Filemu o le Lotofuatiaifo ma le Filemu o le Mafaufau

I nei taimi o le faateleina o le lē mautonu, ua tele naua le lototiga, pagatia ma le puapuagatia i le lalolagi atoa lea e mafai ona taofia e ala i le malamalama ma le faaaogaina o le upumoni. I le toatele, o le faaolatotoga ma le fiafia e mafai ona oo mai e ala i le malamalama i le sootaga i le va o le filemu o le lotofuatiaifo ma le filemu o le mafaufau ma le ola i mataupu faavae lea e faavae ai nei faamanuiaga.

E finagalo le Atua i Ana fanau taitoatasi ina ia olioli i le faamanuiaga sili o le filemu o le lotofuatiaifo.¹ O se lotofuatiaifo toafilemu e valaaulia ai le saoloto mai le pagatia, faanoanoa, tausalaina, maasiasi, ma le fetuuina o le tagata lava ia. E maua ai se faavae mo le fiafia. O se tulaga o le matuai agavaa lava ae peitai e toalaiti lava o loo i le lalolagi o loo olioli ai. Aisea? E masani lava ona o le le malamalama po o le le lava fo’i ona mulimuli i mataupu faavae o loo faavae ai le loto fuatiaifo. Ua matuai faatamaoaigaina lo’u olaga i faamanuiaga o le filemu o le lotofuatiaifo lea o le a ou faasoa atu ai ni manatu i le auala e mafai ona maua ai.

O le filemu o le lotofuatiaifo o se vaega taua lea i le mauaina o le filemu o le mafaufau. A aunoa ma le filemu o le lotofuatiaifo e le mafai ona e maua se filemu moni o le mafaufau. O le filemu o le lotofuatiaifo e faatatau lea i lou tagata i totonu, ma e pulea lava i au mea e fai. O le filemu o le lotofuatiaifo e na o le Atua e mafai ona auala mai ai i se olaga amiotonu, ma le usiusitai. A leai, e le mafai ona i ai. I le isi itu o le filemu o le mafaufau e masani lava ona aafia e ala i malosiaga mai fafo e pei o le popole i se tamaitiiti ua se ese, aafiaga o le tamaoaiga, o ni mea faatiga moni pe faafoliga, tulaga toilalo o le lalolagi, po o le tele o mea e fai nai lo le taimi e fai ai. O se mafaufau le mautonu e mo sina taimi, e mavae atu. O le filemu o le mafaufau e toefuataiina e ala i le faamutaina o malosiaga i fafo lea e faalavelaveina ai. E le faapena la i se lotofuatiaifo e faalavelaveina, aua e le malolo, e i ai pea lava, e avea o se faamanatu faifaipea i le moomia ona faasa’o au mea sese ua tuanai, ia faamuta se sese i se isi, po o le salamo i soligatulafono. Ae, e mafai ona faalavelaveina mo sina taimi le lotofuatiaifo e ala i le gauai atu i faaosoosoga o le ava malosi, fualaau oona, o tusi ma ata mataga, ma isi mea sili atu le leaga. E oo uma mai nei mea ona o le faateleina o le faananau mo taumafaiga sese ina ia faafilemuina ai se lotofuatiaifo ua tiga i le taliaina lea e aunoa ma se taofiofia o mea ua fai ma mausa. E i ai se auala sili atu e toefuatai ai le filemu o le lotofuatiaifo.

O le mafai ona i ai o se lotofuatiaifo popole o se meaalofa lea a le Atua e fesoasoani ai ia te oe ina ia manuia i lenei olaga faaletino. E mafua tonu lava mai aafiaga o le Malamalama o Keriso i lou mafaufau ma lou loto. O le Malamalama o Keriso o le mana paia po o le aafiaga lena e sau mai le Atua e ala ia Iesu Keriso.² E tuuina atu le malamalama ma le ola i mea uma. E uunaia ai tagata eseese uma i le lalolagi atoa ina ia iloaina le mea moni mai le mea pepelo, o le sa’o mai le sese. E faaosofia ai lou lotofuatiaifo.³ O ona aafiaga e mafai ona faavaivaia e ala i le solia o tulafono ma le gauai i mea ua fai ma mausa ma e toefuataiina e ala i le salamo moni. O le Malamalama o Keriso e le o se tagata. O se mana ma le aafiaga lea e oo mai le Atua ma afai e mulimuli i ai e mafai ona taitaiina se tagata ina ia agavaa mo le taitaiga ma musumusuga a le Agaga Paia.⁴

E ao ona manatua e tusa lava pe i ai le filemu o le lotofuatiaifo ae mafai lava ona e maua ni taimi e faalavelaveina ai le filemu o lou mafaufau ona o ni popolega i fafo o i tatou. O lou malamalama i mafuaaga e mafai ona faamatuuese atu ai le tele o le mamafa latou te aumaia. A ogatasi lou olaga ma aoaoga a le Alii, e mafai ona e sailia Lana fesoasoani i le foiaina o tulaga o loo avea ma faafitauli. O lou faatuatua i le Alii ma Ana aoaoga o le a faapea ona maua ai le filemu o le mafaufau. O au taumafaiga o le a avea ma laasaga i le faateleina o le alualu i luma o le tagata lava ia a o faapea ona maua ia ni faaiuga e taialaina e le agaga. E le gata i lea, a o faapea ona foiaina, e mafai e na luitau ona aumaia faamanuiaga i isi pe afai o faatupuina e mea latou te manaomia ia ni lagona faasoesa i lou mafaufau.

I le aotelega, e mafai ona e toe maua le filemu o le lotofuatiaifo e ala i le salamo i au lava soligatulafono lea na mafua ai le le mautonu i lou loto. Ona mafai lea ona faamautuina le filemu o le mafaufau e ala i le taofia o fesouaiga i fafo lea na mafua ai lou popole, atuatuvale, ma le tiga i sina taimi. Ae po o le a lava lou taumafai malosi, o le a e le maua lava le fiafia tumau sei iloga o le salamo, e ausia ai tulaga manaomia o tulafono na solia ina ia toefuatai ai le filemu i se lotofuatiaifo na afaina.

E tusa po o oe o se tasi ua iloa le moomia ona salamo ae ua e mauaina le faigata tele ona fai, po o se tasi foi o loo tau manatunatu pe ua lava lona salamo ina ia faamagaloina ai atoatoa, atonu e fesoasoani tele le iloiloina o nisi o mataupu faavae lea e faavae ai le filemu o le lotofuatiaifo.

O le tulafono ua solia mai le agasala po o le solitulafono, e tupu ai le tiga o le mafaufau ma le loto mai se lotofuatiaifo ua tiga. I le iloaina lea o Ana fanau agaga uma, vagana ai Lona Alo Pele e Toatasi, o Iesu Keriso, o le a solia ma le leiloa po o le iloa Ana tulafono, ua saunia ai e lo tatou Tama Falelagi se auala e faasa’o ai taunuuga o ia aga. E tusa lava pe tele pe laitiiti le soligatulafono e tutusa lava le taunuuga: o le salamo atoatoa lea e ala i le faatuatua ia Iesu Keriso ma Lana Togiola ma le usiusitai i Ana poloaiga.

Afai e manaomia, o le salamo atoatoa o le a moomia ai se faatinoga i lau pitolaau. Afai e te le masani i laasaga maoae i le salamo e pei o le ta’uta’u atu ma le lafoaia o le agasala, toe totogiina, usiusitai, ma le sailia o le faamagaloga, talanoa i se epikopo po o le suesue o se punaoa e pei o le galuega maoae a Peresitene Spencer W. Kimball, O Le Vavega o le Faamagalo Atu. I le faaopoopo atu i le faataunuuina o na tulaga manaomia o le a faavavevave le toe foi atu o le filemu o le lotofuatiaifo e ala lea i le taulai atu ma le faaeteete i le isi laasaga lea e le iloaina i nisi o taimi. Ua faamanino mai e le Faaola faapea ina ia mauaina le faamagaloga, e tatau ona e faamagalo atu i isi na faatiga ia te oe.

“O a’u le Alii, e faamagalo atu i e ou te loto ia faamagaloina, a o outou e ao ina outou faamagalo i tagata uma.

“E tatau foi ona outou faapea i o outou loto—ia faamasino le Atua i lo ta va, ma tauia ia te oe e tusa ma au galuega.”⁵

“A outou tutu ma tatalo, ai se mea tou te tiga ai i se tasi, ia outou faamagaloina; ina ia faamagaloina foi e lo outou Tama o i le lagi a outou agasala.

“Afai foi tou te le faamagaloina, e le faamagaloina e lo outou Tama o i le lagi a outou agasala.⁶

Afai o oe o se tagata mama ae ua matuai sese ona tuuaiina, aua e te taofiofi i lagona o le inoino, ma le ita i se mea e foliga mai e le sa’o. Ia faamagalo i le na sese e ui lava ina e mama. O le faia o lena mea e moomia ai se taumafaiga tele i lau vaega. O faamagaloga e faigata tele, ae e mautinoa lava o le ala lea i le filemu ma le faamalologa. Afai e moomia se aoaiga mo se soligatulafono matuia e faasaga ia te oe, ia taatia lena i le Ekalesia ma taitai o le malo. ‘Aua ne’i faamamafaina lou olaga i mafaufauga o le taui ma sui. O le faamasinoga tonu a le Alii e faifaimalie ae matuai aoga lava. I le fuafuaga a le Alii, e leai se tasi e solaese mai taunuuga o le solia o Ana tulafono e le foiaina. O le a moomia i Lana lava taimi ma Lona lava ala se totogi atoatoa mo gaoioiga leaga e le salamoina.

Ou te molimau atu o laasaga talafeagai uma i le salamo, o le vaega sili ona matuai taua e mo oe ina ia i ai se talitonuga faapea e oo mai le faamagaloga ma e na o Iesu Keriso e auala mai ai. E taua le iloaina e na o Ana tuutuuga lava e mafai ona faamagaloina ai oe. O le a e maua le fesoasoani a o e faatino le faatuatua ia Keriso.⁷ O lona uiga ia e faalagolago ia te Ia ma Ana aoaoga. O le a taumafai Satani ina ia e talitonu o soligatulafono matuia e le mafai ona faatoilaloina uma. Ou te molimau atu, na tuuina atu e le Faaola Lona soifua ina ia mafai ona tuueseina uma aafiaga o le agasala e ala i le salamo, sei vagana ai le faamasaaina o le toto o le tagata le sala ma le teenaina o le Agaga Paia.⁸

O fua o le salamo moni o le faamagaloga lea a le Atua, lea e tatalaina ai le faitotoa ina ia maua ai feagaiga ma sauniga uma ua tuuina mai i lenei lalolagi ma olioli ai i faamanuiaga e maua mai ai. Afai e atoatoa le salamo ma ua faamamaina se tasi, ona oo mai ai lea o se vaaiga fou o le ola ma ona avanoa mamalu. E maeu le ofoofogia o le folafolaga a le Alii: “Faauta, o le ua salamo i ana agasala, e faamagaloina o ia, ma o a’u le Alii, ou te le toe manatua lava.”⁹ O le Alii e faamaoni ma o le a faamaoni lava i Ana afioga.

Afai o loo fesouaiina lou lotofuatuaifo mai ni tulafono ua solia, ou te aioi atu, faamolemole foi mai. Foi mai i le malu o vai faafouina o le mama faaletagata. Foi mai i le mafanafana ma le saogalemu o le alofa o le Tama o i le Lagi. Foi mai i le malu ma le filemu o le lotofuatiaifo lea e oo mai i le ola ai i poloaiga a le Atua.

Pe mafai ona ou fautuaina atu se ala e toe foi mai ai? E mafai ona e amataina na o oe lava ma agai ai i lau lava saoasaoa. Ou te valaaulia oe ina ia suesue faalelei le Tusi a Mamona. E tele mau o loo faaali mai ai le auala e faatoilaloina ai papupuni i le salamo. Mo se faataitaiga; na tautala atu Alema ia Sepulona:

“Ua oo foi ina i ai a’u i le tiga matua tele lava ma le puapuaga o le agaga i ao e tolu ma po e tolu; na ou le maua foi le faamagaloina o a’u agasala, seia uma ona ou tagi atu i le Alii o Iesu Keriso i le alofa. A e peitai … na ou tagi atu ia te ia, ona ou maua ai lea le filemu i lo’u agaga.

“O lenei foi, lo’u atalii e, ua ou tuuina atu lenei mea ia te oe ina ia e aoao i le poto, ina ia ou aoaoina atu ia te oe e leai se tasi ala, po o se tasi mea e mafai ona faaolaina ai tagata ua na o Keriso lava. Faauta, o ia o le ola ma le malamalama o le lalolagi.”¹⁰

Mai lenei mau e mafai ai ona e iloa o puapuaga e le aumaia ai le faamagaloga. E oo mai e ala i le faatuatua ia Iesu Keriso ma le usiusitai i Ana aoaoga, ina ia mafai e Lana meaalofa o le togiolaina ona galueaiina lana vavega. Na Ia valaau mai:

“Faauta, ua ou sau … e aumai le togiola i le lalolagi, e faaola a’i le lalolagi ai le agasala.

“O lenei, ai se salamo, ma sau ia te au, e pei o se tamaitiiti, ou te talia o ia, … o lea mea lea ia outou salamo ai, ma ia o mai ia te au … ma ia ola ai.”¹¹

Faaaoga le mea o loo aoao atu e le Tusi a Mamona ia te oe. Mafaufau loloto i fuaiupu na fetalai ai le Faaola. Saili ma le agaga tatalo ina ia iloa o Ia. Ole atu i lou Tama oi le Lagi ina ia faamalosia lou faatuatua i Lona Alo ma tuuina atu ia te oe le mana e usitai ai i Ana poloaiga. Afai ua e saunia, saili le fesoasoani a lou epikopo alofa ina ia fesoasoani e faaatoaina le gasologa o le salamo. Ona mafai lea ona e maua le filemu o le lotofuatiaifo ma le mautinoa ua faamagaloina oe e le Alii.

Faamolemole fo’i mai. Aua le faatalitali sei iloga e tulaga atoatoa mea uma. O le a matou fesoasoani ia te oe. Matou te alolofa ia te oe. Faamolemole foi mai.

O lenei, afai o oe o se tasi e le mafai ona e faamagaloina oe lava mo ni solitulafono matuia ua mavae, e tusa lava pe ua faamautinoa atu e se faamasino o Isaraelu ua tonu lou salamo, afai e te lagona le moomia ona faaauau pea le faasalaina o lou lava tagata ma mafatia e ala i le manatua pea o sese ua tuanai, ou te aioi atu ma lo’u agaga atoa ina ia manatunatu loloto i le fetalaiga lenei a le Faaola:

“O le ua salamo i ana agasala, e faamagaloina o ia, ma o a’u le Alii, ou te le toe manatua lava.

“Tou te iloa faapea se ua salamo i ana agasala— … na te ta’uta’u atu ma lafoaia.”¹²

Ina ia faaauau pea ona mafatia pe afai ua uma ona i ai le salamo moni e le o uunaia lena e le Faaola ae o le matai o taufaasese, o lana sini o le noatia ma le faapologa lea o oe. O le a uunaia oe e Satani ina ia faaauau pea ona toe manatua ia auiliiliga o mea sese ua tuanai i le iloaina lea o manatu faapena e foliga mai ai o le faamagaloga e le mafai ona mauaina. O le auala lea e taumafai ai Satani ia maua le puleaina o le mafaufau ma le tino ina ia mafai ai ona ia faatonutonuina oe e pei o se papeti.

Ou te molimau atu afai e faamautuina atu e se epikopo po o se peresitene o le siteki faapea ua lava lou salamo, ia e iloa o lou usiusitai ua faatagaina ai le Togiola a Iesu Keriso e faamalie ai poloaiga a le faamasinoga tonu mo tulafono na e solia. O lea ua e saoloto ai nei. Faamolemole ia talitonu i ai. Ina ia faaauau pea ona puapuagatia i aafiaga faanoanoa o le agasala pe a mavae ona salamo, e ui lava e le o faamoemoe i ai, ae o le teenaina lea o le aoga o le Togiola a le Faaola mo oe.

Ina ua ofi malie atu i le mafaufau o Amona le manatuaina o mea sese ua tuanai, sa liliu atu ona manatu ia Iesu Keriso ma le vavega o le faamagaloga. Ona suia ai lea o ona puapuaga i le olioli, faafetai, ma le faamanu mo le alofa ma le faamagaloga a le Faaola.¹³ Faamolemole, ia e alu ma faapea ona fai. Fai nei loa ina ia mafai ona e olioli ai i le filemu o le lotofuatiaifo ma le filemu o le mafaufau faapea ma faamanuiaga uma e omai faatasi ai. I le suafa o Iesu Keriso, amene.