Tatalo mo Tama

Ou te i ai i se aiga e toalima, ma matou te o lava i le lotu i Aso Sa uma, sei vagana ai lou tama. E le o ia o se tagata o le Ekalesia, ma ou te faanoanoa ai lava ona o lenei mea. O ia o se tama lelei ma o nisi taimi e sau ai i pati po o malaga e fuafuaina e le uarota. Ou te fiafia lava pe ana faapea e sau lava i taimi uma.

Sa aoaoina au e lo’u tina i le Peraimeri e faapea, e faafofoga mai le Tama Faalelagi i a tatou tatalo, ma e manao e fesoasoani mai ia i tatou. O lea na ou tatalo ai ina ia fesoasoani mai o Ia i lou tama ia malamalama i le taua tele o le talalelei i lo matou aiga.

I le Aso Toonai, a o ou sauni atu e matamata i le televise, na i ai se mea na tupu ai. Na sau lo’u tama ma fai mai, e i ai mea e sili atu ona fai nai lo le nofonofo i luma o le televise. “Mo se faataitaiga,” sa ia fai mai ai, “o le a sou manatu pe a ou faitau atu ia te oe se tala manaia mai le Liahona?”

O lea sa nofo mai ai loa o ia faatasi ma i matou ma ou tuagane laiti e toalua ma faitau mai loa ia i matou. Ou te le iloa pe na faapefea ona iloa e lo’u tama o ia tala sa i totonu o le Liahona. Ae ua ou iloa na faafofoga mai le Tama Faalelagi i au tatalo ma tali mai i ai, ma pai mai i le loto o lo’u tama o lea sa ia faitauina ai se mea i mekasini a le Ekalesia.

Ou te faafetai i lo’u Tama Faalelagi ona e faafofoga mai o Ia i au tatalo.