Ko e Founga Ne u ʻIlo ai ʻa Kalaisi ʻi Kāpaneumé

Hili ha ngaahi taʻu lahi ʻo e palani mo e teuteú, ne fāifai peá u ʻalu ki he Fonua Tapú mo hoku fāmilí pea mo ha ngaahi kaumeʻa ofi. ʻI heʻemau ofi ki he Tahi Kālelí, naʻa mau hanganaki atu ke mamata ʻi Kāpaneume.

ʻOku talamai ʻe he tohi ʻa Mātiú naʻe hili hono fakasītuʻaʻi ʻe he kakaí ʻa Kalaisi ʻi he kolo ko Nāsaletí, ʻa ē naʻe tupu hake aí, naʻe ʻai ʻe he Fakamoʻuí ʻa Kāpaneume ke hoko ko “Hono kolo” (Mātiu 9:1). Ko Kāpaneume mo e matātahi ʻo e Tahi Kālelí ne ui ai ʻe Kalaisi ʻa Pita, Sēmisi, Sione, ʻAnitelū, mo Mātiu ki mui, ke hoko ko e kau ākongá (vakai, Mātiu 4:18–22; 9:9).

Ko e ʻuhinga ʻo e Kāpaneumé ko e “kolo ʻo Nēhumi,” pe ko e kolo ʻo e fiemālié pe nongá. Ko e moʻoni naʻe ʻofa ʻa Kalaisi ki he kakai ʻo e koló ni peá ne fakafiemālieʻi ʻa kinautolu ʻaki ʻene kapusi ʻa e kau tēvoló, fakamoʻui “ʻa kinautolu kotoa pē naʻe mahakí,” pea aʻu ki hono fokotuʻu ʻo e maté (vakai, Mātiu 8:16; Maʻake 5:35–42). Neongo naʻe valokiʻi ki mui ai ʻe Kalaisi ʻa e kakai ʻo Kāpaneumé ko e ʻikai ke nau tali Iá, kae mahalo ko e feituʻu ʻeni naʻe lahi taha ʻEne fakahoko ai e ngaahi maná ʻi ha toe feituʻu kehe.

Naʻa mau vakai takai ʻi he ngaahi fale motuʻa kuo holo ʻi Kāpaneumé pea mau lue hifo ʻi he ngaahi hala motuʻá mo ofo ʻi he ngaahi meʻa kuo mātāʻia ʻi he kiʻi koló ni (vakai, Mātiu 11:23). Ne u toki tangutu hifo ʻi ha lalo ʻakau ki mui, ʻo u fakakaukau loto pē mo hanga atu ki he Tahi Kālelí. Kuo hoko ʻo moʻoni ʻeku ngaahi ʻamanaki ke u ongoʻi e ngaahi meʻa naʻe hoko ʻi he folofolá, ka neongo ia, naʻe teʻeki pē ke kakato. Neongo ʻeku teuteu ko ia ki he fonongá ni, ʻa ʻeku fekumi fakamātoato kia Kalaisí, mo e meʻa ne u fakapapauʻi ke fakahoko ʻo iku ki heʻemau omi ki hení, ne u ongoʻi ha taʻefiemālie lahi ʻi hoku lotó.

Ko e hā ʻoku ʻikai faitāpuekina ai ʻemau moʻuí ʻe he feituʻu ko ʻeni ne faitāpuekina ai ʻe Kalaisi ha fuʻu kakai tokolahí? ʻI heʻeku fefaʻuhi mo e ngaahi ongo naʻá ku maʻú, ne u fakaʻamu ke u lau mai e folofolá. Ne u ʻeke ki he tokotaha kotoa ʻi heʻemau kulupú, ka naʻe fakamamahi he naʻe ʻikai haʻu ha taha ia mo ha Tohi Tapu. Meʻamālie naʻe ʻi ai ha taha heʻemau kulupú naʻe ʻi ai ʻene kiʻi meʻangāue fakaʻilekitulōnika toʻotoʻo naʻe maʻu ai e folofolá. Naʻe vave ʻemau haʻohaʻo takai ʻo fanongo kae lau ʻe ha tokotaha ha ngaahi veesi ʻi he Mātiu 4 mo e Maʻake 5 ʻo kau ki he Fakamoʻuí ʻi Kāpaneume.

Ko ʻene hiki pē ʻemau tokangá ki he folofolá, kuo fetongi leva ʻe he ongoʻi taʻeoli ne u maʻú ʻe ha fakamoʻoni ongo fakafiemālie ki he ʻofa ʻa e Fakamoʻuí pea mo hono moʻoni ʻo e ngaahi meʻa ko ia naʻe hoko ʻo fakamoʻoni ki ai ʻa e folofolá. Naʻa mau omi ki Kāpaneume ko e fekumi kia Kalaisi, ka naʻe ʻikai ke mau ʻilo ia tuku kehe ʻemau toki fekumi ʻi he folofolá. Naʻe ʻikai ko e ʻātakai fakatuʻasinó naʻá ne fakamoʻoniʻi kiate kimautolú ka ko e Laumālie Māʻoniʻoní.

ʻE lava pē ke fakalahiʻaki ki he ako folofolá ʻa e hisitōliá, ngaahi tohi ʻoku nau ʻomi ha ngaahi fakamatala, ngaahi ʻilo fekauʻaki mo e leá mo e faʻa ʻaʻahi ki ha ngaahi feituʻu, ka ʻoku ʻikai ha meʻa ia te ne lava ke fetongi ʻa e ako fakahangatonu pē mei he Laumālié ʻi heʻetau tuku hotau taimí mo ʻetau tokangá ki hono ako ʻo e folofolá. Naʻe hoko e ngaahi foha ʻo Mōsaiá, ʻa ē ne “nau fakatotolo faivelenga ʻi he ngaahi folofolá, koeʻuhí ke nau ʻiloʻi ʻa e folofola ʻa e ʻOtuá” (ʻAlamā 17:2), ko ha sīpinga ʻo e tefitoʻi moʻoni ko ʻení.

Fakatauange ʻe hoko ʻetau ako folofola fakaʻahó ko e uho ia ʻo ʻetau fekumi kia Kalaisí, he ko e moʻoni, ko e folofolá pē ʻa e feituʻu lelei taha ke tau fekumi ai kiate Iá.