Teuina o Meaai a le Aiga: O Se Savali Fou

Amata i mea laiti ma fai le mea sili e te mafaia. Amata i le faatauina o nai aitema faaopoopo e faaopoopo i au meaai e teu i vaiaso taitasi. Taumafai e faaputu se sapalai o se vaiaso se tasi; ona faatele atu lea i se sapalai o se masina se tasi, ma faasolo atu ai i se sapalai o le tolu masina. O le faaputuputuina malie o lau sapalai, e mafai ai ona e aluese mai faafitauli tautupe ma e amata uia ai le ala e agai atu i le faalagolago o le tagata ia te ia lava.

Ua iloa e le aiga o Lugo i Valencia, Venesuela, o lenei faiga fou o le amatamata malie atu ma le faifai soo, e tauia ai i ni vaega tetele. Ina ua uma ona faalogologo i le konafesi aoao, na lagona ai e Uso Omar Lugo, o se tagata o le Ekalesia i le Itu o Falcón Venesuela, le musuia e amata ona teuina ni ana meaai. Sa ia talanoaina lea mataupu ma lona aiga, ma sa latou ioe ai e mulimuli i le fautuaga a le perofeta.

Na amata ona latou tuueseina ni meaai, vai, ma tupe, o le taimi lava ma sina mea itiiti. O le taimi muamua sa faigata ai lava ona iloa se eseesega. Ae ina ua mavae sina taimi na iloa ai e le aiga o Lugo sa latou faaputuputuina ni mea faaleoleo se tele. O ni nai masina talu ona amata faaputuina a latou meaai e teu i le fale, na tulai mai ai se solotetee a tagata faigaluega i Venesuela lea na faaletonu ai le tele o galuega a tagata i le lotoifale. O Uso Lugo o se tasi lea o i latou na iu ina leai ni galuega.

Mo se taimi, sa ola ai lona aiga i a latou tupe na teu. O le fitu masina mulimuli ane na faalagolago tele ai le aiga o Lugo i meaai sa latou teuina. Na toeitiiti atoa le lua tausaga o tau sue se galuega a Uso Lugo, ae sa mafai ona ola lona aiga i luitau faigata o le leai o se galuega. Sa latou faaputuputu malieina a latou mea faaleoleo, ma ina ua oo mai faigata, sa saunia i latou ma sa faamanuiaina i latou e le Alii.

E pei o le aiga o Lugo, o le a faamanuiaina tagata o le Ekalesia ona o lo latou usiusitai i le fautuaga a le Au Peresitene Sili, a o latou faaputuputuina malie a latou meaai e teu i le fale. “Matou te talosaga atu ina ia outou atamamai a o outou teuina ia meaai ma vai ma faaputuputu a outou tupe teu,” na saunoa mai ai le Au Peresitene Sili. “Aua foi nei soona faia; mo se faataitaiga, e le o se faiga faautauta le nofo aitalafu ina ia teuina ai a outou meaai uma i le taimi e tasi.” Ae, ua latou fautuaina se faiga faatauvaa, ma faifaipea. “O le fuafuaina ma le faaeteete, e te mafaia ai i se taimi umi ona faavaeina se sapalai o meaai e teuina i le fale ma se vaega tupe faaleoleo.”²

I taimi e pagatia ai, o le i ai o ni vai e inu e mafai ona fai ma eseesega i le va o le ola ma le oti—pe o soo se tulaga i le va o le toafilemu ma le atuatuvale. Ia sei fesili la i le auaiga o Kawai, o ni tagata o le Siteki a São Paulo Pasila. E 20 tausaga o latou teuina ni meaai ma vai. E ui lava o le latou falemautotogi laitiiti e le tele se avanoa na totoe ai, ae sa filifili lava le auaiga o Kawai e faamuamua le teuina o meaai ma vai i le fale.

Sa faamatala e Tuafafine Kawai e uiga i se tasi aafiaga na aoga tele ai lena filifiliga. “Sa ou i ai i le falemai i le faatoa uma ai ona ou fanau, ae ou iloa ai sa i ai se faaletonu i paipa i le taulaga,” o le tala lea a Tuafafine Kawai. “E faitau selau afe tagata na le maua se suavai. Ae sa ou le popole i le toe foi atu i le fale. Sa toafilemu lo’u mafaufau i le iloaina o le a i ai ni vai e inu a lo’u aiga.”

Mai le Au Peresitene Sili na oo mai ai le fautuaga lenei: “Matou te fautuaina outou pe o fea lava o outou nonofo ai i le lalolagi ina ia saunia mo faigata e ala i le tagatagai i le tulaga o a outou mea tau tupe. Matou te uunaia outou ina ia faautauta i a outou tupe faaalu. … Teu sina tupe e le aunoa, e faifai malie ai lava ona fausia se tupe faaleoleo.”³

I le konafesi aoao ia Aperila 2007 na toe faamamafaina ai e Epikopo Keith B. McMullin, Fesoasoani Lua i le Au Epikopo Pulefaamalumalu lenei mataupu faavae, i le apoapoai atu i tagata o le Ekalesia e “teuina sina tupe, na o ni nai siliva i vaiaso taitasi. O lenei auala faigofie o le a le umi ae mafai ai e i latou ona i ai se faapolopolo mo ni masina se tele.”⁴

O le faaputuputuina malie o se tupe faaleoleo, o le a tatou saunia ai mo tofotofoga e le muai iloaina ma maua ai se fuataga faaopoopo o le saogalemu ma le toafilemu i o tatou loto.

“Mo manaoga mo taimi uumi,” ua faamalamalama mai i le tamaitusi Ia Saunia Mea Tatau Uma, “o meaai ia o le a umi se taimi e lelei ai ma e mafai ona e faaaogaina ina ia ola ai pea, e pei o saito, araisa papae, ma pi.”⁵

O le faatulagaina o le teuga o mea e manaomia mo se taimi umi e faigofie atu nai lo le mea ua manatu i ai nisi tagata. Na faatautaia e Dr. Oscar Pike ma ana paaga o le Matagaluega o Taumafa Paleni, Taumafa Fuafua, ma le Saienisi o Taumafa a le Iunivesite a Polika Iaga, ni suesuega loloto e uiga i le teuina o meaai. Sa latou maua ai se mea e faateia ai: o le teuina faalelei ma le teuina o meaai e maualalo lava le susu, e faatumauina ai le tele o lona tofo lelei ma le tele o lona paleni mo le 20 i le 30 tausaga pe sili atu foi pe a teuina—e sili atu le umi nai lo le manatu sa i ai muamua.

O lona uiga e mafai e tagata o le Ekalesia ona teu ni meaai faapitoa mo se taimi umi e aunoa ma le popole e faaaoga faasolosolo ia meaai. E mafai ona latou toa lelei o le a i ai lava a latou sapalai e tausi ai i latou pe afai ua leai lava nisi mea e ai.