O Le A ea Le Korama?

“Na musuia e le Agaga Paia ia faataatia le faavae lea, ma ia atiina ae ai i le atoatoa o le faatuatua paia.

“O lea ekalesia na faatulagaina ma faavaeina i le tausaga o lo outou Alii, e afe valu selau tolusefulu, i le masina lona fa, ma o le aso ono o le masina e taua o Aperila” (MFF 21:2–3).

O le aso lenei na potopoto faatasi ai Iosefa Samita, Oliva Kaotui, ma tagata o le aiga o Samita ma Uitimera, i le fale o Pita Uitimera matua, i Fayette, Seneca County, Niu Ioka. Ina ua maea se viiga talafeagai ma tatalo, ona faitauina atu ai lea i tagata sa potopoto ai faaaliga e faatatau i le faatulagaina o le Ekalesia. O nei faaaliga na tuuina mai ai le faatulagaga o le perisitua ma tiute o tofiga i le Ekalesia. O le mulimuli ai i lenei mamanu o loo fausia ai le faatulagaga o le Ekalesia i aso nei.

“E tusa ai ma poloaiga muamua, na valaauina ai e le Perofeta o Iosefa le usoga na auai, e fia iloa pe latou te taliaina o ia faapea ma Oliva Kaotui e avea ma o latou aoao i mea o le malo o le Atua; ma afai ua latou loto i ai, e tatau ona latou amataina loa le faatulagaina o le ekalesia e tusa ai ma le poloaiga a le Alii. Sa latou malilie autasi i lenei mea e ala i le palota” (B. H. Roberts, A Comprehensive History of the Church, 1:196).

Ma o lea ua tatou maua ai le mamanu na faatulagaina ai mai lava i le amataga. “O mea uma foi tau le ekalesia o le a faia i le finagalo au faatasi, i le tatalo malosi ma le faatuatua, aua tou te maua mea uma i le faatuatua” (MFF 26:2).

Na oo mai se lagona faapitoa i lou tino atoa, a o ou vaaia le siitia o aao i le sikuea e lagolagoina ai le au taitai o lenei Ekalesia. O le aso, na lagolagoina ai sui fou o le Korama a le Au Aposetolo e Toasefululua, e tagata o le Ekalesia iinei i le Nofoaga Autu mo Konafesi, ma e ala foi i televise, Initoneti ma satelite, i le toetoe lava o tulimanu uma o le lalolagi.

Elder Uchtdorf ma Elder Bednar, ua lagolagoina oulua e faatumuina avanoa na maua ona o le maliliu o Elder David B. Haight ma Elder Neal A. Maxwell. I le avea ai o se sui o le Korama a le Au Aposetolo e Toasefululua, ou te faafeiloai atu ia te oulua ma lou loto atoa a o avea oulua ma se vaega o lenei valaauga paia, e a i tatou. Ioe, ua tatou misia i le aso a tatou fegalegaleaiga ma Elder Haight ma Elder Maxwell. Sa nofo Elder Haight i o’u tafatafa i nei konafesi mo le 28 tausaga ua mavae. Na sosoo mai ia te ia Elder Maxwell mo ni tausaga. Ou te moomoo maumau pe ana ou maua le agaga naunautai o Elder Haight po o le oa i upu a Elder Maxwell, e faailoa atu ai ou lagona e uiga i lenei fegalegaleaiga umi sa ou maua faatasi ma nei Uso maoae e toalua. E tele naua mea sa la fesoasoani mai ai i lou olaga. Ou te matuai misia lava a laua fegalegaleaiga faifaipea!

O loo i ai sa tatou aganuu tamaoaiga o le galuega a le Toasefululua, a o tatou femalagaai i le lalolagi atoa i le folafolaina atu o le talalelei a Iesu Keriso. Mo se faataiaiga, o se Aso Sa, le aso 4 o Iuni o le 1837, lea na oo atu le Perofeta o Iosefa Samita ia Heber C. Kimball i totonu o le Malumalu o Katelani ma musumusu atu ia te ia e faapea, “Uso Heber, ua musumusu mai le Agaga o le Alii ia te au: ‘Tuu atu lau auauna o Heber e alu i Egelani ma folafola atu lau Talalelei, ma tatala le faitotoa o le faaolataga i lena malo’” (siitia mai le Orson F. Whitney, Life of Heber C. Kimball, [1945], 104).

O le tala i le tuua ai e Heber C. Kimball ma Polika Iaga o o la aiga mo Egelani, o loo faaalia moni ai le osigataulaga sa la naunau e faia mo tofiga na la maua. Fai mai le tala:

“Setema 14, [1839], na tuua e Peresitene Polika Iaga lona aiga i Montrose ina ia malaga atu mo le misiona i Egelani. Sa gasegase lava o ia, sa le mafai ona alu atu i le [Vaitafe o] Misisipi, o se mamao e 150 mita, e aunoa ma se fesoasoani. Ina ua uma ona ia sopoia le vaitafe, sa tietie i lana solofanua sa taitaiina e Israel Barlow e agai mai i lou fale, lea sa faaauau ai ona mai seia oo i le aso 18. Sa ia tuua lona toalua ma’i, faatasi ma se pepe sa na o le tolu vaiaso le matua, ma o lana fanau uma foi sa mamai ma sa le mafai ona tausia e le tasi le tasi. Na leai se tasi o i latou na mafai ona alu atu i le vaieli e asu mai le pakete vai, ma sa leai foi nisi lavalava mo i latou, aua na ave e tagata leaga i Misuri, na toetoe o mea uma sa ia te ia. O le aso 17, na maua ai e Tuafafine Mary Ann Young se tamaitiiti e aveina mai o ia i lana taavale solofanua i lou fale, ina ia mafai ona ia faamafanafana ia Uso Polika” (siitia mai i le Life of Heber C. Kimball, 265).

Sa mamai foi le aiga o Heber C. Kimball latou. Sa auina atu e Charles Hubbard lona atalii faatasi ma ana solofanua ma se taavale toso e fesoasoani ia i latou i le ala. Na tusia e Elder Kimball: “Na foliga mai o le a liusuavai vaega maototonu o lo’u tagata, i le tuua o lou aiga i se tulaga faapena e pei ona i ai, e tali pei ua tuuina atu i lima o le oti. Na foliga mai sa le mafai ona ou onosaia. Sa ou fai atu i le avetaavale solofanua e taofi, ma ou faapea atu ia Uso Polika, ‘Matua faigata lenei mea, a ea; ta tutu i luga ma alaga faamalosiau atu ia i latou.’ Sa ma tutu loa i luga ma talotalo atu o ma pulotu e faatolu i luga a’e o o ma ulu, ma alalaga: ‘Hurei, hurei mo Isaraelu.’” Na o mai Tuafafine Iaga ma Tuafafine Kimball i le faitotoa ma talotalo faatofa mai, lea sa maua ai e Uso Polika ma Uso Heber le mafanafana tele a o faaauau ai ona la o atu “e aunoa ma ni ato po o ni tupe” e agai atu i Enelagi. (Tagai Life of Heber C. Kimball, 265–66.)

O loo taua e le Lomifefiloi o le Tusi Paia, o le Aposetolo “o lona uiga ‘o se tasi ua auina atu.’ … O le valaauga o le avea ma se aposetolo e avea o se molimau faapitoa i le suafa o Iesu Keriso i le lalolagi atoa, e faapitoa lava i lona paia ma lona toetu mai i la le tino mai le maliu… . O ni alii se toasefululua ua i ai lenei valaauga maualuga e maua ai se aufono faaleautaitai i le galuega o le talaiga… . O le aso, o alii e toasefululua ua i ai lenei lava valaauga paia e tasi, ma faauuina, ua maua ai le Korama a le Au Aposetolo e Toasefululua i le Ekalesia a Iesu Keriso o le Au Paia o Aso e Gata Ai” (“Apostle,” 612).

O se aposetolo i aso nei, o loo faaauau pea [ona avea] o se “tasi e auina atu.” O tulaga tatou te fetaiai, e ese mai i tulaga na i ai le Usoga i le amataga, a o tatou faimalaga e faataunuu o tatou tofiga. O auala matou te femalagaai ai i tulimanu uma o le lalolagi e matuai eseese lava mai le vaitaimi o le Usoga anamua. E ui i lea, o loo tutusa lava o matou tofiga, e pei lava foi ona tuuina mai e le Faaola a o Ia faatonuina Lana Toasefululua na valaauina ina ia, “o atu e fai nuu uma lava ma soo, ma papatiso atu ia te i latou i le suafa o le Tama, ma le Atalii, ma le Agaga Paia: ia outou aoao atu ia te i latou ia tausi i mea uma ua ou fai atu ai ia te outou: faauta foi, ou te ia te outou i aso uma lava, e oo lava i le gataaga o le lalolagi” (Mataio 28:19–20).

Mo oulua Uso fou e toalua, e mafai ona ou folafola atu ia te oulua, o le a faapea ona i ai se malamalamaaga fou i le uiga o le i ai i se korama. Maumau pe ana mafai ona faailoa atu le lagona ma le faaaloalo o loo tatou lagonaina mo le tatou Aufono, i korama uma o le Ekalesia. Pe mafai lava ona faafofoga mai outou tiakono, aoao, ositaulaga, toeaina, ma faitaulaga sili mo se taimi, i le mea ou te talitonu o se tasi lea o faamanuiaga silisili e mafai ona maua e se tasi ona o le avea ma sē umiaina le perisitua? O lena faamanuiaga faapitoa o le i ai lea i se korama a le au perisitua.

Na tuuina mai e Peresitene Stephen L Richards, i le tele o tausaga ua mavae, nisi o fautuaga matagofie e uiga i le taitaiga o le Ekalesia. O lana faamatalaga e faapea:

“O le uiga e tulaga ese ai le taitaiga o lo tatou Ekalesia, o le taitaiina lea e ala i aufono… . Ua ou vaai i le poto, le poto o le Atua, i le foafoaina o aufono: e pulea ai Lona Malo. I le agaga o loo tatou galulue ai, e mafai e alii ona potopoto faatasi ma ni manatu e foliga mai e eseese, ma ni aafiaga e matuai eseese lava, ma i lalo o le faatautaiga a lena agaga, e ala i le fefautuaai faatasi, e mafai ai ona latou maua le autasi… . E leai sou masalosalo i le tuuina atu ia te outou o le faamautinoaga, afai o le a outou fefaasoaai i le aufono e pei ona tatau ai ona outou faia, o le a tuuina atu e le Atua ia te outou tali i faafitauli tou te fetaiai” (i le Conference Report, Oke. 1953, 86).

Ma o a ni faamanuiaga sili o le a tou maua mai le auai i se korama? E mai ia Stephen L Richards. Sa ia faapea mai, “O le korama e tolu lava mea e i ai: muamua, o se vasega; lona lua, o se faalapotopotoga; ma lona tolu, o se iunite o auaunaga” (i le Conference Report, Oke. 1938, 118).

Ou te vaaia le matuai faailoaina o lenei uiga tulaga ese i galuega a le Korama a le Au Aposetolo e Toasefululua. O i tatou o se vasega a o tatou suesue faatasi i mataupu faavae o le malo. E mafai ona e vaai faalemafaufau i le maua o se aafiaga faapitoa o le i ai lea i totonu o se fonotaga a le korama, ma ia aoaoina i mataupu faavae o le talalelei e Elder Ezra Taft Benson, Mark E. Petersen, LeGrand Richards, Howard W. Hunter, Bruce R. McConkie, David B. Haight, po o Neal A. Maxwell? O le a outou matauina e na o Uso lava ua maliliu sa ou taua ua faamaeaina a latou galuega i le fogaeleele, ina ia ou le faaituau i o tatou Aposetolo o loo i ai nei. E mafai foi ona fai mo oe lenei lava faamanuiaga e tasi, i totonu o a outou korama taitasi. O saunoaga a Aposetolo, ua tuanai ma le taimi nei, o loo i ai pea i totonu o tusitusiga paia, saunoaga i konafesi, mekasini a le Ekalesia, faigalotu, ma isi. O loo maua ia saunoaga ina ia aumaia ai le mana o le mataupu o le malo i totonu o tou vasega o korama. Ia fai lau korama o se vasega e faateleina ai lou malamalama e uiga i le talalelei a lo tatou Alii ma le Faaola.

I la matou Korama, ua i ai se matou faaleusoga faapitoa. Matou te i ai iina ina ia siitia, musuia, ma faamanuia e le tasi le isi i le agaga o lo matou valaauga. Afai ua mamafa se avega a se tasi, o loo i ai isi e toa 11 e naunau e fesoasoani e siitia ma tauamo lena avega. E i ai taimi matou te fiafia faatasi ai pe a faataunuuina se mea. Matou te fetagisi faatasi i taimi o le faanoanoa. Matou te le lagonaina le pei o loo tatou fetaiai toatasi ma se faafitauli! E i ai lava i taimi uma le fautuaga, lagolago, fesoasoani, ma le faamalosiauga a sui o le matou Korama.

Mai le tusi Priesthood and Church Government, o loo i ai se faamatalaga e uiga i le usoga, lea e tatau ona i ai i korama uma a le au perisitua. “O le Perisitua o le usoga sili lea, o loo fusia faatasi i tulafono faavavau o le o loo avea ma faavae o le Talalelei. O le lagona o le alofa faauso e tatau ona faatumulia ai le korama. E tatau lava ona avea ma mea muamua e popole i ai le korama,o le fesoasoani atu lea i uso uma o le korama, ua manaomia le fesoasoani i manaoga faaletino, faalemafaufau, po o le faaleagaga. O le agaga usoga e tatau ona avea ma malosi autu i fuafuaga ma gaoioiga uma e faia e le korama. Afai o le a maua lenei Agaga, i le atamai ma le tulaga faifaipea, o le a leai se isi faalapotopotoga o le a sili atu ona fiafia i ai tagata ua umia le Perisitua” (Rudger Clawson, foreword to A Guide for Quorums of the Melchizedek Priesthood, [1930], 3; siitia mai i le John A. Widtsoe, comp., Priesthood and Church Government [1939], 135). Matou te uunaia korama o au perisitua taitasi i totonu o le Ekalesia ina ia atiina ae lena usoga.

Ma le mea mulimuli, e pau le faamoemoega o le tatou Korama, ina ia fai se auaunaga. Atonu o o tatou lagona loloto e uiga i lenei matafaioi, e mafai ona auiliiliina i se tusi aloaia na tusia i le aso 26 o Oketopa, 1886, e Uilifoti Uitilafi o le na avea i lena taimi ma Peresitene o le Korama a le Au Aposetolo e Toasefululua: “O le a ou faapea atu i le Au Aposetolo, e maoae tele la tatou matafaioi… . O le a le ituaiga tagata e tatau ona tatou i ai? Ua afu le lalolagi atoa i le amioleaga ma e ao ona saunia le Siona a le Atua mo le oo mai o le faatoafaiava. E tatau ona faamaulalo i tatou lava i luma o le Alii, ma ia i ai i se tulaga ina ia faatumulia i le agaga o le tatou valaauga, faapea ma le Agaga Paia, ma faaaliga e uiga ia Iesu Keriso, ina ia mafai ona tatou iloa le mafaufau ma le finagalo o le Atua, e uiga ia i tatou ma ia saunia e faalautele o tatou valaauga, ma aumaia le amiotonu ma ia lotototoa i le molimau ia Iesu Keriso e oo i le iuga… . E le i i ai lava se taimi ua matuai manaomia ai i le galuega a le Atua se molimau ma galuega sili atu ona faamaoni mai le Au Aposetolo ma le Au Toeaina, nai lo le aso” (“An Epistle,” Deseret News 24 Nov. 1886, 712). Ia fai a outou korama taitasi o se faalapotopotoga e faia auaunaga sili mo le manuia o tagata uma.

Ma o le upu lenei o le lapataiga mai tusitusiga paia:

“O lea ia taitoatasi ai le tagata ma aoaoina lana tiute, ma galue i le tofi ua tofia ai o ia, i le maelega atoatoa.

“O le faatamala e le tauaogaina e tumau, o le foi na te le aoao lana tiute ma faaalia ua le faamaonia o ia, o le a le tauaogaina e tumau” (MFF 107:99–100).

Ma ou te faapea atu ia te oulua Uso e, o e ua tatou auai faatasi i la tatou Korama, faapea ma outou uso uma o ē ua avea ma itu tino o le perisitua a le Atua, ia faamanuia le Atua ia i tatou taitoatasi i o tatou valaauga e auauna atu. Tau ina ia faamalosia lo tatou faatuatua a o tatou auauna atu i le amiotonu, ma tausia ma le faamaoni poloaiga. Ia tuputupu ae malosi pea a tatou molimau a o tatou sailia le punavai o le upu moni e faavavau. Ia avea le usoga o loo i ai i a tatou korama ma faamafanafanaga, ma malosiaga, ma puipuiga a o tatou laasia lenei vaega faaletino o o tatou olaga. Ia tumau pea le olioli o le talalelei i totonu o o tatou loto, a o tatou agai i luma i le faataunuuina o o tatou tiute ma matafaioi i le avea ai o ni auauna i le malo o lo tatou Tama o i le Lagi, o la’u tatalo faamaualalo lea i le suafa o Iesu Keriso, amene.