Fakahoko e Tanupou ‘o e Kelekele ‘i Sepū ki he Ngaahi Fale ma‘á e Temipale Filipaini Fo‘oú

Naʻe tanupou ʻe ʻEletā Tāleni H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e ngaahi fale maʻá e Temipale Sepū Filipainí ʻi Lahaki, ʻi Sepū Siti ʻi he ʻaho 14 ʻo Nōvema, 2007.

ʻI he lolotonga e ouaú, ne pehē ai ʻe ʻEletā ʻOakesi ʻoku ʻikai ke nau ʻi ai pē “ke fakatapui ʻa e fonuá ki he ʻEikí” ka ke “lotua foki … ke tau lava ʻo teuteuʻi kitautolu ki he ngaahi tāpuaki ʻo e temipale.”

ʻI heʻene lotu fakatapuí, naʻe kole ai ʻe ʻEletā ʻOakesi ha tāpuaki maʻá e kakai Filipainí ke nau nofo ʻi he melino, fekoekoeʻi pea ke nau monūʻia; pea ke langa ʻa e temipalé ʻo ʻikai hano mele; pea ke ongoʻi ʻe he kakai ʻe haʻu ki aí ʻa e toputapu ʻo e falé.

Ne fakatahataha mai ki he meʻa fakahisitōliá ni ha kāingalotu ʻe toko 400, kau ai ha kau palesitenisī fakasiteiki mo fakavahefonua, pīsope, palesiteni fakakolo, kau palesitenisī ʻo e ngaahi houalotu ʻo e ngaahi siteiki mo e vahefonua ʻe fitu ofi maí, kau palesiteni fakamisiona ʻe ono ʻi he vāhenga fakatemipale ʻo e Temipale Sepū Filipaini foʻoú pea mo ha kau taki fakalotofonua.

Ne kau atu foki ki he ouaú ni ʻa ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá; ʻEletā Kifi R. ʻEtuate ko e Palesiteni Fakaʻēlia ʻo e ʻĒlia Filipainí mo hono ongo tokoní, pea naʻe kau atu foki mo ʻEletā Uoni ʻIongi Kō mo ʻEletā Maikolo J. Tei ʻo e Kau Fitungofulú.

Hili ʻeni ha taʻu ʻe uofulu mā tolu hono langa ʻo e fuofua temipale ʻi he ʻOtu Filipainí, ne fakahā ai ʻe Palesiteni ʻAtonio Sione Paleitosi, ko e Palesiteni ʻo e Siteiki Sepū Siti Filipainí ʻi heʻene lotú ʻa e houngaʻia moʻoni ʻa e Kāingalotu Filipainí ʻi heʻenau maʻu ʻa e temipale hono ua ʻi he ʻOtu Filipainí ʻa ia ʻoku langa i Sepū ke ngāueʻaki ʻi he ngaahi feituʻu lotoloto mo faka-tonga ʻo e ʻOtu Filipainí.

ʻI he efiafi hili ʻa e tanupoú, ne fakahoko ai ʻe ʻEletā ʻOakesi ha fakataha lotu mo ha Kāingalotu nai ʻe toko 3,000 tupu peá ne faleʻi kinautolu ke teuteu ki he temipalé ʻaki hano fakatupulaki ʻo ha “ngaahi ʻulungāanga toputapu”. Naʻá ne pehē ʻe tokoniʻi kitautolu ʻe he ngahi ʻulungāanga toputapú ke tau “mateuteu ke tali ʻa e ngaahi fehuʻi ʻe fai mai ʻe he ʻEikí kiate kitautolu” ʻi he fakamaau fakaʻosí. ʻOku kau ʻi he ngaahi ʻulungāanga ko ʻení ʻa hono fakahoko ʻa e lotu fakafoʻituitui mo fakafāmilí, lau folofolá mo hono maʻu ʻo e sākalamēnití ʻi he Sāpate kotoa pē.

ʻE kau ʻi he ngaahi fale ko ia ʻo e Temipale Sepū Filipainí, a ia ʻoku feʻunga hono lahí mo ha hekitea ʻe 4.7, ha fale nofoʻanga maʻá e kau pataloní, falelotu, fale maʻá e palesiteni fakamisioná mo e palesiteni temipalé mo ha ʻōfisi maʻá e misioná. Ko e lahi ʻo e fale temipalé ʻataʻatā pē ʻoku feʻunga mo ha ʻēlia sikuea mita ʻe 2,391 nai.

Ko e Temipale Sepū Filipainí, ko e temipale ia hono 132 ʻo e Siasí kuo fanongonongo, lolotonga ngāue pe lolotonga langa.