ʻI he Vakai ʻa Ha Taha Kehe

ʻOku ou palakū,” ko ʻeku leá pē ia heʻeku sio loto mamahi hifo ki he sioʻatá.

Naʻe sio hake mei he sioʻatá ʻa e foʻi mata toʻomataʻu tatau pē. Ka ʻi hono ʻufiʻufi hoku mata toʻohemá, ko e foʻi mata takaʻuli taha ia kuó u mamata aí.

Naʻe feinga fakalotolahi mai hoku kaungāmeʻa ko ʻEmelií, “ʻOku sai pē ia. Ko ʻeku moʻoni.”

Ne fingo atu hoku mata naʻe saí peá u toe ʻai pē ʻa e kofukofu ʻaisí ki hoku matá.

Ko e lava pē ia ha miniti ʻe nima mei he tau hoku foʻi mata toʻohemá he tuiʻi nima ʻo hoku kaumeʻa ko Sená ʻi ha fakatuʻutāmaki. Ne puna vave leva hoku ongo nima ki hoku matá ʻo u feinga ke ʻoua naʻá ku tō ki lalo. Naʻe kole fakamolemole mai ʻa Sena. Naʻe lava ke u ongoʻi e lolofi mai hoku ngaahi kaungāmeʻá ʻi hoku tafaʻakí ke vakaiʻi pe ʻoku ou sai pē.

Neongo naʻá ku mamahiʻia, ka ne u toki ʻilo pē ʻa e meʻa kuo hokó he taimi naʻe toʻo ai hoku ongo nimá mei hoku matá peá u fanongo ki he ofo ʻa e tokotaha kotoa pē he lokí.

Ne u fehuʻi ange, “Ko e hā?” Naʻe ʻikai lea mai ha taha ia.

Ne u lele ki he sioʻatá. Ne laui sekoni pē mei heʻema fetaulakí kuo fufula hoku foʻi matá ʻo liunga fā ia ʻi hono lahi totonú. Naʻe kanokano toto ʻa e konga naʻe takaʻulí.

Ne u lea pē kia Sena mo toʻo mai ʻa e kofukofu ʻaisi ʻi hono nimá, “Te u fehangahangai fēfē mo e kakaí?” Naʻá ne uʻu hono loungutú mo kole fakamolemole mai, mahalo ko e tuʻo teau ʻaki ia ʻene fai peheé. Ne u puke maʻu e kofukofu ʻaisí ki hoku matá mo fakaʻamu pē ʻe mole atu ʻa e takaʻulí he pongipongi hono hokó.

Meʻapango he ko e lolotonga ko ia ʻa e holoholo hifo e pupulá pea puli atu mo ʻene kulá he pongipongi hono hokó, naʻe toe lanu fakapōpōʻuli ange ʻa e konga ia naʻe takaʻulí. Ne u hā palakū pea ne u ongoʻi palakū ange foki.

Ne u feinga ke ʻufiʻufi ʻa hoku matá ʻaki ʻa e meʻa-vali-matá ka naʻe toe ʻasi lanu vāleti ange ai ʻa e foʻi takaʻulí ia. Naʻe ʻikai foki ha meʻa ia ʻe toe felave ki he pupulá. Faifai ne u tui ha tatā ke ʻoua te u lava ʻo sio lelei mai ki ha taha.

ʻI he ʻaho ko iá he akó, ne u ongoʻi hangē ʻoku siofi au ʻe he tokotaha kotoa pē. Naʻe ʻikai ke u fie sio hangatonu ki he fofonga ʻo ha taha. Naʻe lau ʻaho mo e ʻikai pē ke u toe fakakaukau ki ha meʻa kehe, neongo ʻa e feinga hoku kaungāmeʻá ke ʻai ha meʻa ke u fiefia aí.

ʻI he Sāpaté, naʻá ku ʻiteʻita he ʻikai ke u lava ʻo tui hoku tataá ki he lotú. Ka naʻe liliu ʻa e meʻa kotoa pē lolotonga ha lēsoni ʻi he Lautohi Faka-Sāpaté.

Naʻe lea ʻa e faiakó ʻo fekauʻaki mo e Fakaleleí pea mo e mahuʻinga fakatāutahá ʻo pehē, “Lotu ke ke vakai kiate koe ʻo hangē ko ʻEne ʻafio mai kiate koé.”

Ne u ala hake ki he meʻa naʻe takaʻulí mo u fakakaukau loto pē, “ʻOkú Ne ʻafio mai kiate au ko ha kiʻi taʻahine ʻoku takaʻuli hono matá.” Ne ʻikai leva ke u toe fakaʻofaʻia ʻiate au pē ka ne u liliu ʻeku fakakaukaú mo fifili, “ʻOku anga fēfē nai e ʻafio mai ʻa e Tamai Hēvaní kiate aú?”

Ne u mei tangi heʻeku fakakaukau atu ki he ʻofa kuó Ne fai maʻaku mo e niʻihi kehé. Ne u fakatokangaʻi hake, “ʻOkú Ne ʻafio mai kiate au ko Hono ʻofefine au, ʻoku mahuʻinga tatau mo e moʻui ʻa Hono ʻAló.”

Ne u ongoʻi e fakamoʻoni ʻa e Laumālié ʻo kau ki he mahuʻinga lahi ʻo hoku laumālié ʻi heʻeku hoko ko ha ʻofefine ʻo e ʻOtuá. Ne u manatuʻi ha potu folofola ne u ako he seminelí. Ne u fakaava hake ʻeku folofolá ʻo u huke ki he 1 Samuela 16:7: “ʻOua naʻá ke mamata ki hono matá pea ki he māʻolunga ʻo hono sinó; … he ʻoku ʻikai mamata ʻa [e ʻEikí] ʻo hangē ko e mamata ʻa e tangatá; he ʻoku sio ʻa e tangatá ki he anga ʻoku hā ʻi tuʻá, ka ʻoku ʻafioʻi ʻe [he ʻEikí] ʻa e lotó.” Ta ʻoku ʻikai mahuʻinga ʻa hoku fōtunga ʻi tuʻá ʻo hangē ko hoku fōtunga ʻi lotó.

Naʻe toe liliu ʻeku fakakaukaú ʻi heʻeku vakavakai holo he lokí peá u ongoʻi ha ʻofa lahi ki he kakai ne nau ʻatakaiʻi aú. Naʻe fakafonu au ʻe he māfana ʻo e ʻofa ʻa e Tamai Hēvaní pea ne u vakai ki hoku kaungā-akó ʻi ha kiʻi founga siʻi pē, ʻo hangē ko e vakai kiate kinautolu ʻa e Tamai Hēvaní—ko ʻEne fānau.

Ne u ongoʻi nonga mo fiemālie ʻi he toenga ʻo e ʻaho Sāpaté, ʻo ʻikai ke u toe tokanga pe ko e hā e fakakaukau ʻa e niʻihi kehé. Naʻá ku ʻofa ʻiate kinautolu pea ne u sio fakahangatonu ki honau fofongá—ʻaki hoku ongo matá.