Aumaia o le Filemu ma le Faamalologa i Lou Agaga

O iinei i le laumua o le Ekalesia, e tele a matou fonotaga faakomiti e faia ai, ma o le amataga o lenei tausaga i se tasi o na fonotaga, sa faafofoga ma le naunautai ai Elder Neal A. Maxwell i se saunoaga e faatatau i le atiina ae o taitai i le lotoifale. I le taufaaiuiuga o le fonotaga, na fesili atu ai Elder Maxwell, “Pe i ai nisi mea e sili atu e mafai ona tatou faia ina ia fesoasoani ai i epikopo ina ia aumaia le filemu ma le faamalologa i le Au Paia?” Sa ou fia iloa atili i lona popolega; ma i se taimi puupuu a o lumanai lona maliu faapea ma le taaligoligoa o lona ofisa, sa saunoa auiliili ai Elder Maxwell i aoaoga faavae e o faatasi ma le mauaina o le filemu ma le faamalologa. Na ia tuuina mai le faamalosiauga lea o le a ou faasoaina atu ai nei manatu i tagata o le Ekalesia.

Sa avea ma e tumau pea ona avea Elder Maxwell ma se faataitaiga matagofie o le alofa e le faapito. O lona popole mo isi e matuai faamaoni lava, aemaise lava mo i latou e i ai ni tiga faaletino ma lagona. Soo se tasi e asiasi atu i lona ofisa e alu ese mai ma se tautinoga loloto ina ia avea faapei o Keriso. Na ia faatuina se faatulagaga mo i tatou uma. Sa ia alofa i le Faaola. Sa avea o ia ma se Aposetolo ma se soo moni. Ua matou misia lava o ia.

Na ia tuuina mai ni manatu matagofie i le auala e oo mai ai le filemu ma le faamalologa atoatoa lea e na o le liua atoa o le agaga e ala mai ai. Na ia faamatalaina le aoaoina o ia i tausaga na muamua atu e Peresitene Marion G. Romney e faatatau i laasaga e tau atu i le liuaina atoatoa. Na ia sii maia mai se lauga o le konafesi aoao i le 1963, lea na sii mai ai e Peresitene Romney ia afioga a le Faaola ia Peteru: “A ua ou faatoga mo oe, ina ne’i mavae lou faatuatua; a o oe foi, pe a liua mai oe, ona e faamalosi ai lea i ou uso” (Luka 22:32). Na saunoa Peresitene Romney: “E ono foliga mai o le auai i le Ekalesia ma le liuaina e le o se mea e tasi. O le liuaina, e pei ona tatou faaaogaina ai lea faaupuga, ma le i ai o se molimau e le o se mea e tasi. O se molimau e oo mai pe a tuuina atu e le Agaga Paia i se tagata sa sailia ma le faamaoni se molimau o le upumoni. O se molimau faaootia loto e faamalosia ai le faatuatua; e uunaia ai le salamo ma le usiusitai i poloaiga. O le liuaina i le isi itu, o le fua lea, po o le taui mo le salamo ma le usiusitai” (i le Conference Report, Oct. 1963, 24).

O le liuaina e le masani ona oo mai uma i le taimi e tasi, e ui o loo tuu mai e tusitusiga paia ia i tatou ni tala maoae. E auauai mai, sei iloga lava e oo le tagata i se tulaga e avea ai lona loto ma se tagata fou. O le “toe fanauina” o le faaupuga faatusipaia. O le suia lea o o tatou manatu ma o tatou lagona (tagai i le Conference Report, Oke. 1963, 23–24).

I totonu o le Tusi a Mamona tatou te faitau ai ia Enosa, sa matelaina lona agaga i le fia iloa o aoaoga a lona tama e uiga i le ola e faavavau. Ina ua mavae le aso atoa ma le po o tatalo e le aunoa, sa oo atu se leo ia te ia ua faapea atu, “Enosa e, ua faamagaloina au agasala, e faamanuiaina oe.” Na tusia e Enosa, “O a’u o Enosa, ua ou iloa e le mafai ona pepelo le Atua; o le mea lea ua tafiesea ai la’u agasala” (Enosa 1:5–6).

O loo ia i tatou le tala i le perofeta o Alema le Itiiti i le faamatalaina atu o lona liuaina i lona atalii o Helamana. Na ia faamatalaina lona iloaina o ana agasala ma mea sese ua tuanai, ma ta’uta’u atu lona fouvale i le Atua. Ona ia manatuaina lea o lona tama, o Alema, o muai ta’u atu ia te ia le afio mai o le toatasi, o Iesu Keriso, o le Alo o le Atua. O le a afio mai Iesu e togiola mo agasala a le lalolagi. Ou te faitauina: “Ina o taofi atu e lo’u loto i lenei manatu, sa ou tagi ifo i lo’u loto: Iesu e, le Alo o le Atua, ia e alofa mai ia te au, o loo i le au oona, ma ua noanoatia i filifili o le oti faavavau.” Na oo Alema i le tiga faavavau ma le tausalaina ae na iloa e mafai ona solaese mai e ala lea i le Togiola. Na faaauau le faamatalaga a Alema: “O lenei foi, faauta, ina o o’u manatu i lenei mea, ua le toe mafai ona ou manatua o’u tiga; ioe, ua ou le toe atuatuvale i le manatu i a’u agasala. Ioe, ua maeu lava le olioli, ma le malamalama ofoofogia na a’u vaaia; ioe, sa faatumuina lo’u agaga i le olioli matua tele, e tusa ma le tele o lo’u tiga!” (tagai Alema 36:12–20; faamamafa faaopoopo).

Na iloa e Alema ua faamaloloina lona agaga e ala i le iloa lea o le a afio mai Iesu ma aveeseina uma ana agasala. Ina ua amata ona faamaloloina lona agaga, sa ia maua le filemu i lona loto. Sa lofituina Alema i aafiaga o lenei liuaina lea na ia faamatala soo atu ia Helamana ia lagona na oo i ai: “Ioe, ou te fai atu ia te oe lo’u atalii e, sa le mafai se tasi mea ona silisili ma oona tusa ma o’u tiga. Ioe, ou te toe fai atu foi ia te oe, lo’u atalii e, o le tasi mea, e le mafai ona silisili ma malie se tasi mea e tusa ma lo’u olioli” (Alema 36:21, faamamafa faaopoopo). Sa ia aoaoina lona atalii i se mamanu o le filemu ma le olioli tumau, e pei ona faia e le tama o Enosa. O loo i ai se mamanu i i o tama o loo aoaoina fanau e uiga i le Togiola ma le ola faavavau. O se mamanu lea mo tama uma i o tatou aso.

O nai manatu nei e aoga tele na oo mai i le mafaufau e uiga i le liuaina o Alema:

1. E pei o Enosa, sa matuai manino lona malamalama ma le faanoanoa mo agasala ua mavae, lea sa faatiga ai i le Atua.

2. E pei o Enosa, na ia manatuaina aoaoga a lona tama—o le folafolaga o le togiola mo agasala, e ala ia Iesu Keriso.

3. E pei o Enosa, sa ia aioi atu lava o ia ma le faatauanau mo lona agaga.

4. Na ia iloaina le vavega o le Togiola i le tulaga na le mafai ai ona ia manatuaina ia tiga mai ana agasala po o le ta’usalaina. Sa mae’a lelei le faamaloloina o lona agaga. O se aafiaga faamamaina atoatoa, mo le mafaufau ma le loto. Na suia e le olioli le tiga. Na avea o ia ma se tagata fou, na toe fanauina i la le Agaga. Ma e pei foi o Enosa, na vave ona ia liliu atu e auauna i le Alii ma ona uso a tagata.

Pe o le a faia ea e le Alii mo i tatou mea na Ia faia mo Enosa ma Alema?

Na faamatalaina faapea e C. S. Lewis: “E faavavau le silasila mai o le [Atua] mo i tatou taitoatasi. E le feutagai mai o ia ma i tatou i ni vaega. O lo oulua va ma Ia e pei lava na o oe le tagata ua Ia foafoaina. Ina ua maliu Keriso, na Ia maliu mo outou taitoatasi e pei lava sa na o oe le alii [po o le tamaitai] i le lalolagi” (Mere Christianity [1943], 131).

Pe o i ai ea ni tala faatusipaia o lenei liuaina o loo tupu i le Au Paia? E tele ni a tatou faataitaiga. O le tala i le Au Paia i le taimi o le Tupu o Peniamina o le a faamatalaina ai. Tatou te faitau ai i le tali atu a le Au Paia ina ua mavae ona faalogologo i lo latou tupu ma le perofeta o aoao atu poloaiga ma le Togiola a Iesu Keriso:

“Ma ua latou alalaga ma le leo e tasi, ua faapea mai: Ioe, ua matou talitonu i upu uma ua e fetalai mai ia te i matou, ma lea foi, ua matou iloa ua moni ma ua tonu lava, ona o le Agaga o le Atua pule aoao, na ia faaliliuina a matou amio ma o matou loto, ua le toe ai so matou manatu e fai amio leaga, a e fia fai pea lava le amio lelei… .

“Ua matou fia osi le feagaiga ma lo tatou Atua e fai lona finagalo, ma usiusitai i ana poloaiga i mea uma na te poloaiina ai i matou, i o matou aso uma ua totoe” (Mosaea 5:2, 5; faamamafa faaopoopo).

O le a outou maitauina ai o a latou upu e matuai tutusa lava ma tautinoga tou te faia i le feagaiga o le papatisoga (tagai i le MFF 20:37).

O faamanuiaga ma folafolaga o le liuaina e maua e ala i le feagaiga o le papatisoga ma le faamauga ma sauniga uma o le malumalu ma le perisitua. O le faaauau pea o le salamo ma le usiusitai ma le faamaoni i le tausiga o feagaiga na osia, o le a ola ma atiina ae ai fua o le liuaina i le olaga o se tasi. A o faasolo ina matua le liuaina ma lagolagoina pea i galuega a le Agaga, o le a oo mai le filemu ma le faamalologa i le agaga.

Sa fesili se tasi ia Peresitene Romney pe mafai faapefea e se tasi ona iloa pe ua ia liua. Sa tali Peresitene Romney: “E mafai ona ia mautinoa ua liua pe a faamaloloina lona agaga e le mana o le Agaga Paia. Afai e tupu lenei mea, o le a ia iloaina e ala i ona lagona, aua o le a oo ia te ia le lagona na oo i le nuu o Peniamina ina ua latou maua le faamagaloga o agasala. O loo faapea mai le tusi, ‘… ua oo mai le Agaga o le Atua ia te i latou, ma ua faatumuina i latou i le olioli, ona ua maua le faamagaloina o a latou agasala, ma ua filemu i o latou lotofuatiaifo, …’ (Mosaea 4:3)”, (i le Conference Report, Oke. 1963, 25).

Na faamatalaina e Peteru le mea e tupu pe a atoatoa le liua: E “tofusia i tatou i le amio Atua” (2 Peteru 1:4; tagai foi i fuaiupu 1–3, 5–9).

O lenei aafiaga o le liuaina atoatoa tatou te iloa moni ai e i tatou lava ma lagonaina le uiga ma le silisiliese o le Atua. O le ala lea e le gata e avea ai i tatou ma auauna a le Alii ae o ni Ana uo. I le Au Paia i popofou o le vaitaimi o le toefuataiga, na faamatalaina ai e le Alii Lona sootaga ma i latou: “O lenei foi ou te fai atu ia te outou, a’u uo e, aua e afua atu nei lava ona ta’ua outou o uo” (MFF 84:77).

I le konafesi aoao o Oketopa na mavae atu, na aoaoina ai i tatou e Elder Jeffrey R. Holland ma tuuina mai ia i tatou ona lagona e tusa ai ma le silisiliese ma le uiga o le Atua. (tagai “O Le Silisiliese o le Atua,” Liahona, Nov. 2003, 70–73). Na ia saunoa i le taua e faavavau o le iloaina o le Atua le Tama ma Lona Alo, o Iesu Keriso. Na ia sii maia le fuaiupu ua masani ai mai le tatalo faapuluvaga a le Faaola: “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea” (Ioane 17:3).

Na ia sii maia foi le saunoaga e le masani tele i ai a le Perofeta o Iosefa Samita: “O le uluai mataupu faavae o le talalelei ia iloa ma le mautinoa le uiga o le Atua.” “Ou te manao ia te outou uma ia iloa o Ia” (History of the Church, 6:305).

O le iloaina o le Atua ma avea ma Ana uo e o mai faatasi ma le gasologa o le liuaina. Sa maua e Enosa. Na maua e le nuu o le Tupu o Peniamina. Sa maua foi e Alema. E avanoa ia i latou uma o e o le a salamo ma usiusitai i poloaiga. O lenei liuaina o se aafiaga e patino i le tagata lava ia ma e matuai malosi lava. E faatatau i sootaga. E aofia ai le fafaguina o le Agaga o Keriso, lea o loo i totonu o alii ma tamaitai uma (tagai MFF 84:45–46; 88:11). E aofia ai le faaosofiaina i totonu o i tatou o lagona o le Agaga Paia, e taitai atu ai i tatou i se molimau o le upumoni. E aofia ai le mauaina o le Agaga Paia pe a maea ona taliaina le feagaiga o le papatisoga. O le meaalofa o le Agaga Paia e taitaiina i tatou ma faamafanafanaina i tatou i lo tatou avea ai ma soo, e faalatalata atu ai i tatou i le Faaola. Ae o le Faaola, i le tali mai, o lo tatou Fautua lea i le Tama, ma o lo tatou faamaoni o le a Ia aumaia ai i tatou i le Tama ina ia avea ma suli faatasi ma Ia (tagai i le Ioane 14:6; Roma 8:17; MFF 45:3–5).

Ua ia te i tatou ni oa o aoaoga ofoofogia ma mafaufauga na tuua mo i tatou e perofeta paia. E moni lava o i latou o ni avefeau a le Atua o loo taitaiina Ana fanau i le faaolataga ma le ola e faavavau.

O a latou molimau ua faamalolosia ai o tatou faatuatua. Faamolemole ia faafofoga i a latou tuleiga ma molimau. O le a latou fesoasoani e taitai outou i le filemu ma le faamalologa o o outou agaga.

O la’u lava molimau patino e moni le Agaga o le Alii ma e le mafai ona faaseseina. Ou te molimau atu, e mafai ona outou iloa le Tama ma le Alo, ma e alolofa ia te outou. Ua ou lagonaina lena alofa e ala i le mana o le Agaga. Ou te molimau atu ai i nei upumoni i le suafa paia o Iesu Keriso, amene.