Fe‘unga ‘a e Ngāue Fakafaifekau ‘e Tahá ke ne Liliu ha Ngaahi Mo‘ui, Kae ‘Ikai Fe‘unga ke ne Fakalato ‘a e Faka‘amu Ko ia ke Ngāue Tokoní

Naʻe hoko ʻa e fuofua ngāue fakafaifekau ʻa Misa mo Sistā Havili ki he Misiona Minisota Miniepolisí ʻi he 1992 ko ha meʻa fakafiefia, kae tautautefito kia Sisitā Havili, he naʻá ne fakaʻamu maʻu pē ke ngāue fakafaifekau taimi kakato talu mei he taimi ne teuteu ai ʻena fānaú ke nau ʻalu atu ʻo ngāue fakafaifekaú. Naʻá ne maʻu mo hono husepānití ʻa e fiefia ʻi heʻena fakamālohia ʻa e kāingalotú mo vakai ki hono fokotuʻu ha kolo foʻou ʻo e Siasí.

Naʻe toe ngāue fakafaifekau taimi kakato kimui ange ʻa e ongo mātuʻá ni ʻi he Misiona Saute Takota Lapiti Sití, hoko ki ai mo ha ngāue fakafaifekau ʻi he hisitōlia fakafāmilí ʻi he Laipeli Hisitōlia Fakafāmilí ʻi Sōleki Sití pea ʻi he Utah Correctional Institute. Naʻe ʻomi ʻe he feituʻu fakamuimuí ha ngaahi pole makehe pea naʻe ongoʻi ʻe Misa mo Sisitā Havili ha ʻofa makehe ki hona ngaahi tokoua mo tuofāfine ne tuku pōpulá.

Naʻá na toe ngāue ko ha ongo faifekau malanga ki he Misiona Venikuva Kānatá, pea tuʻo ua ʻena ngāue tokoni ʻi he tafaʻaki tokoni ʻofa fakaetangatá ki Haʻamoa ʻAmelika mo Sakalamenitō, Kalefōnia ʻi he ʻIunaiteti Siteiti ʻo ʻAmeliká. Naʻe ʻikai fuoloa mei ai kuo to e ui kinaua ke na ngāue ʻi he hisitōlia fakafāmilí ki he Misiona Kānata Kilikalí.

Hili ha taʻu ʻe taha mo e konga ʻi Kilikali, ʻokú na lolotonga ngāue ʻeni ki he hisitōlia fakafāmilí ʻi he loto Misiona Kilikalí ki Kouluteni, Pilītisi Kolomupia mo Kasitoni ʻi ʻAlapeta.

Ko e moʻoni ne fehangahangai ʻa Misa mo Sisistā Havili mo ha ngaahi faingataʻa he ngaahi taʻu ko ʻeni ʻo e ngāue tokoní. Ne pau ke na katekina ʻa e niʻihi ʻo e faingataʻa tatau ʻoku fehangahangai mo e kau teuteu ngāue fakafaifekau kotoa pē, hangē ko e ngaahi meʻa fakapaʻangá, manavasiʻí, fekumi ki ha ngaahi faingamālie totonú mo e tokanga ki he ngaahi meʻa fakafāmilí.

Ngaahi meʻa fakapaʻangá: Ne malava ke Fakahoko e ngāue ʻa Misa mo Sisitā Havili tuʻunga ʻi heʻena fakatuhotuhani lelei ʻa ia naʻá na maʻú mo moʻui fakapotopotó. Naʻá na fakafaingofuaʻi ʻena ngaahi meʻa fakapaʻangá ʻaki ʻena tuku atu ʻa e ngaahi fakamole ʻoku ʻikai fuʻu fiemaʻú mo e moʻuá pea fakahū hangatonu ʻa ʻena paʻanga mei heʻena vāhenga mālōloó mo e vahe mei he puleʻangá ki ha ʻakauni pē ʻe taha. Neongo ne ʻikai lahi, ka naʻe feʻunga maʻu pē ʻa e paʻanga naʻá na maʻú. Naʻe pehē ʻe Siasitā Havili, “Ne ʻikai ke lahi maʻu pē ʻema paʻanga; ka naʻá ma maʻu ha tui lahi.”

Manavasiʻí: ʻI heʻene tohinoá (naʻá na fakatou tauhi ha tohinoa talu mei heʻena fuofua ngāue fakafaifekau ki Miniepolisí) ne tohi ʻe Misa Havili ʻo pehē ʻokú ne ongoʻi taʻefeʻunga ke malangaʻi ʻa e folofolá pea naʻe ʻi ai e taimi ne ongoʻi pehē pe mo Sisitā Havili. Naʻá ne pehē ko e meʻa naʻá na tokanga ki aí pe, “ʻOku ou maʻu nai ha ʻilo feʻunga? Naʻe ʻikai ke ma ako … ka ko ʻeni kuó ma ʻalu atu ki māmani, ʻo feinga ke fakaului ʻa e kakaí… . Ko ha fatongia mamafa ke fakafofongaʻi ʻa e ʻEikí.” Naʻá na ʻilo ʻi he ngaahi meʻa naʻá na fouá ʻoku tokangaʻi ʻe he ʻEikí ʻa kinautolu ʻoku ngāue maʻá Ná.

Fekumi ki he Ngaahi Faingamālie Totonú: ʻOku ʻi ai ha ngaahi faingamālie ke ngāue tokoni ke hoa mo ha faʻahinga pōtoʻi ngāue pe talēniti ʻoku maʻu ʻe ha ongo mātuʻa mali. ʻOku faleʻi ʻa e ngaahi hoa malí ke nau fakakaukauʻi ʻa honau ngaahi talēniti makehé mo e meʻa te nau malavá pea pehē ki heʻenau moʻui leleí mo e tuʻunga ʻo e ngaahi meʻa fakapaʻangá ʻi he taimi ʻokú nau ʻalu atu ai ki he pīsopé pe palesiteni fakakoló. Ko e ngaahi tuʻunga ne ngāue ai ʻa Misa mo Sisitā Havilí ne kehekehe ʻo hangē pe ko e ngaahi feituʻu kuó na nofo aí. Naʻá na fiefia ke ngāue ʻi ha feituʻu pē ne ui kinaua ki ai ʻe he ʻEikí, ʻo tatau ai pē pe ko e faifekau tokoni ʻofa fakaetangata, faifekau hisitōlia fakafāmili pe faifekau malanga.

Fāmilí: Ko e taha ʻo e ngaahi meʻa lahi ʻoku fai tatau ai ʻa e kau faifekau matuʻotuʻá ko ʻenau tokanga ko ia ki heʻenau mavahe mei honau fāmilí. Ko e fāmili ‘o Misa mo Sisitā Havili ʻoku kau ai ha fānau ʻe toko 7, makapuna ʻe toko 39 mo ha makapuna ua ʻe toko 25. Ne faingataʻa ke tuku kinautolu ʻi he ngaahi taʻu taki taha, ka ʻokú na ongoʻi vāofi ange he taimí ni ki hona hakó ʻi he taimi naʻá na mavahe atu aí. Naʻe pehē ʻe Sisitā Havili, “ʻOku ʻikai te u faʻa lava ke fakamatalaʻi ʻa e ʻofa ne tupulaki ʻiate kimauá… . kapau ʻokú ke fakakaukau he ʻikai te ke lava ʻo ʻalu koeʻuhí ko hoʻo fānaú, ta ʻoku totonu ke ke ʻalu koeʻuhí ko kinautolu”.

Naʻe manatuʻi ʻe Misa mo Sisitā Havili lolotonga e ngaahi meʻá ni kotoa ʻokú na ʻi he ngāue ʻa e ʻEikí. Naʻá ne pehē, “Ko ʻEne ngāue mo Hono nāunaú ʻeni. Kuo pau ke ke tui ʻoku moʻoni ia”.

ʻOku fakalaka atu ʻa e ngāue ne fakahoko ʻe Misa mo Sisitā Havilí ʻi he ngaahi fakangatangata ʻo e ngāue fakafaifekaú. Kuó ne tapuekina ʻa hona hakó ʻi ha ngaahi founga ne ʻikai ke na fakakauaku ki ai. Ne pehē ʻe Sisita Havili, “Okú ma ofo ʻi he meʻa kuó ne fakahoko ki heʻema fānaú”.

ʻOku tui kotoa ʻa e hako ʻo Misa mo Sisitā Havilí kuo takiekina lahi ʻe heʻena ngaahi sīpingá ʻa ʻenau moʻuí. Naʻe pehē ʻe Teuli Koli, ko e taha ʻo e ngaahi ʻofefine ʻo Misa mo Sisitā Havilí, “ʻI he taimi ʻoku ʻalu atu ai ha makapuna tangata pe fefine ki he malaʻe ʻo e ngāue fakafaifekaú, ʻoku nau fakakaukau ki heʻenau kui fefine mo e kui tangata ʻokú na ngāue ʻaki hona lotó, iví, ʻatamaí, mo e mālohí kotoa ʻi hona taʻu matuʻotuʻá pea ueʻi ai kinautolu ke fai honau lelei tahá”.

Kuo ueʻi ʻa Misa mo Sisistā Havili ke hokohoko atu ʻa ʻena ngāué ʻi heʻena vakai ki he takiekina lelei ko ia kuo hoko ki hona fāmilí hili ʻa ʻena ngāue fakafaifekau ʻuluakí mo e uá.

Ne pehē ʻe Sisitā Havili, “ʻOku lava pē ke pehē, ko e taimi ʻokú ke ʻalu atu ai ko ha kui ʻo ngāué, ʻokú ke ngāue pē maʻa hoʻo fāmilí ʻi ha ngaahi founga kehekehe foki”.

Naʻe toki tohí ni mai ʻa hona mokopuna ko Nikoulu Kelí, ʻa ia ʻoku lolotonga ngāue fakafaifekau ʻi he Misiona ʻAitahō Pokateló fekauʻaki mo ʻene ongo kuí ʻo pehē: “Ne hoko ʻeku mamata ki heʻena ngāue mateaki ki he ʻEikí ʻo ʻomi kiate au ha holi lahi ange ke ngāue maʻá e ʻEikí. ʻOku ou ʻiloʻi ne takiekina lahi ʻe heʻena tā sīpingá fakaʻofoʻofá ʻa ʻeku holi ko ia ke ngāue fakafaifekaú.”

ʻOku ongoʻi vāofi ange ʻa Misa mo Sisitā Havili ki heʻena fānaú mo e makapuná koeʻuhí ko ʻena ngāué, ka ʻokú na toe vāofi ange foki ʻi heʻena hoko ko e ongo meʻa malí. Naʻe fakamatalaʻi ʻe Sisitā Havili ʻa ʻena ako folofola fakaʻahó ko ha “tāpuaki maʻongoʻonga moʻoni.”

Naʻe toe tānaki mai ʻa Misa Havili ʻo pehē, ʻokú ne ongoʻi vāofi ange ki hono uaifí ʻi he hokohoko atu ʻena ngāué. Naʻá ne pehē, “Ko e ngaahi meʻa ʻokú ne ongoʻí, ko ia pē ʻoku ou ongoʻí. ʻI he taimi ʻokú ne tangi aí, ʻoku ou tangi. ʻI he taimi ʻokú ne kata aí, ʻoku ou kata”.

Kuo tupulekina ʻa ʻena feohi mo e ʻEikí ʻi heʻena falala kiate Ia ke maʻu ha fakafiemālie mo ha tatakí. Naʻe pehē ʻe sisitā Havili, “ʻI hoʻo ʻalu ko ia ʻo ngāue fakafaifekaú, ʻokú ke tokotaha pē. ʻOkú ke falala leva ki he Fakamoʻuí, ʻo lahi ange ia ʻi ha toe taimi ʻi muʻa”.

Naʻe ʻiloʻi ʻe Misa mo Sisitā Havili naʻe tokangaʻi kinaua ʻi he taimi ko ia ʻokú na fakafanongo ai ki he ngaahi ueʻi ʻa e Laumālié.

Naʻe pehē ʻe Sisitā Havili, “ʻOku hangē ʻoku toutou fakaava ʻe he ʻEikí ʻa e ngaahi matapaá … ʻo vave ange ʻi hoʻo lava ke hū atu ʻiate kinautolú. Koe meʻa pē ʻoku fiemaʻú—ko hoʻo holi ki he ngāué mo e loto fie ngāue.”