Tuleiga Faaiu

Ua tatou molimauina foi se isi konafesi matagofie. Oka se ofoofogia o nei sauniga. E maeu lava faamoemoega e faataunuuina ai. Tatou te potopoto faatasi i se agaga tapua’i, faatasi ai ma se naunauta’i e aoao. Tatou te faafouina a tatou fegalegaleaiga o i tatou o ni uso o lenei aiga tele o le Au Paia o Aso e Gata ai o ē aumau i le tele o atunuu, e tautatala i gagana eseese, o ē o mai i aganuu eseese, e eseese foi foliga. Ma ua tatou iloa e tasi lava i tatou, o se atalii po o se afafine o lo tatou Tama i le Lagi.

I ni nai minute ona gaogao foi lea o lenei Nofoaga Autu maoae mo Konafesi i le Aai o Sate Leki. O le a mu itiiti moli ma loka faitotoa. O le a faapena foi le faitau afe o isi faleapitaga i le lalolagi atoa. O le a tatou toe taliu atu i o tatou aiga, ou te faamoemoe ua matua faamauoaina. Ua tatau ona malolosi o tatou faatuatua. Ua tatau foi ona malosi lo tatou naunau ia lelei atili. O vaega o o tatou olaga sa tatou lagona ua tatou vaivai ai, ou te faamoemoe ua oo mai se lototele fou i o tatou olaga. Afai ua tatou sē ese pe ua faalē fiafia i le talalelei, ou te faamoemoe ua tatou mauaina nei se agaga o le salamo. O mea sa tatou agaleaga ai, pe limavale foi ma manatu faapito, ou te faamoemoe ua tonu nei o le a tatou sui. Ou te faamoemoe o i latou uma o ē savavali i le faatuatua, o le a faamalolosia foi lena faatuatua.

O le aso o le Aso Gafua i Sisifo mamao. O taeao o le Aso Gafua lea i le Lalolagi i Sisifo ma Europa. O se taimi ua tatou atofaina mo afiafi faaleaiga. O le taimi lena, ou te faamoemoe o le a faapotopoto atu e tamā ma tina a latou fanau ma talanoa ai i ni mea sa latou faalogo ai i lenei konafesi. Ou te moomoo ma’imau e pe ana latou tusia i lalo nisi o nei mea, mafaufau i ai, ma manatuaina.

A o faaiuina, ou te fia faamanatu atu se isi mataupu. Ou te faamoemoe o le a tatou saga malaga soo atu i le maota o le Alii. E pei ona ou fai atu i le sauniga amata, ua matou faia mea uma matou te iloa fai, ina ia avatu ai malumalu ia latalata atu i o tatou tagata. O loo toatele pea nisi o loo tau malaga i mea mamao. Ou te faamoemoe o le a latou faaauau pea ona faia na taumafaiga seia oo i se taimi sa’o e fausia ai se malumalu i lo latou eria.

O le tele o o tatou malumalu e ono mafai ona pisi atu nai lo le mea o loo i ai nei. I lenei lalolagi pisapisaō, pisi, ma le faatautavā, o se matua’i faamanuiaga lava le i ai o se fale paia e mafai ona tatou maua ai le aafiaga faamamā o le Agaga o le Alii. E fetuleni mai e le aunoa ia i tatou elemene o le manatu faapito. E ao ona tatou faatoilaloina, ma e leai se isi auala e sili atu [e fai ai] nai lo le o i le maota o le Alii, ma galulue ai e fai ma sui o i latou ua fai i lagi folauga. Oka se ofoofogia o lenei mea. O le tele lava, tatou te le masani i tagata o loo tatou faia galuega mo i latou. Tatou te le faamoemoe atu e faafetai mai. Tatou te le mautinoa foi pe latou te taliaina mea ua tatou ofoina atu i ai. Peitai, tatou te o lava, ma o le faia o lena mea, tatou te oo atu ai i se tulaga maualuga o le faaleagaga e le mafai ona maua mai i se isi taumafaiga. E avea moni lava i tatou ma faaola i le Mauga o Siona. O le a le uiga o lena mea? E pei lava ona ofoina atu e lo tatou Togiola Lona soifua e ositaulaga e fai ma sui o tagata uma, ma o le faia o lena mea ua avea ai ma o tatou Faaola, e faapena foi ia i tatou, i se auala itiiti lava, pe a tatou faia galuega e sui ai i totonu o le malumalu, e avea [i tatou] ma faaola ia i latou o loo i le isi itu, o ē ua leai se mea latou te toe mafaia e alualu ai i luma, vagana ua i ai se mea e fai mo i latou e i latou o loo i le fogaeleele.

Ma o lea, o’u uso e ma tuafafine, ou te uunaia outou ina ia matua faaaoga lelei lenei avanoa matagofie. O le a faaatoatoa ai o outou natura. O le a fofo’e ese ai le atigi manatu faapito o loo nonofo ai le toatele o i tatou. O le a aumaia moni ai lava se aafiaga faamamā i o tatou olaga, ma avea ai i tatou ma ni alii ma ni tamaitai ua sili atu.

O malumalu uma, pe telē pe laitiiti, e i ai lona lava potu selesitila matagofie. Sa faia lenei potu e fai ma sui o le malo selesitila. Ina ua faia se faafouga tele o le Malumalu o Mesa Arizona i ni nai tausaga talu ai, ma tatalaina foi mo matamataga a tagata lautele, sa faamatala e se tasi tagata asiasi mai ia le potu selesitilia, o le potu malolo o le Atua. E mafai foi ona tatou mafaufau faapena i ai. O lo tatou faamanuiaga, e tulaga ese ma faapitoa, a’o laei papae, tatou te nonofo ai i le faaiuga o a tatou galuega i sauniga, i le potu selesitila matagofie ma mafaufau loloto ai, manatunatu, ma tatalo lē leoa ai.

O iina e mafai ai ona tatou mafaufau i le agalelei tele o le Alii mo i tatou.E mafai ona tatou mafaufau ai i le ata sili o le fiafia lea na faataatia e lo tatou Tama mo i tatou o Ana fanau. Ma o le mea la lea ou te uunaia ai outou uso e ma tuafafine, fai a o outou maua le malosi e fai ai. Ou te iloa a oo ina outou toeaiina ma loomatututa, o le a matua faigata lava ona tutu i luga ma nonofo i lalo. Ae e maeu lava lena faamanuiaga.

O lea, o’u uso e ma tuafafine, ou te toe ta’u atu lo’u alofa ia te outou. Ia sisila mai le lagi ia te outou. E moni lenei galuega. Aua lava ne’i outou masalosalo i ai. O loo soifua le Atua lo tatou Tama Faavavau. O Iesu o lo tatou Togiola, o lo tatou Alii, o le Alo o le Atua soifua. O Iosefa o se perofeta, o le Tusi a Mamona e paia lona amataga, ma o le galuega paia lenei a le Atua i le fogaeleele. Ou te tu’u atu la’u molimau, o lo’u alofa ma la’u faamanuiaga a o tatou taape atu i o tatou aiga. Ia faatasi le Atua ma outou seia tatou toe feiloai, o la’u tatalo lea ma le lotomaulalo, i le suafa paia o Iesu Keriso, amene.