Lagolago, Faafailele, ma Puipui le Aiga

O Le Au Peresitene Sili ma le Korama a Aposetolo e Toasefululua: “O le aiga ua faauuina e le Atua. O le faaipoipoga i le va o le alii ma le tamaitai e taua i Lana fuafuaga e faavavau. E tatau ona fanauina fanau i totonu o le feagaiga o le faaipoipoga, ma ia tausia e se tama ma se tina o e ua faamamaluina ma le faatuatua atoatoa feagaiga faaleulugalii” (“O Le Aiga: O Se Folafolaga i le Lalolagi,” Liahona, Oke. 2004, 49; Ensign, Nov. 1995, 102).

Julie B. Beck, peresitene aoao o le Aualofa: “I le avea ai ma se soo o Iesu Keriso, ua tuuina mai i tamaitai uma o lenei Ekalesia le tiutetauave mo le tausiga, faafailele, ma le puipuia o aiga. Ua i ai i tamaitai ni tofiga tulaga ese na tuuina atu ia te i latou a o lei faavaeina le lalolagi. Ma i le avea ai ma se tamaitai o le Au Paia o Aso e Gata Ai e tausia feagaiga, ua e silafia o le sii ae o lou leo i le puipuia o le aoaoga faavae o le aiga, e taua mo le malosiaga o aiga i le lalolagi atoa,” Liahona ma le Ensign, Nov. 2007, 110).

MFF 88:119: “Ia faatuina se fale, o se fale tatalo lea, o se fale o le anapogi, o se fale o le faatuatua, o se fale o le aoaoga, o se fale o le mamalu, o se fale o le tulaga maopoopo atoatoa, o se fale o le Atua.”

Peresitene Spencer W. Kimball (1895–1985): “O le aiga o se sulufaiga mai faigata ma faafitauli o le olaga. O le faaleagaga e fanau mai ma faafaileleina e ala i le tatalo i aso uma, suesueina o tusitusiga paia, talanoaina faaleaiga o le talalelei ma gaoioiga e faatatau i ai, afiafi faaleaiga, fonotaga faaleaiga, galulue ma taaalo faatasi, auauna atu o le tasi i le isi, ma le fetufaai atu o le talalelei ia i latou o loo siomia i tatou. O le faaleagaga e faafaileleina foi i a tatou amioga o le onosai, agalelei, ma le faamagalo atu o le tasi i le isi ma lo tatou faatatauina o mataupu faavae o le talalelei i le lio o le aiga” (“Therefore I Was Taught,” Liahona, Aok. 1982, 2; Ensign, Ian. 1982, 3).

Elder M. Russell Ballard o le Korama a Aposetolo e Toasefululua: “Ou te valaau atu i tagata o le Ekalesia ma matua faamaoni, matua o matua, ma tagata o aiga lautele i soo se mea ina ia ola ai i lenei folafolaga maoae [o le aiga], ia avea e pei o se tagavai e pei o le ‘tagavai o le saolotoga’ a le Taitaiau o Moronae, ma ia tautino atu o tatou tagata ina ia ola ai i ona mataupu. …

“I le lalolagi i aso nei, lea ua matuai malosi ai lava osofaiga a Satani i le aiga, e tatau i matua ona faia mea uma latou te mafaia ina ia faamalolosia ma puipuia ai o latou aiga. Ae atonu o le a le lava a latou taumafaiga. O la tatou faalapotopotoga faavae muamua lava o le aiga ma e moomia le fesoasoani ma le lagolago mai le aiga lautele ma isi faalapotopotoga lautele o loo siomia i tatou” (“O Le Mea e Sili Ona Taua E Sili Atu Foi Ona Umi,” Liahona ma le Ensign, Nov. 2005, 42–43).

Elder Robert S. Wood o le Au Fitugafulu: “Ua toatele naua tagata, ua foliga mai e faaiuina tiutetauave i le popole ma le le fiafia. Ae o le tautala ae leai se faatinoga e itiiti lava se mea e ausia ai. E tatau ona tatou matuai galulue i le lalolagi. Afai e le lava pe faaletonu foi uiga o le amio lelei i a tatou aoga, e tatau ona tatou galulue ma tagata o le alalafaga e faia se suiga. Afai e le o saogalemu pe le o ola maloloina tagata o o tatou pitonuu, e tatau ona tatou auai faatasi ma tagata ua malilie e vaaia manaoga o alalafaga e fuafuaina ni fofo. Afai ua leaga o tatou taulaga ma aai, e le gata ona o kasa oona ae faapea foi i mausa e faatamaia ai le tagata ma amioga faatufanua, e tatau ona tatou galulue e saili ni auala talafeagai e tuumamaina ai ia mea leaga faapea. … Ua ia i tatou le tiutetauave o le avea ma se faamanuiaga i isi, i lo tatou atunuu, i le lalolagi” (“On the Responsible Self,” Ensign, Mat. 2002, 30–31).