Ko e Fiemālie Pē he Meʻa ʻOkú Te Maʻú

Ne u tupu hake ʻi ha kiʻi kolo ʻi he feituʻu faka-tonga ʻo Naisīliá. Ko e maʻuʻanga moʻui ʻa ʻeku tamaí ko e faama, ʻo ne tō ʻa e patetá, koané, manioké, hopá mo ha ngaahi ʻakau kehe ke fakatau atu. Naʻe akoʻi au ʻe heʻeku mātuʻá ʻaki ʻena faʻifaʻitakiʻangá ke u ngāue mālohi. Naʻa mau ngāue kātoa pē ʻi he fāmá, pea naʻa mau maʻu ha meʻakai feʻunga. Naʻe tui ʻeku tamaí kapau ʻe ngāue mālohi ha tangata pea moʻui ʻ i ha founga ʻoku leleí, te ne lavameʻa.

Naʻe ʻikai ke kau ʻeku ongomātuʻá ki he Siasí, ka naʻá na tui ki he ʻOtuá. Naʻá na akoʻi au ʻoku moʻui ʻa e ʻOtuá pea ko Sīsū Kalaisi ʻa e Fakamoʻuí.

Naʻe akoʻi foki au ʻe heʻeku tamaí ʻa e tefitoʻi moʻoni ʻo hono fakaʻapaʻapaʻi ʻo kinautolu ʻoku motuʻa ange ʻiate aú—ʻa e talangofua kiate kinautolu ʻoku maʻu mafaí. Ko ha tukufakaholo ia ʻi hoku koló ke fakaʻapaʻapaʻi ʻa kinautolu ʻoku motuʻa ʻiate kitá.

ʻI heʻeku kei siʻí, naʻe ʻomi ai ʻe hamau kāungaʻapi haʻamau meʻakai lolotonga ha fakafiefia naʻe fai. Ko e taimi pē ʻoku maʻu ai ʻe homau fāmilí ha meʻaʻofa pehē, ko e founga maheni ʻi homau ʻapí ke fili ʻe he tamaí ʻa e taimi ke kai ai ʻe he fāmilí ʻa e meʻakaí. ʻI he taimi ko ʻení, naʻe ʻikai ke ʻi ʻapi ʻemau tamaí. Naʻe fuʻu lahi ʻeku fie kai e meʻakaí peá u tangi mo kole ki heʻeku faʻeé ke ʻomai haʻaku. Naʻe ʻikai loto ʻeku faʻeé ke taʻe tauhi ki he tukufakaholo ʻa ʻeku tamaí, ka naʻe ʻikai foki te ne fie maʻu ke u loto-mamahi. Naʻá ne vaheʻi ha konga ʻo e meʻakaí pea ʻomi ha kiʻi meʻa ke u kai.

ʻI he foki mai ʻeku tamaí ki ʻapí naʻe ʻikai ke ne fiefia ʻi he meʻa kuó u faí. Naʻá ne fakaafeʻi au ki hono lokí peá ne fakahā mai ʻene loto-mamahi ʻi he ʻikai ke u fiemālie ʻi he meʻa kuó u ʻosi maʻú. Naʻá ne akoʻi au ko e nonga ʻo e ʻatamai mo e moʻui ʻoku leleí ʻe maʻu pē ia ʻe kinautolu ʻoku fiemālie ʻi he meʻa ʻoku nau maʻú.

Ne u kamata ʻaʻahi ki ha ngaahi siasi lahi ʻi he ngaahi taʻu ki mui aí, ka naʻe ʻikai pē haʻaku teitei lata ai. ʻI ha ʻaho ʻe taha naʻá ku foki mai ai mei he ngāué pea talamai ʻe he fefine naʻe ʻaʻana ʻa e fale ne mau nofo totongi aí kuo pau ke u mavahe mei ai mo hoku uaifí ʻi he ʻaho hono hokó. Naʻe ʻikai haʻaku faihala pe palopalema ne u fakakaukau atu naʻe tupu ai ʻene talamai ke ma mavahé.

Naʻá ku ʻalu leva ki ha fale ʻo haku kaumeʻa ʻo kole tokoni ʻi hono kumi fakavave ha fale foʻou, ʻo u feʻiloaki ai mo e ongo faifekaú. Naʻá na fakafeʻiloaki mai kinaua mo talamai te na lava ʻo tali ʻeku ngaahi fehuʻí ʻi he ʻosi ʻa e lēsoní. ʻI heʻena faiako ʻo kau ki he Palōfita ko Siosefa Sāmitá mo hono Toe Fakafoki Mai ʻo e Ongoongoleleí, ne u fakakaukau ki heʻeku hiki mei he siasi ki he siasi kae ʻikai pē ke u maʻu ʻa e moʻoní. Naʻá ku aleaʻi ha taimi ke u sio ai ki he ongo faifekaú pea naʻá na akoʻi au mo hoku uaifí. Naʻe ʻikai fuoloa kuo papitaiso mo hilifakinima kimaua.

Talu mei ai mo ʻeku maʻu ha ngaahi uiuiʻi lahi ʻi he Siasí. Naʻá ku ʻilo kuo faktoka ʻe heʻeku mātuʻá ha fakavaʻe fefeka maʻaku ke u tui ki he ʻOtuá, ke u fiemālie pē ʻi he meʻa ʻoku ou maʻú pea ke ʻiloʻi ʻe lava ke fakamoʻui kitautolu ʻi he Fakalelei ʻa Sīsū Kalaisí.

Fānau, fakafanongo ki he faleʻi ʻa hoʻomou mātuʻá, pea muimui ʻi he ngaahi akonaki ʻa hoʻomou kau faiakó mo e kau taki ʻi he Palaimelí. ʻOku ou ʻiloʻi kapau te mou talangofua, kapau te mou lau e Tohi ʻa Molomoná, kapau te mou fakaʻapaʻapaʻi hoʻomu ngaahi fuakava ʻi he papitaisó, ʻe tāpuakiʻi kimoutolu ʻe he ʻEikí.