Naʻe Fāifai Pea Loto ʻEku Faʻeé ke Ne ʻIlo ki Ai

ʻI he afe ʻa e ʻū motokā fakafeʻao ʻo e meʻafakaʻeikí ʻi he kiʻi hala ki he faʻitoká, naʻe haʻu ki heʻeku fakakaukaú ha manatu ki he ngaahi meʻa naʻe hokó. ʻI heʻeku loto-mamahi ʻi he mate taʻe ʻamanekina ʻa ʻeku tamaí, ne u fekumi ai ki ha fakafiemālie ʻi he ongoongoleleí mo e folofolá. Naʻá ku fakakaukau ai ki he Tangata malanga 3:1: “ʻOku ai hono kuonga ʻo e meʻa kotoa pē.”

ʻI heʻeku kei siʻí, naʻe ʻikai ke maʻulotu maʻu pē hoku fāmilí, ka naʻe fakahā ʻe heʻeku ongomātuʻá ʻa ʻena tuí ʻi he founga faka-Kalaisi ne na tokoniʻiʻaki ʻa kinautolu naʻe faingataʻaʻiá pea mo e founga naʻá na fakahā ai kiate kimautolu fānaú takitaha ʻa ʻena ʻofá. Naʻe hoko ʻeku ongomātuʻá ko ha konga ʻo e faʻahitaʻu kotoa pē ʻo ʻeku moʻuí tuku kehe pē ʻa e taimi ʻe taha, pea naʻe fakamamahi ʻa e taimi ko iá kiate kinaua he naʻe ʻikai mahino kiate kinaua ʻeku fakamoʻoni ki he meʻa kuó u maʻú pea ʻikai ke na fie fanongo ki ai.

ʻI heʻeku taʻu 17, naʻe fakafeʻiloaki ai au ʻe haku ngaahi kaumeʻa lelei ki he Siasí. Naʻe tali ʻe he ongoongolelei kuo toe fakafoki maí ʻa e ngaahi fehuʻi kuo lau taʻu ʻeku nofo mo iá, ka naʻe ʻikai fie kau ʻeku ongomātuʻá ʻi ha faʻahinga meʻa ʻe taha fekauʻaki mo e ongoongoleleí. ʻI heʻeku kau ki he Siasí ʻi hoku taʻu 18, ko ʻeku kui fefiné pē naʻe ʻalu ange ki hoku papitaisó. Naʻe ʻikai ke ne kau ki he Siasí, ka ʻoku hangē naʻe mahino pē kiate ia ʻa ʻeku fiemaʻu fakalaumālié, pea naʻá ne talamai ʻe ʻi ai e ʻaho ʻe tali ai ʻe heʻeku ongomātuʻá ʻa e fili ne u faí.

Naʻá ku mali ʻi ha taimi nounou pē hili hoku papitaisó peá u hiki mo hoku husepānití mei ai. Hili ha ngaahi taʻu siʻi mei ai ne u vahevahe mo ʻeku ongomātuʻá ʻi haʻaku tohi, ha ongoongo kau ki heʻeku sila ʻi he temipalé, mo talaange ʻa ʻeku fiefiá mo e tui ko ia kuó u toki ʻiló. Ka ne ʻikai pē lava ke u ʻomi ʻena tokangá ki he ongoongoleleí. Kuo mālōlō ʻeni ʻeku tamaí, pea ʻoku mau tuēnoa mo ʻeku faʻeé mo hoku kiʻi tehiná.

Ne motuhi ʻeku fakakaukaú ʻi he tuʻu ʻa e ʻū motokaá. Ne u fakatokangaʻi hake ha maka fakamanatu ʻi homau tafaʻaki toʻohemá naʻe kaka ai e ʻakaú. Naʻa mau fakatokangaʻi ha tohi ʻi he maká ʻoku hangē naʻá ne fie maʻu ke mau tuʻu ʻo sio aí, ka naʻa mau hoko atu ki he ouau ʻi he faʻitoká ʻo ʻikai ke mau sio ki ai.

ʻI he ʻosi ʻa e meʻafakaʻeikí, naʻa mau fakahā ʻemau fakamālō ki homau ngaahi kaumeʻá mo e kāingá mo lea fakamāvae kiate kinautolu. Naʻá ku lue atu leva mo hoku husepānití mo ʻeku faʻeé ki he maka fakamanatu ko ʻení. Naʻe tohi ai ha potufolofola ʻa ia naʻá ne liliu ʻeku moʻuí ʻo taʻe ngatá: “He vakai, ko ʻeku ngāué ʻeni mo hoku nāunaú—ke fakahoko ʻa e moʻui taʻe-faʻa-mate mo e moʻui taʻengata ʻa e tangatá” (Mōsese 1:39).

Ko e fuofua taimi ʻeni ʻi he taʻu ʻe 14 kuó u papitaiso aí, ne fai mai ai ʻe heʻeku faʻeé ha ngaahi fehuʻi. Naʻe lava ke u ʻoange ha ngaahi tali koeʻuhí pē ko e ongoongolelei kuo toe fakafoki maí. Naʻe papitaiso ia mo hoku tehiná hili ha taimi nounou pē mei ai. ʻI he ʻosi siʻi pē ha taʻu ʻe taha mei ai, naʻe fakakakato leva ʻa e ngāue fakatemipalé maʻa ʻeku tamaí.

Kuo ʻosi ʻeni ha taʻu ʻe 30 tupu mei he ʻaho ko ia ʻi he faʻitoká. Lolotonga e taimi ko iá, kuo silaʻi fakataha homau kāinga ofí ʻi he temipalé. Naʻe hoko ʻeku faʻeé ko ha palesiteni Fineʻofa mo ngāue tokoni ʻi ha ngaahi taʻu lahi. Naʻe mali hoku tehiná, ʻi ai ʻene fānau, pea hoko ko ha taki ki he Loumailé ʻi ha ngaahi taʻu lahi, palesiteni ʻo e Kau Finemuí pea ngāue maʻá e Tafaʻaki Tokoni ʻa e Siasí maʻá e Fāmilí.

ʻOku ʻi ai hono kuonga ʻo e meʻa kotoa pē—kau ai ʻa e taimi ke fiefia mo e taimi ke mamahi. ʻOku ou fakafetaʻi ʻi heʻeku ʻiloʻi ʻoku tali mai ʻa e ngaahi lotú ʻi he taimi pē ʻa e ʻOtuá pea ʻoku ʻomi ʻe he ngaahi tohi folofolá ʻa e folofola ʻo e moʻuí kiate kitautolu ʻi heʻetau fekumi, fakalaulauloto pea fevahevaheʻaki iá.