauna a le Alii i Lana Ekalesia. Ou te tautala atu i le aso, e uunaia i latou uma o loo galulue e uunaia ma faamalolosia lena molimau.

O le a fesoasoani e faailoa nisi o mea. Muamua, o le Atua e maumaututu ma matamau i le ofoina mai o faamanuiaga o le mana o le perisitua i Ana fanau. Lona lua, e tatau i Ana fanau ona filifili mo i latou lava ina ia agavaa mo na faamanuiaga ma taliaina. Ma le lona tolu, o Satani, o le fili o le amiotonu, na mai lava i le amataga ona taumafai e faaumatia le faatuatua e tatau ai, mo le mauaina o faamanuiaga e mafai ona maua i le mana o le perisitua.

Sa ou aoao e uiga i na mea moni mai se faiaoga atamai, i le toeitiiti atoa le 25 tausaga talu ai. Sa ou lauga i se fale faafiafia anamua i Efeso. Sa faatumulia le malae i le lasusulu, i le mea sa tu ai le Aposetolo o Paulo ma tala’i atu. O la’u autu o Paulo, le Aposetolo na tofia e le Atua.

O le aofia o le faitau selau o le Au Paia. Sa faanonofo i atu nofoa maa ia sa saofafa’i ai tagata Efeso i le silia ma le afe tausaga talu ai. Sa i ai faatasi iina ni Aposetolo soifua, o Elder Mark E. Petersen ma Elder James E. Faust.

E mafai ona outou vaai faalemafaufau i ai, sa ou saunia ma le faaeteete. Sa ou faitauina Galuega a Aposetolo ma Tusi a Paulo faapea foi tusi a ona uso a Aposetolo. Sa ou faitau ma mafaufau loloto i Tusi a Paulo i le nuu i Efeso.

Sa ou taumafai i le mea sili e faamamalu ai Paulo ma lona tofi. Ina ua mae’a le lauga, sa toatele nisi sa fai maia ni upu alofa. Sa agalelei foi Aposetolo soifua e toalua sa i ai, i a la saunoaga. Peitai mulimuli ane, sa aveina a’u e Elder Faust ma sa soisoi ma faapea mai ia te a’u i si ona leo malu, “Manaia le lauga. Peitai, ua galo ia te oe le mea e sili ona taua sa tatau ona e ta’u maia.”

Sa ou fesili pe o le a. I ni vaiaso mulimuli ane sa finagalo malie o ia e ta’u mai ia te au. O lana tali sa aoaoina ai a’u mai lava i lena taimi.

Fai mai a ia, sa tatau ona ou ta’u atu i tagata, pe ana faapea e maua e le Au Paia sa faalogologo ia Paulo se molimau i le taua ma le mana o ki sa ia umia, semanu e le aveeseina mai ia Aposetolo mai le lalolagi.

O le mea lena na ou toe faitauina ai le tusi a Paulo i Efeso. Sa ou iloa ai sa manao Paulo ia lagonaina e tagata le taua o le sosooga o ki o le perisitua mai le Alii ma auala mai i Ana Aposetolo ia i latou, o tagata o le Ekalesia a le Alii. Sa taumafai Paulo e fausia se molimau e uiga i na ki.

Sa molimau atu Paulo i Efeso o Keriso sa tu i le ao o Lana Ekalesia. Ma sa ia aoao atu sa fausia e le Faaloa Lana Ekalesia i luga o se faavae o aposetolo ma perofeta, o loo umia ki uma o le perisitua

E ui lava i le manino ma le malosi o ana aoaoga, ae sa iloa lelei lava e Paulo o le a oo mai se liliuese. Sa ia iloa o le a aveeseina mai aposetolo ma perofeta mai le lalolagi. Ma sa ia iloaina foi, e i ai se taimi i le lumanai, o le a toefuatai mai ai. Sa ia tusia e uiga i lena taimi i le nuu o Efeso, ma ta’ua mea o le a faia e le Alii: “Ina ia na faaopoopoina ia Keriso i le sauniga i le faaatoaga o tausaga, o i latou uma lava o i le lagi, atoa ma i latou o i le lalolagi; o ia lava ua matou maua ai.”¹

Sa tulimata’i e Paulo le galuega a le Perofeta o Iosefa Samita pe a toe tatala mai le lagi. Sa tupu. Sa oo mai Ioane le Papatiso ma faaee i luga o tagata soifua le Perisitua o Arona ma ki o le galuega a agelu, ma le papatisoga i le faatofuina mo le faamagaloga o agasala.

Sa toe foi mai aposetolo anamua ma perofeta ma faaee mai i luga o Iosefa ia ki sa latou umia i le olaga nei. Sa faauuina tagata soifua i le tofi paia faaaposetolo ia Fepuari o le 1835. Sa tuuina mai ki o le perisitua i Aposetolo e Toasefululua i le taufaaiuiuga o Mati i le 1844.

Sa silafia e le Perofeta o Iosefa Samita ua lalata mai lona maliu. Sa ia silafia e le tatau ma o le a le toe leiloloa lava ia ki taua o le perisitua ma le tofi faaaposetolo.

Sa tuua e se tasi o Aposetolo, o Uilifoti Uitilafi, le faamatalaga lenei i le mea na tupu i Navu a o saunoa le Perofeta i le Toasefululua:

“I lena taimi sa tulai le Perofeta o Iosefa ma saunoa mai ia te i matou: ‘Uso e, ou te manao lava ia ou ola e vaai i le fausiaina o lenei malumalu. O le a le mafai ona ou ola e vaai atu i ai, ae o le a outou vaai i ai. Ua ou faamauina i o outou luga ia ki uma o le malo o le Atua. Ua ou faamauina i o outou luga ia ki uma, o mana, o mataupu faavae ua faaalia mai e le Atua o le lagi ia te au. O lea la, po o fea lava ou te alu i ai po o le a se mea ou te faia, o le a faalagolago le taunuuga o le Ekalesia ia te outou.’” ²

O perofeta uma na mulimuli mai ia Iosefa, e amata mai ia Polika Iaga e oo mai ia Peresitene Hinckley, sa umia ma faaaoga na ki ma sa umia foi le tofi paia faaaposetolo.

Peitai e faapei lava foi o le taimi o Paulo, o le mana o na ki o le perisitua mo i tatou e manaomia ai lo tatou faatuatua. E tatau ona tatou iloa e ala i musumusuga, o ki o le perisitua e umia e i latou o loo taitai ma tautuaina i tatou. E manaomia ai i lena tulaga le molimau a le Agaga.

Ma e faalagolago lena mea i la tatou molimau o Iesu o le Keriso, ma o loo soifua o Ia ma taitai Lana Ekalesia. E tatau foi ona tatou iloaina mo i tatou lava, na toefuatai mai e le Alii Lana Ekalesia ma ki o le perisitua e ala mai i le Perofeta o Iosefa Samita. Ma e tatau ona tatou maua se faamautinoaga e ala i le Agaga Paia, ma faafouina soo, o na ki sa faasolo mai e aunoa ma se faalavelaveina i le perofeta soifua, ma ua faamanuiaina e le Alii ma taitai Lona nuu e ala mai i le faasologa mai o ki o le perisitua seia tau mai i peresitene o siteki ma itu ma oo mai ai lava i epikopo ma peresitene o paranesi ia i tatou, pe o fea lava tatou te i ai, tusa lava pe o le a le mamao mai le perofeta ma Aposetolo.

E le faigofie lena faamautinoaga i nei aso. E le’i faigofie foi i le taimi o Paulo. E faigata pea lava ona iloa faaletonu faaletagata i auauna faamaonia a le Atua. Atonu o Paulo o se tagata faatauvaa tele i le toatele o tagata. O le natura fiafia o Iosefa Samita, sa manatu ai nisi e le talafeagai ma o latou faamoemoega i se perofea a le Atua.

O le a galue pea lava Satani i le Au Paia a le Atua, e faavaivaia lo latou faatuatua i ki o le perisitua. O se tasi auala na te faia ai, o lona faasinosinomia lea o faaletonu o i latou o loo umiaina. Na te mafaia i lena faiga ona faavaivaia la tatou molimau ma motusia mai ai i tatou mai le sootaga o ki lea e noatia ai e le Alii i tatou ia te ia, ma mafai ai ona aveina atu i tatou ma o tatou aiga ia te Ia ma lo tatou Tama Faalelagi.

Sa mafai e Satani ona faavaivaia le molimau a alii sa latou vaai faatasi ma Iosefa Samita o tatala mai le lagi ma faalogo i leo o agelu. Sa le lava le faamaoniga a o latou mata ma taliga faaletino, ina ua le mafai ona latou toe lagonaina le molimau o loo i ai pea lava ki o le perisitua ia Iosefa.

E manino lava le lapataiga mo i tatou. Afai tatou te vaavaai mo sese o tagata, o le a tatou mauaina pea lava. Pe a tatou tulimata’i atu i le sailia o faaletonu o i latou o loo umia ki o le perisitua, ua tatou tuuina i tatou lava i se tulaga matautia. Pe a tatou talanoa pe tusi atu i isi e uiga i na faaletonu, ua tatou tuuina isi i tulaga matautia.

O loo tatou ola i se lalolagi e foliga mai o le sailiili i masei o isi, o se taaloga faamaligi toto sili lea ua i ai. Ua leva ona avea ma faavae o faiga kemupeni faaupu fai. O le autu o le tele o polokalama o televise i le lalolagi atoa. O loo alumia ai nusipepa. Soo se taimi lava tatou te feiloai ai ma se tagata, o le tatou uluai taga lava, e toetoe lava ina a faia ma le le mafaufau i ai, o le tilotilo lea pe i ai ni faaletonu.

Ina ia tausisia i tatou lava ia malolosi i le Ekalesia a le Alii, e mafai ma e tatau ona koleni o tatou mata ia iloa i le mana o le Alii le galuega a i latou ua Ia tofia. E tatau ona tatou agavaa mo le mafutaga a le Agaga Paia. Ma e tatau ona tatou tatalo mo le Agaga Paia ina ia fesoasoani ia tatou iloa o alii o loo taitaiina i tatou, o loo umia lenei mana. Mo a’u lava ia, o na tatalo e tele lava ina tali mai pe a ou galue punouai atoatoa a’u lava ia i le galuega a le Alii.

Sa alia’e mai lena mana ina ua mavae se faalavelave matautia. Sa pa se vaisimā i Idaho i se aso o Iuni. Sa tafe malosi ifo le vai i nuu na i lalo ifo. E faitau afe tagata, e toatele lava i le Au Paia o Aso e Gata Ai, sa sosola ese mai o latou aiga e saili ni malutaga.

Sa ou iai iina a o feagai tagata ma le galuega matautia o le toe faaleleia. Sa ou vaai i le peresitene o le siteki o faapotopoto ana epikopo e taitai tagata. Sa tele ni aso e le o maua ni fesootaiga ma tagata i fafo atu o le eria na faatamaia. Sa ou i ai i le fonotaga a taitai o le lotoifale ina ua taunuu mai se faatonu o le ofisa mo faalavelave o le malo.

Sa taumafai o ia e taitai le fonotaga. Ma le malosi tele sa amata ona ia tusia uma i lalo mea sa fai mai o ia e tatau ona fai. A o ia faitau leotele mea taitasi, sa fai atu lemu i ai le peresitene o le siteki, lea sa nofo i ona tafatafa, “Ua uma ona matou faia le mea lena.” Ina ua mavae ni nai minute, sa le toe tautala le alii ofisa mai le malo ae nofo i lalo. Sa ia faalogologo filemu a o tauaaoina e le peresitene o le siteki lipoti mai epikopo ma tuuina atu faatonuga.

I le fonotaga i le aso na sosoo ai, sa vave ona taunuu mai le faatonu mo faalavelave a le malo. Sa nofo o ia i tua. Sa amata e le peresitene o le siteki le fonotaga. Sa ia tauaaoina nisi lipoti ma tuuina atu faatonuga. Ina ua mavae ni nai minute, sa faapea atu le alii ofisa o le malo, lea sa sau ma le pule atoa ma punaoa a le latou ofisa tele, “Peresitene Ricks, o le a se mea e te finagalo matou te faia?”

Sa ia iloa iina le mana. Sa ou vaaia ai ma isi mea. Sa ou iloa le faamaoniga o ki ma le faatuatua e tatalaina ai lo latou mana.

Sa toe tupu foi ina ua toe taunuu mai se alii ma lona toalua i le taulaga ina ua mavae le pa o le vaisimā. E le’i o i lo la’ua fale. Sa muamua o e su’e lo latou epikopo. Sa ufitia o ia i le palapala, o loo taitai lana au paia i le faamamaina o fale. Sa fesili le ulugalii pe o le a se mea e manao le epikopo la te faia.

Sa la galulue loa lava. I se taimi mulimuli ane, sa o atu i la’ua mo ni nai minute se’i siaki lo la’ua fale. Ua leai se mea. Ona la toe foi ai lea ma galulue i soo se mea sa faatonu atu e le epikopo e fesoasoani ai. Sa la iloa le mea e o i ai, e maua ai le faatonuga mai le Alii mo galuega auauna atu i Lana Ekalesia.

O iina na ou iloaina ai le auala e avea ai siteki o Siona ma nofoaga o le saogalemu. E avea ai e faapei o se aiga tele, e fusia faatasi, ma fetausia’i. E oo mai i si faatuatua faatauvaa lava.

O le faatuatua e papatisoina ai i latou ma maua le Agaga Paia. A o faaauau pea ona latou tausia poloaiga, ona tumau ai lava lea o lena meaalofa. E mafai ona latou iloa mea faaleagaga. E oo ina faigofie atu ona vaaia le mana o le Atua o galue e ala atu i tagata e lē taualoa e tofia e le Atua e auauna atu ma taitai i latou. E faamaluluina loto. E avea tagata ese ma tagatanuu i le malo o le Alii, ma fusia faatasi ai i noataga o le alofa.

E le tumau lena tulaga fiafia e aunoa ma le faafouina pea lava pea o le faatuatua. O le a faamalolo le epikopo tatou te alolofa i ai, ma e faapena foi le peresitene o le siteki. O Aposetolo sa tatou mulimuli ai i le faatuatua o le a toe aveina atu i le Atua o lē sa tofia i latou.

O na suiga faifai pea e oo mai ai se avanoa sili. E mafai ona tatou galulue ina ia agavaa ai mo faaaliga lea e mafai ai ona tatou iloa, o ki na faasolo mai e le Atua mai le tasi tagata i le isi. E mafai ona tatou saili ina ia saga maua pea lava pea lena aafiaga. Ma e tatau lava, ina ia mafai ai ona maua faamanuiaga o loo i le Atua mo i tatou, ma e finagalo ina ia tatou faasafua atu i isi.

Atonu e le maoae le tali i au tatalo e pei ona vaaia ai e nisi ia Polika Iaga, a o saunoa, sa foliga o ia i le Perofeta o Iosefa na tagatavaleina. Ae e mafai lava ona mautinoa. Ma o lena faamautinoaga faaleagaga e oo mai ai le filemu ma le mana. O le a e toe iloaina ai foi, o le Ekalesia moni ola lenei a le Alii, ma o loo taitaiina e Ia e ala i Ana auauna faauuina, ma e manatu tele mai o Ia ia te i tatou.

Afai e lava i tatou e faaaogaina lena faatuatua ma maua na faamautinoaga, o le a sii a’e e le Atua i latou o loo ta’ita’iina i tatou ma faamanuiaina ai o tatou olaga ma o tatou aiga. O le a avea i tatou e faapei ona manao ai Paulo mo i latou sa ia auauna atu i ai: “ua atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea.”³

Ou te molimau atu ou te iloa o Iesu Keriso o lo tatou Faaola, ma o loo soifua o Ia. Ou te iloa o Ia o le maa tulimanu, lea o loo tu ai Lana Ekalesia lenei. I le suafa o Iesu Keriso, amene.