Tohi ki he ʻĒtitá

ʻOku hoko moʻoni pē ʻa e Liahoná ko ha kāpasa ʻi heʻeku moʻuí. Ko ha lolo faitoʻo ki hoku ngaahi kafó pea ʻokú ne ʻomi kiate au ha ʻamanaki lelei ʻi he taimi ʻoku ou lotofoʻi aí. ʻOku ʻi he ngaahi fakamatalá ʻa e tali ki heʻeku ngaahi fehuʻí pea ʻokú ne fakamaama ʻeku ngaahi veiveiuá. ʻI heʻeku lau e ngaahi fakamoʻoní, ngaahi lea he konifelenisí mo e ngaahi tohi ki he ʻētitá, ʻoku tupulaki ʻeku tui ki he Tupuʻangá peá u ongoʻi ofi ange ki he kāingalotu ʻo e Siasí, ʻa ē ʻoku nau fakaulo mai ʻenau māmá ʻi he makasiní.

Kāmeni Mosikoso, Suisalani

Kuó u fakatokangaʻi ʻoku ʻi ai ha taimi ʻe niʻihi ʻoku ʻi ai ai ha ngaahi Liahona makehe. Ko e fakatātā ʻe ua ki aí ko e makasini maʻá e kau papi ului foʻoú (ʻOkatopa 2006), ʻoku fuʻu mahuʻinga ʻaupito kiate au, mo e makasini maʻanautolu ʻoku teuteu ō ʻo ngāue fakafaifekaú (Māʻasi 2007).

ʻE lava ke mou pulusi ha makasini maʻá e kau fiefanongó mo e kau mēmipa ʻi he fāmili ʻo e kau papi ului foʻoú? ʻOku faingataʻa ke u vahevahe ʻa e ongoongoleleí mo hoku fāmilí he ʻoku nau ongoʻi ʻe kinautolu ʻoku ʻikai ke tau tui ki he ʻOtuá pe ko Sīsū Kalaisi. ʻOku ou fie maʻu ha ngaahi fakamatala te ne fakaʻā honau matá, tekeʻi atu ʻenau taʻetuí, pea tokoniʻi kinautolu ke nau fakaʻapaʻapaʻi ʻa e fili kuó u faí.

Hekitoa Liolo Laisi, Mekisikou

Ne u ʻuluaki ʻilo ki he Liahoná ʻi he taimi ne u kau ai ki he Siasí ʻi he ngaahi taʻu lahi kuo hilí. Naʻe ʻikai ke u fuʻu fakakaukau au ki ai ʻi he kamataʻangá, ka naʻe ʻalu pē taimí mo ʻene hoko ko ha taha ʻo e ngaahi meʻa fakaʻofoʻofa taha ʻi heʻeku moʻuí pea mo e kī ki heʻeku lavameʻá. Naʻá ne fakamālohia ʻeku fakamoʻoni ki he ongoongolelei kuo fakafoki maí peá ne tokoniʻi au ke u kei mālohi ai pē he Siasí. Tupu mei he mālohi ko ʻení, ne u lava ai ke tekeʻi e ngaahi ʻahiʻahí mo tā ha sīpinga lelei ki haku kaungā-ngāue ʻa ia ne iku pē ʻo papitaiso mo hilifakinima.

Meʻa fakaʻofoʻofa moʻoni ke te ako mo vahevahe ʻa e Liahoná mo ha niʻihi kehe. Te ne tokoniʻi au ʻi he toenga ʻo ʻeku moʻuí. ʻOku ou fakamālō ʻi heʻeku maʻu ʻa e ngaahi pōpoaki mei he palōfita ʻa e ʻEikí mo e kau ʻaposetoló ʻi he māhina kotoa pē. ʻOku melie ange ʻa e Liahoná kiate au ʻi he huʻa honé pea mahuʻinga ange ʻi he koulá.

ʻAletemia Kanakoma ʻAve, Polivia

Naʻe ueʻi ʻe he talanoa ko e “Ngaahi Mama FKT ʻi he ʻŌfisi ʻo e Puleakó” (Māʻasi 2007) ʻa ē ʻoku fakamatala fekauʻaki mo ha taʻahine naʻá ne fakamatala ki heʻene puleakó ʻo kau ki he Siasí ʻi he taimi naʻe fehuʻi ange ai ʻe he puleakó fekauʻaki mo hono mama FKT, hoku kiʻi foha taʻu 5 mo e fānau Palaimeli ʻi homau koló ke nau tui maʻu pē honau ngaahi mama FKT.

Ne fakahoko ʻe hoku fohá mo ha kiʻi tamasiʻi ʻe taha ʻa ʻena fuofua ngāue fakafaifekaú ʻi he taimi naʻe fehuʻi ange ai ʻe heʻena kau faiako ʻi ʻapiakó fekauʻaki mo e mamá pea naʻe lava ʻe he ongo tamaikí ke fakamatala ange ʻa e Siasí.

ʻAlekisio Topilovosikai, ʻIukuleini

ʻI he taimi ne papitaiso ai aú, naʻe fakaafeʻi au ʻe ha fefine ke u totongi haʻaku Liahona. ʻI he kamataʻangá, naʻe ʻikai ke lahi haʻaku lau ia, ka naʻe ʻalu pē taimí mo ʻeku ʻiloʻi hono mahuʻinga ʻo e makasiní ni. Kuo hanga ʻe hono ngaahi pōpoakí ʻo fakamālohia hoku laumālié mo tali ʻeku ngaahi lotú. Ko e ngaahi fuofua meʻa pē ʻoku ou laú ko e Pōpoaki ʻa e Kau Palesitensī ʻUluakí mo e Pōpoaki ʻa e Faiako ʻAʻahí. Kuó u vahevahe foki e konga maʻá e fānaú mo ʻeku tamasiʻi ko Likató. ʻOku ou fiefia ke maʻu ʻa e makasiní he ʻahó ni.

Kuó u ako he Liahoná ʻi ha ngaahi founga lahi, fakaeloto mo fakalaumālie. ʻOku ʻikai ha veiveiua hono mahuʻinga ʻo e feinga ke fekumi ʻi aí. Ko ha koloa ia maʻá e laumālié mo ha fakahinohino ʻi he ngaahi momeniti ʻo e fakapoʻulí, hangē pē ko e folofolá. ʻOku ou ʻiloʻi lelei ange he taimí ni ʻa e founga ke u fehangahangai ai mo māmani ʻi he ngaahi ʻaho kimui ní. ʻOku ou fakamālō ʻi he lava ke u fiefia hono lau iá ʻi ha taʻu ʻeni ʻe 14.

Silivia Fikela-ʻOsitalasa, Pueto Liko