“Fafaga i A’u Mamoe”

A o avea a’u ma se faifeautalai talavou sa talai i Mekisiko, sa valaauina a’u e avea ma se peresitene o se paranesi i se tamai nuu i le setete o Veracruz. Ina ua ma iloiloina ma la’u soa ia pepa faamaumau o si o matou tamai paranesi, na ma mauaina ai le pepa faamaumau o se uso ua uma ona faauuina i le tofi tiakono ae le’i auai atu lava i sauniga.

Sa ma fuafua ma te asiasi atu ia te ia. A o ma asiasi atu i ai, sa ma valaaulia o ia ina ia alu atu i sauniga ma auauna i ona tiute faaleperisitua. O le Aso Sa na sosoo ai na alu atu ai o ia, ae sa le’i lelei ona laei sa fai ma e le’i seleina lana soesa. O lea sa ma aoaoina ai o ia e uiga i le tumama pe a ia faatinoina na tiute paia faaleperisitua, lea e aofia ai le tufaina o le faamanatuga. Na matuai suia lava lona olaga a o ia auauna atu ma le faamaoni. O le paranesi lena na avea ma o’u tofiga mulimuli lava i le misiona ae ou te le’i toe foi i le fale. Ina ua ou sauni e tuua le paranesi, na sau lenei uso ma opo atu a’u i ona lima, fusi mau ia te au, ma sii au i luga ma faataamilo. A o faapea ona ia faia, sa maligi ifo loimata i ona alafau ma ia faapea mai, “Faafetai atu mo lou oo mai ma fesoasoani ia te au.”

O nisi taimi e sasi ai la tatou vaai ma seesee malie ese atu ai lava. O nisi taimi e tiga ai o tatou lagona pe tula’i mai ai foi nisi faafitauli. E tutusa uma lava le mea e iu i ai ma tatou le mauaina ai faamanuiaga. O le faamaualuga, masalosalo, pepelo, lotovaivai ma le tele o ituaiga agasala e mafai ona aveeseina e ala i se suiga i o tatou loto ma mulimuli i le ala ua faaali mai e le Faaola ia i tatou. Ua Ia fetalai mai, “ia iloa a’u, ma faalogo i a’u upu; savali i le agamalu o lo’u Agaga, ma o le a e maua le filemu ia te a’u” (MFF 19:23.) Ua uma ona totogi e le Faaola lo tatou tau. E alofa o Ia ia i tatou uma taitoatasi ma aapa atu ia i latou uma o e o le a omai ma mulimuli ia te Ia.

O loo mumu pei se afi le faanaunauga mo le lelei, o i le ta’ele o o tatou loto taitoatasi. Afai e fafagaina pea lena mumu i upumoni e faavavau o le talalelei ma le molimau a le Agaga, o le a tali mai ma talalī malosi ma musaesae seia oo lava ina tau atu i le atoatoaga o le upumoni. E tatau ona faaolaina pea le mumu e ala i le alofa ma le tausi faapelepele i ai, ona sosoo ai lea ma le fafagaina pea e le aunoa. E pei lava o le faitogalaau o loo tausia ni fugalaau mananaia. O le tausia faapelepele ma le fafagaina i taimi uma e maua ai ni taunuuga ofoofogia o le fuga taufuifui matagofie mai, ia e fiafia ai i latou uma o e vaai atu i ai.

O le faamagalo atu o se vaega autu foi lea o lo tatou toe foi atu i le fiafia i le malo o lo tatou Tama. E i ai nisi taimi tatou te tiga ai pe sese ai foi, ma e mafai ona avea lea ma puniala lea e mafai ona aveeseina ai i tatou mai la tatou sini mo le faavavau, o le toe foi atu lea i le afioaga o lo tatou Tama Faalelagi. Na aoao mai e le Faaola ia i tatou le faatulagaga mo le faamagalo atu e pei ona sa Ia aoao mai le Tatalo a le Alii. Na Ia fetalai, “Ma ia e faamagalo ia te i matou i a matou agasala, e pei o i matou foi ona matou faamagaloina atu i e ua agaleaga mai ia te i matou” (Mataio 6:12.) E mafai ona tatou iloa mai ai i lea tulaga, ina ia faamagaloina i tatou, e ao ia i tatou ona faamagalo atu i isi. E mafai ona faigata i nisi taimi lenei mea pe a oo ina loloto tele ni manu’a, ma umi se taimi o tuu.

Ae peitai, i nei aso e gata ai na aoao mai ai e le Faaola lenei mataupu faavae i ni upu sili atu ona manino. “Sa sailia e o’u soo e fai pona o le tasi i le tasi i aso anamua, a e le faamagalo atu le tasi i le tasi i o latou loto; ma ona o lenei mea leaga na puapuagatia ma aoaiina tiga ai i latou.

“O le mea lea, ou te fai atu ia te outou, e tatau ona outou faamagalo atu le tasi i le tasi aua o le le faamagalo atu i lona uso i ana solitulafono ua ta’usalaina i luma o le Alii; aua e i ai pea ia te ia le agasala sili ona mamafa.

“O a’u, le Alii, e faamagalo atu i e ou te loto ia faamagaloina, a o outou e ao ina outou faamagalo atu i tagata uma” (MFF 64:8–10.) Afai tatou te mulimuli i lenei fautuaga o le a fesoasoani ia i tatou e faatoilaloina ia faigata sili ona malolosi.

Afai tatou te faamagalo atu ma faagalo ia mea sa matua mamafatu i o tatou loto, ma aveese ai i tatou mai le ala, ua faapena ona aveeseina ai se avega mamafa mai o tatou agaga ma ua tatou saoloto ai—saoloto e agai i luma ma alualu i luma i la tatou sailiga o le talalelei a Iesu Keriso, faatasi ma se faateleina o le alofa i o tatou loto. O le a faamanuiaina i tatou i le faateleina o le maelega mo le olaga ma o le a faamamaina o tatou loto. O le a puna a’e se malosiaga faaleagaga e uunaia ai i tatou i luma i le olioli ma le fiafia. O faafitauli ua tuanai o le a lafoai ese e pei o ni lavalava masaesae tuai. “O lenei foi, ou te fai atu ia te outou, ua valaau mai le leoleo mamoe lelei ia te outou; afai foi tou te faalogo i lona leo, na te aumaia outou i lana lafu, e fai foi outou mana mamoe …” (Alema 5:60)

E moomia le lototele ina ia toe foi mai ai pe afai ua tatou o ese mai le ala a le Faaola. Ou te folafola atu ia te outou afai tou te faatinoina lena lototele ma uia ia laasaga e tatau ai, o le a outou vaaia ai le liligi mai o le alofa. E toatele i latou o e o le a olioli faatasi ma oe ma o le a faaloaloa atu lima o le faaaumea. O le a faafaileleina oe ma o le a faatumulia lou loto i le olioli.

“Ia manatua e taua tele le aoga o agaga i le silafaga a le Atua;

“Aua, faauta, o le Alii lo oulua Faaola na maliu tiga i le tino; o le mea lea na tigaina ai o ia i le tiga o tagata uma, ina ia salamo tagata uma lava ma o mai ia te ia. Faauta i le silisili o lona olioli i le agaga ua salamo!” (MFF 18: 10–11, 13.)

O i tatou uma o uso ma tuafafine, o fanau a lo tatou Tama Faalelagi. E tatau ona tatou aapa atu ia i latou o e ua faagaloina le ala ona o nisi o mafuaaga. Matou te alolofa ia te outou ma valaaulia outou ina ia omai i le laoai ma tofusia faatasi i le taumafataga ua saunia e le Alii mo lo outou olioli ma le fiafia. O le a outou iloaina le alofa o lo tatou Tama Faalelagi a o outou o mai ma loto ua naunau, usiusitai ma saunia e tofo ma auauna atu. Na te silafia outou, Na te silafia o outou manaoga, ma mea o le a outou feagai i le lumanai. E atoatoa Lona malamalama i lagona, puapuaga, faigata o i tatou taitoatasi. Talu ai ona o lena, faatasi ai ma le Togiola e le i’u a Lona Alo o Iesu Keriso, o le a mafai ai ona outou faafetaiaia ia luitau uma e oo atu ia te outou i la outou faigamalaga iinei i lenei olaga.

Ua tofu i tatou uma ma se tiutetauave tele ua uma ona tuu mai e le Faaola i luga o o tatou tauau. Na Ia fetalai mai, “Fafaga i a’u mamoe” (Ioane 21:17). E aofia ai iina le sailia o i latou e le o faatasi ma i tatou ma le faalauteleina atu o lo tatou alofa ma le faaaumea ia i latou. Sa tatou tutu faatasi ma i latou i lo tatou uluai tofi. Sa latou osia ia feagaiga paia e ala i le papatisoga, ma atonu foi ua latou osi feagaiga i le malumalu. Ua latou manaomia nei la tatou fesoasoani.

Ou te tatalo ina ia mafai e i tatou taitoatasi ona mafaufau e uiga i o tatou aiga, ma a tatou uo ma e masani, o e e le o olioli i le atoatoaga o faamanuiaga o le talalelei. Mafaufau ia i latou o e o loo i ai lou tiutetauave ona o lou valaauga. Fesili ifo ia te oe lava, “O le a se mea e mafai ona ou faia?” O le a taitaiina oe e le Tama Faalelagi a o e sailia Lana fesoasoani. Ona e alu lea ma saili i latou ma valaaulia i latou ina ia toe foi mai ma olioli i le faaaumeaina atoatoa ma le savali matagofie o le talalelei toefuataiina a Iesu Keriso. Ia latou lagonaina lou alofa ma faalogo i lau molimau. Fesoasoani ia i latou ia toe manatua lagona na latou iloa muamua o upumoni faavavau lea o le a faatumulia ai o latou olaga i le olioli ma le fiafia.

Ia tatou naunau ia ina ia tatou aofia ai i le faapotopotoina mai o Ana mamoe o e ua se ese, ina ia mafai ona saogalemu i latou i totonu o le lafu. O Ia, “Le malosi i faaola,” (2 Nifae 31:19) o le Leoleo Mamoe Lelei ma e alofa o Ia i Ana mamoe. Ou te molimau atu ai i le suafa o Iesu Keriso, amene.