Agaga Tatalo i le [Tusi] Alualu i Luma o le Tagata Lava Ia

Ina ua sui la’u aoga, sa avea se tasi o teineitiiti e le auai i le Ekalesia ma au uo lelei lava. Ae ina ua mavae ni tausaga se lua o avea o ia ma au uo, sa amata ona ia lagona le matau’a i le Ekalesia, ona o taimi uma lava ou te alu ai i gaoioiga ae sa le tele se taimi e faaaluina faatasi ma ia. Sa faateteleina ona faaletonu lea tulaga—e ui ina sa ou manao lava e avea o ia ma au uo.

I se tasi aso ao ou galue ai i lau tusi o le Alualu i Luma o le Tagata Lava Ia, sa amata ona ou galue i se aafiaga lea na aofia ai le tatalo e le aunoa mo ni vaiaso se lua. O se tasi o mea sa ou filifili ou te tatalo i ai, ia mafai lea ona faaaloalo la’u uo ia te au ma ia malamalama e taua tele le Ekalesia ia te au. O le lua vaiaso mulimuli ane, ina ua maea lea aafiaga, sa faaauau pea ona ou tatalo mo lea lava mea e tasi.

Mulimuli ane ina ua ou toe iloiloina la’u tusi o le Alualu i Luma o le Tagata Lava Ia, sa ou toe manatua ai lo’u aafiaga i le tatalo. A o ou mafaufau atili i ai, sa ou iloaina ai sa tali mai e le Tama Faalelagi au tatalo e uiga i la’u uo. Sa matuai sui lava la’u uo; sa le toe mafaufau o ia ia te au e pei ona sa masani ai, ma sa amata ona mafaufau o ia e uiga i le Ekalesia i se auala lelei.

Sa ou lagona lava le ootia tele ona ua ou maua nei se molimau e uiga i le tatalo faamaoni. Ou te iloa na suia e lo’u Tama Faalelagi le loto o la’u uo. Ua ou iloa foi o le a fesoasoani mai o Ia ia i tatou ma o le a Ia faia vavega pe afai tatou te faia la tatou vaega.