Ko e Foʻi Hiva ʻa ʻEne Faʻeé

Naʻe ʻohovale ʻa Sūsana ʻo ʻā hake. Ko e hā e meʻa ʻoku longoaʻá? Naʻá ne fakafanongo fakalelei. Naʻe puhi ʻe he havilí ʻa e ʻulu ʻeukalipitasí ʻo ngangana hono fanga kiʻi fuá ʻi he ʻató ʻo feʻunga hifo mo hono loki mohé. Naʻe ongo tatau ʻenau ngangana longoaʻá mo ha ʻuha lahi ʻo tupu ai ʻene ʻaá.

Naʻe māpuhoi ʻa Sūsana. Naʻe toki hiki mai pē hono fāmilí ki he fale ko ʻení, pea naʻe teʻeki ai ke ne maheni mo e ngaahi ongo foʻou aí. ʻĀsili ai mo e mohe tokotaha ʻa Sūsaná. Naʻá na loki taha pē mo hono tokoua lahí ʻi honau fale motuʻá.

Naʻá ne fusi hake leva hono sipí ki hono lalo kumukumú ʻi he toe ngangana hifo ʻa e fanga kiʻi fuá ʻi he ʻató. Naʻe ilifia, taʻelata, peá ne fakatokangaʻi foki ʻene ʻofa ki heʻene tamaí. Ko ha ʻōfisa e tamai ʻa Sūsaná ʻi he tau maluʻi fonuá. Naʻá ne lolotonga ʻalu ia ʻo ako. Neongo naʻe ʻikai hoko ha fakatuʻutāmaki ki ai ka naʻe fakafokifā pē ʻa e ongoʻi ilifia ʻa Sūsaná. Fēfē kapau ʻe ʻalu ʻene tamaí he taú ʻi ha ʻaho pea mate ai? Naʻe ʻikai te ne fie maʻu ke tupu hake taʻe ʻi ai ʻene tamaí. Naʻá ne fie maʻu ʻene tamaí.

Naʻe tafe e loʻimata ʻo Sūsaná peá ne ʻiloʻi ʻokú ne fie maʻu ha tokoni ke nonga ai ʻene ilifiá he ne fakaʻau pē ke lahi ange. Naʻe ʻikai ke ofi ai hono tokouá, ka naʻá ne ʻiloʻi naʻe ofi maʻu pē ʻa Sīsū mo e Tamai Hēvaní.

Naʻe feinga ʻa Sūsana ke toʻa hono lotó, peá ne hū leva ki tuʻa mei hono sipí ʻo tūʻulutui ʻi hono veʻe mohengá. Naʻá ne lotu ki he Tamai Hēvaní ke tokoniʻi ia, ke toʻo atu ʻene ilifiá.

Naʻe fanongo heni ʻa Sūsana ki ha meʻa. Naʻe ongo vaivai ange ia ʻi he patatō ʻi he funga ʻató. Ko e leʻo ia ʻo ʻene faʻeé, pea naʻe fai ʻene hiva. Naʻe hiva ʻene faʻeé ʻi heʻene hū holo ʻi he falé ʻo fakaʻosiʻosi ʻene ngaahi ngāué pea teuteu ke mohé.

Naʻe leʻo lelei e faē ʻa Sūsaná pea naʻá ne hiva maʻu pē, ka ko e foʻi hiva mālie taha ʻeni kuo fanongo ʻa Sūsana ʻokú ne hivaʻí. Neongo naʻe ʻikai ke ʻilo ʻe Sūsana ʻa e fasí, ka ko e ngaahi leá naʻe kau ia kia Sīsū. Naʻe fakafonuʻaki ia ʻe he foʻi hivá ha nonga.

Naʻe fakamālō ʻa Sūsana ki he Tamai Hēvaní, hili iá pea toe kaka hake ki mohenga mo fanongo pē ki he hiva ʻa ʻene faʻeé. Naʻe toe tō hono loʻimatá, ka ko ha loʻimata ʻeni ʻo e fakafetaʻi mo e ongoʻi fiemālie. Naʻá ne ongoʻi ʻoku lelei e meʻa kotoa pē. Naʻá ne ʻiloʻi ʻokú ne maʻu ha fāmili ʻofa. Naʻá ne ʻiloʻi ʻoku tokanga mai ʻa e Tamai Hēvaní kiate ia. Naʻe tui ʻe ʻi ai maʻu pē ha ʻuhinga ke ne ʻamanaki lelei ai, neongo pe ko e hā ha meʻa ʻe hoko. Naʻe ʻiloʻi ʻe Sūsana ko e fē pē ha taimi naʻe ngalingali ʻe lavaʻi ai ia ʻe he ilifiá, ʻe lava ke ne maʻu ha nonga ʻi haʻane manatu pē ki he pō ko ia naʻe mālohi ange ai ʻa e foʻi hiva ʻa ʻene faʻeé ʻi he ilifiá.