Lototele e Ola i le Talalelei

Sa laitiiti lo’u tamā o Keti, i Polani i le taimi o le Taua Lona Lua o le Lalolagi. Sa masani ona ia lagona le fiaai, maalili, ma le fefe. Ona tupu ai lea o se mea matagofie lava. Sa valaaulia o ia e lana uo o Oto Keleta e 10 tausaga o lona matua la te o i le Aoga Sa faatasi ma tagata O Le Ekalesia a Iesu Keriso o le Au Paia o Aso e Gata Ai. I le Aoga Sa, sa aoaoina ai e Keti ma Oto o i laua o fanau a le Atua. Sa latou usuina ni pese. Sa latou aoao e tatalo. Sa fiafia Keti i le lagona sa ia lagonaina pe a alu i le lotu: toafilemu ma fiafia. Sa fai atu o ia i ona matua ma lona tuafafine latou te o i le lotu. E lei umi ae papatisoina loa lo’u tama ma lona aiga. Sa fesoasoani le talalelei a Iesu Keriso ina ia latou lagonaina le totoa i taimi faigata.

Sa ese lava le atamai o lo’u tama, ma sa manao e aoga i se iunivesite. O le taimi lena i le faigamalo sa nofo ai o ia, latou te filifilia po o ai e mafai ona aooga i iunivesite ae o ai e le mafai. Sa le mananao le malo ia talitonu tagata i le Atua. Sa latou fai atu ia tama e mafai ona aoga o ia i le iunivesite pe afai o le a le toe auai i le Ekalesia ma tuu lona talanoa e uiga i le Tama Faalelagi ma Iesu Keriso.

Sa iloa e lo’u tama e le mafai ona ia faafitia lana ekalesia. Nai lo lena, sa la’ua filifili ma lo’u tina o Heta, e tuua lo laua fale. Sa la malaga atu i se nofoaafi mo Siamani i Sisifo, ma tatalo ina ia mafai ona faatagaina i laua e ulufale atu i lena atunuu. Ina ua oo atu i le tuaoi [o atunuu] sa le’i siakiina e alii leoleo na siakiina nofoaafi le potu sa i ai ou matua. O lea sa mafai ai ona la amataina se olaga fou i se atunuu e mafai ona la tapuai ai i le Atua. E lua masina mulimuli ane, ae ou fanau loa.

E pei foi o ou matua, sa ou manaomia le lototele e ola ai i le talalelei. E tasi se tausaga sa ou i ai o se fitafita i le ami a Siamani. O le toatele lava o fitafita e tautatala i gagana masoa, ulaula, ma fai isi mea sa ou iloaina e le tatau ona ou faia. O nisi taimi sa ou lagonaina ai le tuua toatasi, ae ou te taumafai lava e tausia tulaga faatonuina a le Tama Faalelagi. Sa faaaloalogia e ou taitai la’u tautinoga [i le ekalesia] ma faatagaina au ou te auai i gaoioiga a le Ekalesia.

I po mulimuli o se auaunaga a se fitafita, e inupia faatasi ai le fitafita ma ana uo ma fai ai se pati pisapisao. Sa ou mafaufau ma tatalo i se mea e tatau ona ou faia pe a oo mai lo’u po mulimuli. Ina ua oo i lo’u po mulimuli, sa ou fai atu i le vaega o fitafita sa matou galulue faatasi, “Tatou faia se mea e le’i faia muamua lava.” Sa matou ofuina o matou suti sili ona lelei ma matou o atu e faatofa filemu atu i o matou taitai o le ami. Sa le talitonu lo matou taitai. Sa ou lagonaina sa taitaiina au e le Tama Faalelagi ia maua se tali i lo’u faafitauli. O le toe tepa i tua, e mafai ona ou iloa ai o faamanuiaga silisili i lo’u olaga, na oo mai ona o le mulimuli i fautuaga a perofeta ma le tausia o poloaiga a le Atua.

O nisi taimi e mananao ai au uo tou te faia ni mea ua e iloa e le sao. Aua nei galo lau folafolaga e te ola i tulaga faatonuina a le Tama Faalelagi. Ao e taumafai e mulimuli i Ana poloaiga, o le a Ia faamanuiaina oe ia iloa upu e tautala ai ma mea e te faia. O le a fesoasoani o Ia ina ia e le lagonaina le fefe. E pei o Oto le uo a lo’u tama, e mafai ona e fetufaai atu i au uo mea ua e iloa e uiga i le Tama Faalelagi ma auala e te lagonaina ai Lona alofa. O lou lototele e fai le mea sao o le a faia ai se eseesega!