Taulai Atu i le Galuega a le Alii o le Faaolataga

Uso Beck: I le avea ai o ni uso o le Aualofa, o le mea muamua lava ma le taua ua tatou aufaatasi ona o lo tatou faatuatua ia Iesu Keriso. O Ia o lo tatou taitai ma le faataitaiga. Ou te molimau atu i le moni o Lana Togiola. Ou te molimau atu o loo soifua o Ia ma o Lona mana e moni.

I le avea ai ma Au Paia o Aso e Gata Ai, ua tatou mananao ai e o mai ia Keriso. Ina ua faatulagaina e le Perofeta o Iosefa Samita le Aualofa, sa saunoa o ia, o tamaitai sa le gata ina latou tausia e matitiva ae ia laveai foi agaga.¹ O lenei mea o loo avea pea ma o tatou faamoemoega. E tatau ona tatou lagolagoina le galuega a le Alii o le faaolataga, ina ia “faataunuu le faaofuina o le tagata i le tino ola pea ma le ola faavavau” (Mose 1:39).

E mafai ona tatou amata e ala i le faamalosia o i tatou lava faaleagaga e ala i le tatalo ma le avea ma tagata e faalagolago ia te ia lava i le malamalama o tusitusiga paia. Tatou te taliaina atoatoa ia sauniga, feagaiga, ma poloaiga ua tuuina mai e le Alii ia i tatou.

E mafai ona tatou fesoasoani e faapotopoto mai Isaraelu na faataapeapeina. O loo i ai sa tatou tiute o le fesoasoani e saunia faifeautalai, ia faasoa atu le talalelei, ma ia fesoasoani e faatumauina i latou ua papatisoina. O loo i ai sa tatou tiutetauave o le saunia o i tatou lava ma tagata o o tatou aiga mo le malumalu. E mafai ona tatou aoina mai o tatou talafaasolopito o aiga ma fesoasoani i fanau a le Alii ina ia faamauina i ni aiga e faavavau.

I le Aualofa, e faasolosolo, ona tatou fesoasoani i le tasi ma le isi, ia o mai ia Keriso e ala i le faia o galuega na faatulagaina ai i tatou e fai.

Uso Beck: E mafai e tamaitai maoae o lenei Ekalesia ona fai lenei mea ma isi mea e tele—ae e le mafai ona tatou faia ia mea uma i le taimi e tasi. O le mea lena e matuai taua ai le faatulagaina o mea e tatau ona faamuamua ma faaaoga o tatou punaoa ma taimi i le mea e sili ona aoga i ai—o le lagolagoina o le galuega a le Alii.

E tatau i uso taitasi ona saili ia maua le Agaga Paia e taialaina o ia. Afai o loo fesoasoani o ia i le Alii i Lana galuega, ua agavaa o ia mo Lana fesoasoani.

Uso Beck: A o ou laitiiti, sa tautua lo’u tama o se peresitene o le misiona e tasi i Pasila. E le’i sili atu ma le 4,000 tagata o le ekalesia—o le toatele o i latou na matuai tele lo latou gafatia ae sa lei saunia i lena taimi e taitai. Sa na o ni nai paranesi sa i ai se Aualofa.

Sa valaauina lo’u tina e faatulaga ni Aualofa i le misiona. Sa le iloa e ia tautala faaPotukale ma sa leai foi ni tusi lesona. Ae o le mea sa ia te ia o se molimau i le talalelei ma i le Aualofa. Sa latou amataina ma ona fesoasoani e ala i le fesoasoani atu i uso e aoao ona avea ma ni faiaoga asiasi.

Sa latou amataina la latou aoaoga faamasani i se paranesi toagaogao i São Paulo. E toafitu ni tamaitai lotomaualalo na auai atu i le fonotaga. O le fesoasoani o lo’u tina o se tamaitai Pasila, sa faafeiloaina ia uso. Ina ua uma le tatalo, sa tulai o ia ma le gatete ma faitau se savali e faamalamalama ai faiaoga asiasi. Ona tutu lea o lo’u tina. Sa na o le fa ni fuaiupu faaPotukale sa ia iloaina: “Ou te iloa o loo soifua le Atua. Ou te iloa o Iesu o le Keriso. Ou te iloa o loo i ai sa tatou perofeta soifua. I le suafa o Iesu Keriso, amene.” Ona maea lea o le fonotaga. Sa ia opoina tamaitai ma faatofa atu ia i latou.

Oka o se amataga faatauvaa lava i se galuega tele! Mulimuli ane, na faatuina ai se Aualofa i paranesi uma lava i Pasila. Sa galulue uso e sauniuni mo se siteki ma se malumalu muamua lava i Amerika i Saute. Sa latou aoao e uiga i sauniga ma feagaiga ma le laveaiina o agaga.

O se vaega, ona sa fesoasoani uso o le Aualofa e faalautele le galuega a le Alii, ua oo nei le aofai o tagata o le Ekalesia i Pasila i le silia ma le miliona. E pei foi o nei uso i Pasila, e tatau foi ona fai la tatou vaega. E leai se isi e mafai ona faia mo i tatou. E le mafai ona tatou faasafuaina atu la tatou tiutetauave mo le fausiaina o le malo i se isi lava tagata. O la tatou galuega lea. Ia tatou uumauina ma ia atamamai i le fausiaina o le faatuatua, faamalolosia o aiga, ma le tuuina atu o le toomaga.

Uso Beck: A o tatou faatinoina le galuega a le Alii o le faaolaina ma le faamanuiaina o olaga, tatou te lotogatasi ai ma mafai ona tatou aumaia faamanuiaga o le lagi. O loo i ai sa’u vaaiga mamao i tamaitai o lenei Ekalesia ua aufaatasi i ni auala mamana. Ou te talitonu afai tatou te taulai atu i mea e taua ae faatuatuanai i mea faavalevalea, o le a tatou maua le to’a ma e faagaeetia ai o tatou agaga. O le a lelei atu ona tatou taulimaina ma tuuitiitia ai le lagonaina o le avea ma se avega. Ioe, o le a tatou pisi pea, ae o le a tatou pisi i le faiga o le galuega o le faaolataga.

Uso Beck: E fesoaaoani le Aualofa i le tuuina mai o puipuiga i nei taimi faigata. O lesona i le Aso Sa, gaoioiga ma fonotaga a le Aualofa, ma faiaoga asiasi o auala ia tatou te faia ai le galuega a le Alii ma faamalolosia ai tagata taitoatasi ma aiga.

E ui ina tatou fetaiai ma tulaga e pei o le tetea, le usiusitai, aitalafu, popolevale, paie, ma mea e avea ma mausa, e le mafai ona galo ia i tatou o loo tatou ola foi i taimi ua liligi mai ai le Agaga o le Alii i o tatou luga. O aso nei ua talaiina atu ai le talalelei i le lalolagi atoa, ua faapotopotoina ai le fanauga a Isaraelu, ua i ai malumalu i luga o le fogaeleele, ma ua tatou maua le puipuiga a feagaiga ma sauniga o le perisitua.

E tatau ona tatou ole atu mo se vaaiga lautele atu ina ia iloa ai mea ua silafia e le Alii. E tele atu lenei galuega nai lo mea ua tatou iloaina. E mafai ona tatou manumalo i le fili taufaasese ma le malosi. E mafai ma e tatau ona avea o tatou fale ma nofoaga o le sulufaiga.

Uso Beck: O le faamoemoega o a tatou sauniga i Aso Sa ina ia tatou aoao faatasi i aoaoga faavae o le talalelei. O tamaitai o e ua valaauina e galulue i le Peraimeri, Tamaitai Talavou, ma isi eria e aoao foi i aoaoga faavae o le talalelei i o latou valaauga. Ona e taua tele a tatou mataupu aoaoina, o lea e tatau ai ona tatou faapuupuuina ma faamamalu le vaega amata o le Aualofa ina ia mafai ona maua ai le Agaga mo le aoaoina o le talalelei lea e mulimuli mai ai.

I le Aualofa tatou te aoao ai Aoaoga a Peresitene o le Ekalesia, o se faasologa o tusi lesona o loo maua ai aoaoga faaperofeta ma se fatatusi a le tagata lava ia o aoaoga a na tamalii ma tamaitai o le Ekalesia. O saunoaga a perofeta e manino lava ma musuia. E le mafai—e le tatau ona tatou—faaleano ma lē manatu mamafa i a tatou suesuega o ia aoaoga.

O loo tatou aoaoina saunoaga a le Perofeta o Iosefa Samita mai le tuufaatasiga aupito sili ona lelei o ana galuega ua faia. O lenei tusi lesona o le taunuuga lea o sailiiliga ma iloiloga maeaea i le tele o tausaga. E ui o tusitusiga paia ma mekasini a le Ekalesia e mafai ona faaoaina ai se talanoaga, ae e le manaomia ona tatou faaopoopoina ia saunoaga a perofeta i nisi punaoa, ae maise lava o punaoa e le o ni mea a le Ekalesia.

Tatou te valaau atu i o tatou faiaoga ina ia fesiligia ni fesili malamalama ma uunaia ai ni fetufaaiga faamaoni. O le Agaga o le faiaoga lea, ma e tatau ona tatou saunia i se auala o le a faapea ona auai mai ai o Ia i lesona i Aso Sa uma lava.

Uso Beck: I fonotaga a le Aualofa i aso o le vaiaso, tatou te faatatauina ai aoaoga faavae o le faaolataga. O lo tatou lotogatasi ma le faaleusoga o le a oo mai lava i se tulaga faalenatura o se taunuuga o le galulue faatasi. Mo se faataitaiga, e mafai ona tatou aoaoina ni tomai mo le fetufaaiina atu o le talalelei ma le sauniaina o faifeautalai. E mafai ona tatou aoao e uiga i le tasi ma le isi e ala i talafaasolopito o aiga. A o tatou faaleleia atili o tatou tomai faatausiaiga e pei o le tapenaina, faatulagaina, kuka, suisui, ma le fai togalaau, tatou te aoao ai ona fatufatu se taimi o le faafaileleina ma le tuputupu ae faaleagaga i o tatou aiga.

E tatau foi ona tatou aoao ia faalagolago le tagata ia te ia lava i mea faaleolaga nei e pei o se aoaoga, atinaega o se matata, ma le malamalama i auala faatekinolosi. E tatau ona tatou teuina se sapalai o meaai, ma e tatau ona tatou iloa paketi a tatou tupe. E tatau foi ona tatou galulue e faaleleia le soifua maloloina o le tino ma le mafaufau.

Pe a fuafuaina nei fonotaga ma gaoioiga, e tatau ona tatou iloiloina a tatou punaoa faapelepele o le taimi, malosi, ma tupe paia. Ia tau lava o le fesoasoani ia i tatou ia ola i le talalelei i o tatou aiga ma faalautele ai le galuega a le Alii e faaaoga i ai.

Uso Beck: O o tatou tamaitai talavou talenia o loo sopoia le alalaupapa mai le autalavou i le tulaga faatamaitai matua, ma ua i ai i uso o le Aualofa le tiute o le vaai lea e leai se tasi o i latou e se ese.

Ua aoaoina tamaitai talavou ina ia tausia a latou feagaiga o le papatisoga, ma i le Aualofa tatou te fesoasoani ai ia i latou ia saunia e osia feagaiga o le malumalu. O uso o le Aualofa e tai sefuluvalu tausaga e mafai ona taitai i ni komiti, aoao ni tomai, fesoasoani i le galuega faafaifeautalai, auauna atu o ni faiaoga asiasi, auai i galuega faatino o talafaasolopito o aiga ma le malumalu, ma ia auai atoatoa i le galuega o le faaolaina o agaga.

Uso Beck: O faiaoga asiasi e auauna atu e fai ma sui o le Faaola. O o tatou lima o Ona aao ia, o lo tatou alofa o Lona alofa lea, ma o la tatou auaunaga o Lana auaunaga lea.² O faiaoga asiasi lelei latou te iloa ia uso o loo latou asia. Latou te alolofa ia i latou, auauna atu ia i latou, ma fesoasoani ia i latou e aoao le talalelei e ala i le Agaga. Latou te taulai atu i le faamalolosia o aiga ma olaga. E leai se isi avanoa e sili atu nai lo le vaavaaia ma le faamalolosia o le isi tagata—e moni lava o le galuega o le faaolataga.

Uso Beck: Sa matou feiloai ma se vaega o tamaitai minisita o kapeneta ma sui o le palemene mai Aferika i Sisifo o e na fesili mai ia te au pe o a ni auala tatou te fesoasoani atu ai i tamaitai Aferika. Sa ou faamalamalama atu i ai e faapea, i totonu o o latou atunuu e tele ni a tatou vaega o tamaitai ua faatulagaina ua taua o Aualofa. Tatou te auina atu le Tusitaulima o Faatonuga a le Ekalesia i le peresitene o vaega taitasi. E masani ona faapotopoto tamaitai e suesue i le talalelei ma aoao i auala e tausi ai o latou aiga.

E vaevae e le peresitene ia tamaitai o le Aualofa ia taitoalua e asia ia tamaitai i o latou aiga, lea latou te iloiloina ai o latou manaoga. E i ai se tasi o gasegase? O lava a latou meaai ma lavalava? O latou maua aoaoga o loo latou manaomia? A maea ia asiasiga, e lipoti atu e tamaitai ia mea na latou mauaina. E i ai se tagata o loo moomia ni seevae, o se tagata o le a fanau, ma o se tasi o i latou e manaomia se galuega. Latou te fesili atu pe o i ai i la latou vaega ia punaoa o loo manaomia. O le tele lava o taimi e i ai. O le mea lena tatou te faia mo o tatou tamaitai i Aferika.

A o ou talanoa atu i ai, sa luelue ulu o nei tamaitai ma ataata. Sa fai mai se tasi o i latou ia te au, “O lena faiga o le a aoga mo o matou tamaitai.”

Ou te talitonu o le Aualofa o se faataitaiga e aoga i le lalolagi atoa ma o o tatou uso o ni tamaitai aupito lelei, sili ona gafataulimaina, ma o se malosiaga maoae mo le lelei i le lalolagi i le aso. Ou te talitonu tele i o tatou tomai i le faalauteleina faatasi o le galuega a le Alii o le faaolataga.