Aoauli Faaleaiga

I se tasi aso ao ou i ai i le lotu, sa faamatala mai e se tasi o uso ia te au sa ia lagonaina lava le tuua toatasi. E pei foi o ia, o au foi o se tina ua maliu lo’u toalua, ma ou te nofo foi na o au. E lei umi, ae oso mai loa se manatu: aisea ma te le faatasitasi ai i Aso Gafua e fai a ma afiafi faaleaiga? E mafai foi ona ma valaaulia isi foi uso e nonofo foi na o i latou.

Sa ou faia sina suesuega laitiiti ma maua ai e toavalu tamaitai o le matou uarota atonu e mafai ona auai mai. E toaono ua maliliu o latou taitoalua, e toatasi e nofofua, ae o le isi o lona toalua e le auai i le Ekalesia.

Faatasi ai ma le faamaoniga a lo’u epikopo, sa ou fuafuaina ai loa mo i latou uma ia faia faatasi ni a matou “aoauli” faaleaiga. (Matou te vave faia ona o le toatele o i matou e faalelelei le vaai ma matou te le fia feoai foi i le pogisa.) E feauauai ona matou faatasitasi i fale o tagata taitoatasi ma saunia se lesona puupuu. Atonu o le mea aupito taua na tupu mai ona o lenei mea, o se lagona moni o le faauoga lea na fusia faatasi ai i matou o ni uso i le alofa.

Matou te tulimatai uma lava i a matou “aoauli” faaleaiga. Matou te lagona le fiafia i le aoao faatasi i le talalelei, ma fiafia i faauoga matagofie lea e faamalolosia ai o matou faatuatua ma lo matou alofa i le Alii o Iesu Keriso.