O Tamaitai i o Tatou Olaga

O’u uso e ma tuafafine pele, i le amataga o la’u lauga, ia outou lava papale mai, ae se’i avatu ni nai o’u mafaufauga patino. I le ono masina talu ai, i le faaiuga o la tatou konafesi, sa ou ta’ua ai le gasegase tigaina o la’u soa faapelepele o le 67 tausaga. Sa maliu o ia i le lua aso mulimuli ane ai. O le aso 6 o Aperila, o se aso taua tele mo i tatou uma o lenei Ekalesia. Ou te fia faafetai atu faalaua’itele i fomai galulue mae’ae’a ma tamaitai tausima’i maoa’e sa tausia o ia i lona gasegase faai’u.

Sa matou i ai ma la’u fanau i ona tafatafa a o se’e malie atu o ia i le faavavau. A o o’u uuina lona lima, ma vaavaai atu i le fāifāi malie atu o le ola mai ona tamatama’ilima, ou te tautino atu, sa matua lofituina lava a’u i le ootia. Ae ou te lei faaipoipo atu ia te ia, o ia lava le teine sa ou moemiti i ai, ua ou faaaogaina upu o se pese sa lauiloa i lena taimi. Sa avea o ia ma a’u soa faapelepele i le silia ma le lua vaetolu o se senituri, ma sa tutusa i ma’ua i luma o le Alii, o le mea moni e sili mamao atu ia te au. A o lenei ua ou toeaina, ae ua toe avea foi o ia ma teine ou te moemiti i ai.

I le taimi lava na maliu ai, sa sasaa mai ai le alofa mai vaega eseese o le lalolagi. Sa anoanoai teufugalaau matagofie sa auina mai. Sa tetele ni tupe sa ofoina atu i lona igoa i le Tupe Faaagaga mo A’oga ma lona tulaga faa-akatemia i le Iunivesite a Polika Iaga. Sa faitau fiaselau ni tusi. Ua ia i matou ni pusa e tutumu lelei i tusi mai le toatele matou te iloa ma le anoanoai o nisi matou te le iloa. O loo ta’u uma mai ai lo latou faamemelo mo ia ma le faavauvau ma le alofa mo i matou ua ia tuua.

Matou te faanoanoa ona e le’i mafai ona matou tali taitasi atu i le lasi o nei alofa faaalia. Ma o lea o le a ou faaaogaina ai lenei sauniga e faafetai atu ai ia te outou uma i le tele o lo outou agalelei. Faafetai, faafetai tele lava, ma faamolemole faamagalo i matou i lo matou lē tali atu. Ua matou le gafataulimaina le galuega, ae o lo outou alofa faaalia ua faamafanafanaina ai i matou i lo matou taimi faanoanoa.

Ou te faafetai i le mafai ona ou fai atu faapea, i le taimi umi sa ma mafuta ai, ou te le manatua se ma misa tugā. Sa i ai lava nai eseesega iti i nisi taimi, ioe, ae e leai se mea matuia. Ou te talitonu sa manaia la ma’ua mafutaga e pei lava foi ona i ai isi.

Ou te iloa e toatele outou ua faapena foi ona faamanuiaina, ma ou te matua’i faamalo atu, aua a uma mea uma, e leai lava se sootaga e sili ona ’oa nai lo le mafutaga a le tane ma le ava, ma e leai foi se mea e sili ona tumu i avanoa mo le lelei po o le leaga nai lo aafiaga e faavavau o le faaipoipoga.

Ou te vaaia pea lava pea na taunuuga. Ua ou vaai i le matagofie ma le matautia. Ma o lea ua ou filifili ai e fai atu ni nai upu i le asō e uiga i tamaitai i o tatou olaga.

O le a ou amata atu i le Foafoaga o le lalolagi.

Ua tatou faitau i le tusi a Kenese ma le tusi a Mose e uiga i lena galuega tele, tupito, ma le ofoofogia. O le Silisili Ese o le tusiata o lena foafoaga. I lalo o Lana taitaiga sa faataunuuina ai e Lona Alo Pele, le Ieova Silisili, o lē sa fesoasoani i ai Mekaeli, le agelu sili.

Ona uluai faia ai lea o le lagi ma le lalolagi, sosoo ai ma le tuueseeseina o le malamalama mai le pouliuli. Ona aveesea ai lea o vai mai le laueleele. Ona sosoo ai lea ma laau, ma manu. Sa sosoo mai ai ma le palealii o le foafoaga, o le tagata lea. O loo tusia i le Kenese e faapea “Ua silasila atu le Atua i mea uma ua na faia, faauta foi, ua matua lelei lava” (Kenese 1:31).

Ae e le’i mae’a ai le galuega.

“A o Atamu e lei maua se fesoasoani e tatau ma ia.

“Ua faamoegaseina Atamu e Ieova le Atua, i le ua moe lava; ona toina lea e ia le tasi ona ivi asoaso, ma ua faasoo ane le aano e sui a’i;

“O le ivi asoaso foi na toina e Ieova le Atua ia Atamu ua na fai a’i le fafine, ona ia aumaia lea o ia ia Atamu.

“Ona faapea ai lea o Atamu, O le ivi lava lenei o o’u ivi, ma le aano o o’u aano; e ta’ua o ia o le Fafine” (Kenese 2:20–23).

Ona avea ai lea o Eva ma foafoaga faai’u, le taualuga o le galuega ofoofogia uma sa faia muamua.

E ui lava ina sa matua faatauaina le foafoaga o le fafine, ae e matua tele taimi i augatupulaga e faasino ai [le fafine] i se tulaga maualalo. E tauemuina. E ta’ufaatauvaaina. E faapologaina. E sauaina. Ae o nisi o tagata e aupito maoae o tusitusiga paia, o tamaitai o le amiosa’o, faamanuiaina, ma le faatuatua.

Ua tatou malamalama ia Eseta, Naomi, ma Ruta o le Feagaiga Tuai. Ua tatou iloa Sarai o le Tusi a Mamona. Ua tatou malamalama ia Maria, le tina o ia o le Togiola o le lalolagi. O ia, e pei ona filifilia e le Atua lea sa faamatala e Nifae, “O le taupou, ua sili ona aulelei ma lalelei i nisi taupou uma” (tagai 1 Nifae 11:15).

O ia o se tamaitai sa aveina le tamaitiiti o Iesu i Aikupito ina ia laveaiina lona soifua mai le toasa o Herota. O ia o se tamaitai, sa faafaileleina o Ia i Lona tamaitiiti ma Lona talavou. Sa tu o ia i Ona luma ina ua faatautau Lona tino ua momomo i luga o le satauro i le mauga o Kalevaria. I Lona mafatiaga, sa Ia fetalai atu ai ia te ia, “Sena e, faauta o lau tama!” Ma sa tepa atu i Lona soo ma se augani na te tausi ia te ia ma Ia fetalai atu, “Faauta i lou tina!” (tagai Ioane 19:26–27).

I le vaavaai atu i Lona soifuaga, sa i ai Maria ma Mareta, ma Maria le Makatala. O ia, o se tamaitai na alu atu i le tuugamau i lena uluai taeao o le Eseta. Ma o ia, o se tamaitai, sa Ia mua’i faaali i ai o se Alii toetu. Aisea la e ui lava ina tuu e Iesu le fafine i se tulaga faaeaea, ae ua matua toatele naua alii o ē fai mai e talitonu i Lona suafa, ae latou te le o faia?

I Lana fuafuaga mamalu, ina ua faatoa foafoa e le Atua le tagata, sa ia foafoaina se eseesega o itupa. O le faatinoina mamalu o lea eseesega, o loo maua i le faaipoipoga. O le tasi e faaatoatoaina ai le isi. E pei ona fai mai Paulo, “E leai se tane pe a le o i ai le fafine, e leai foi se fafine pe a le o i ai le tane, i le Alii” (1 Korinito 11:11).

E leai se isi faatulagaga e talafeagai ma faamoemoega paia o le Silisiliese. O le tane ma le fafine o Ana foafoaga. O lo la’ua eseesega o Lana mamanu lea. O le atoaga o a la’ua sootaga ma matafaioi, e taua tele i Ona faamoemoega. E le atoa le tasi e aunoa ma le isi.

Ou te iloa e toatele naua o tatou tamaitai maoae e le o maua le avanoa e faaipoipo ai. Peitai o i latou foi, e i ai so latou sao tele. Latou te auauna atu ma le faamaoni ma le atamamai i le Ekalesia. Latou te faiaoga i faalapotopotoga. Latou te tutu foi i tofi ta’ita’i.

Sa ou molimauina se mea malie i le tasi aso. Sa i ai le Au Pulega Aoao i se fonotaga ma sa matou i ai faatasi ma le Au Peresitene o le Aualofa. O nei tamaitai atamamai sa tutu i le matou potu fono ma fetufaai mai ia i matou ia mataupu faavae o le uelefea, ma le fesoasoani atu ia i latou o ē pagatia. O o matou tulaga o ni ta’ita’i o lenei Ekalesia, sa lei faaitiitia i le mea sa latou faia. Sa faateleina ai lo matou agavaa e auauna atu ai.

E i ai nisi tane, e manatu ua sili a’e i latou nai lo tamaitai, ona o lo latou agaga faasausili. E foliga mai latou te le o iloa, semanu latou te lē i ai pe ana leai le tina sa fanauina i latou. A oo ina latou tala’i lo latou faafiasili, ua latou faamāina o ia. E i ai se faaupuga faapea, “E le mafai e le tane ona faata’uvalea le fafine e aunoa ma le pa’ū atu o ia lava i le ta’uvalea; e le mafai ona ia faaea ia te ia e aunoa ma lona faaeaina o ia lava i le taimi foi lea” (Alexander Walker, Elbert Hubbard’s ScrapBook [1923], 204).

E maeu le moni o lena mea. Ua tatou vaaia le fua oona o lena ta’uvalea o siomia ai i tatou. O le tatala o faaipoipoga o le tasi lea taunuuga. Ua lē motu lea mea mataga i lo tatou lalolagi. O le taunuuga lea o le lē faaaloalo o le tasi i lana paaga faaipoipo. E alia’e mai i le faatalalē, o le faitio, o le saua, ma le tuulafoa’i. O i tatou o i le Ekalesia, ua lē tuusaunoaina mai ai i tatou.

Sa tautino mai e Iesu, “O e ua faatasia e le Atua, aua ne’i faateaeseina e se tagata” (Mataio 19:6).

O le upu tane o loo faaaoga i lona tulaga kenera, peitai o le mea moni, e tele lava o tane o loo aumaia ai tulaga e oo atu ai ina tatala faaipoipoga.

Talu ai ua faitau selau faaipoipoga tatala sa taulimaina i le tele o tausaga, ua faamalieina a’u e faapea o le faaaogaina o se mataupu faavae patino o le a tele atu lona aoga nai lo isi mea uma e foia ai lenei faafitauli matuia.

Afai e faia e lē aunoa e tane uma ma ava uma soo se mea e mafai ai ona mautinoa le sologa lelei ma le fiafia o lana soa, o le a matua itiiti lava, pe afai e i ai, ni faaipoipoga e tatala. O le a le faalogoina lava se tauaimisa. O le a leai ni tuua’iga. O le a le oso se ita. Ae o le a suia e le alofa ma le popole [mo le isi] ia le saua ma le limavale.

Sa i ai se pese taatele sa matou usuina i le tele o tausaga ua mavae e faapea ona upu:

E maeu le moni o lena mea.

O tamaitai taitoatasi uma o se afafine o le Atua. E le mafai ona e faatausuai ia te ia e aunoa ma lou faatausuai i [le Atua]. Ou te aioi atu i tane o lenei Ekalesia, ina ia vaavaai atu ma faafailele le tulaga paia o loo i ai i a latou soa. Afai e oo i lena tulaga, o le a i ai le lotogatasi, le filemu, le tamaoaiga o le olaga faaleaiga, ma le alofa e faafaileleina ai.

Sa faamanatu mai e Peresitene MaKei ia i tatou e faapea “e leai se manuia [i le olaga] e mafai ona suitulaga i le toilalo o le aiga” (sii mai e J. E. McCulloch, Home: The Savior of Civilization [1924], 42; i le Conference Report, Ape. 1935, i. 116).

E faapena foi, le moni o le mea sa faamanatu mai e Peresitene Lee ia i tatou: “O le galuega [silisili] e tatau ona e faia, o totonu lava o papuipui o lou lava fale” (“Maintain Your Place as a Woman,” Ensign, Fep. 1972, 51).

O le vaifofo mo le tele o faafitauli i faaipoipoga e le maua i le tete’a. O loo taoto i totonu o le salamo ma le faamagalo atu, o le faaalia o le agalelei atu ma le popole mo le isi. E tatau ona maua i le faaaogaina o le Tulafono Faaauro.

O se vaaiga matagofie tele pe a uulima se alii talavou ma se tamaitai talavou i le fata faitaulaga i se feagaiga i luma o le Atua o le a taufai faamamalu ma alofa le tasi i le isi. Ae e maeu le nenefu o le ata pe a mavae ni nai masina, po o ni nai tausaga, ua i ai ni nai upu ma tala faatiga, o upu faasausili ma le maamaai, o leo ua siita’i, ma tuua’iga matuia.

E le tatau ona tupu, o’u uso e ma tuafafine pele e. E mafai ona tatou tutu i luga a’e o nei “mea vaivai ma le faatauvaa” i o tatou olaga (tagai Kalatia 4:9). E mafai ona tatou vaavaai ma ia iloa e le tasi le natura paia o le isi, lea e oo mai ia i tatou o ni fanau a lo tatou Tama i le Lagi. E mafai ona tatou ola faatasi i le mamanu faale-Atua o le faaipoipoga, ia faataunuuina ai mea tatou te gafatia, pe afai tatou te pulea i tatou lava ma aloese mai le taumafai e aoa’i a tatou soa.

O tamaitai i o tatou olaga, o tagata ua faaee i ai uiga patino, o ni uiga paia ia e mafua ai ona latou aapa atu i le agalelei faatasi ma le alofa ia i latou o loo siomia ai. E mafai ona tatou uuna’ia lena aapa atu pe afai tatou te tuu atu ia te i latou le avanoa e atiina ae ai a latou taleni ma o latou lava natura. Ina ua ma matutua sa fai mai lemu la’u soa faapelepele ia te au i se tasi afiafi, “Sa e tuu mai ia te au e le aunoa ni apaau ou te lele ai, ma sa ou alofa ai lava ia te oe.”

Sa ou iloa se alii ua maliu, ae na finau lava na te faia uma tonu mo lona toalua ma le fanau. Sa le mafai ona faatauina e i latou lava se pea seevae e aunoa ma lea alii. Sa le mafai ona latou aoao e ta piano. Sa le mafai ona latou galulue i le Ekalesia e aunoa ma lona maliega. Sa ou molimauina ai le taunuuga o lena uiga faaalia, ma o lena taunuuga e le lelei.

E le’i faatuai lava ona faamalo atu lo’u tama i lo’u tina. Sa iloa e i matou le fanau e alofa [lo’u tama] i ai ona o le auala na te taulimaina ai o ia. E faamatuu atu o ia i ona manao. Ma ou te matua faafetai lava ia te ia mo lana faataitaiga. E faapena foi ona manuia le toatele o outou.

E mafai lava ona ou faaauau pea, ae e le tatau. E na o lo’u manao lava e avatu se faamamafa i le upumoni maoae ma le tulaga ese, o i tatou uma lava o fanau a le Atua, o atalii ma afafine, uso ma tuafafine.

I le avea ai ma se tamā, pe itiiti ifo ea lo’u alofa i o’u afafine nai lo o’u atalii? E leai. Afai o ta’usalaina a’u i le le paleni, o lona uiga o a’u teine faapelepele. Ua ou fai atu lena mea aua a toeaina se tane, e sili pe a siosiomia o ia e ona afafine. E ese lo latou agalelei ma le mafaufau mai. Masalo e mafai ona ou faapea atu e lelei foi ma atamamai o’u atalii. O o’u afafine e popoto ma agalelei. Ma “ua taumasuasua la’u ipu” (Salamo 23:5) ona o lena.

O tamaitai o se vaega taua tele o le fuafuaga o le fiafia lea na faataatia e lo tatou Tama Faalelagi mo i tatou. E le mafai ona gaoioi lena fuafuaga e aunoa ma i latou.

Uso e, ua matua tele naua le le fiafia i le lalolagi. Ua matua tele naua le faanoanoa ma le lototiga. Ua matua tele naua loimata maligi o ava ma afafine mafatia. Ua matua tele naua le tuulafoa’i ma le saua ma le agaleaga.

Ua tuuina mai e le Atua ia i tatou le perisitua, ma e le mafai ona faaaoga lena perisitua “ua na o le tauanau atu, i le faapalepale, le agalelei ma le agamalu, ma le alofa faamaoni; i le agalelei, ma le malamalama mama, e matua faalauteleina ai le agaga e aunoa ma le pepelo, e aunoa foi ma le faaoleole” (MFF 121:41–42).

E maeu lo’u faafetai, e ao foi ona tatou taufai faafetai, mo tamaitai i o tatou olaga. Ia faamanuia i latou e le Atua. Ia liligi atu Lona alofa sili i o latou luga ma faapaleina i latou i le susulu ma le matagofie, o le alofa tunoa ma le faatuatua. Ma ia liligi mai foi Lona Agaga i o tatou luga i le avea ai ma tane ma taitai pea i tatou e tausia i latou i le faaaloalo, le loto faafetai, tuuina atu le faamalosiauga, malosi, faafailele, ma le alofa, aua o le fatu lea o le talalelei a lo tatou Togiola ma le Alii. Ou te tatalo atu ai ma le lotomaulalo, i le suafa paia o Iesu Keriso, amene.