I le Faaatoatoaina

I lo’u tuputupu ae, sa ou tausili ai lava i taimi uma i le atoatoa. O lea ina ua maua lou faamanuiaga faapeteriaka, e tasi se apoapoaiga na foliga mai o se mea ua masani ai: o le faataunuu lea o galuega na tuuina mai ia te au “i le mea sili [ou te] mafaia, i le atoatoa.” Ae o se taimi mulimuli ane na amata ai ona ou iloa le laitiiti o lo’u malamalama i le atoatoa—po o le matafaioi o le alofa tunoa.

I le 1998 na ou vave foi ai i lo’u aiga mai se misiona ona o ni faafitauli i lo’u ola maloloina. Sa matuai ou lagonaina lava le tausalaina ona na ou lagonaina ou te lei faamaeaina lau misiona “i le atoatoa.” Na faaopoopo mai i lenei lagona o le toilalo lo’u le mautonu i lo’u ma’i. O le mea na i ai, sa le iloa e fomai po o le a lo’u ma’i.

E ui lava i luitau o lo’u ola maloloina, ae sa ou iloaina e tatau ona ou agai i luma, o lea na ou lesitala ai i se iunivesite e faaauau au aoaoga. Ae peitai, i le mavae ai o ni kuata se lua, sa ou toe foi foi i lou aiga mo se taotoga faatopetope ona o le tiga. O le taimi lava lena na faatoa iloa ai e fomai o lo’u ma’i na mafua mai i se faama’i na amata mai i lo’u lava tino.

A o ou faatalitali mo le malosi atoatoa mai lo’u taotoga, sa amata ona ou faigaluega faavaitaimi i se faleoloa fai sukalati lea sa ou faigaluega ai a o ou talavou. E ui lava ina sa ou faia lea mea na ou mafaia, ae ou te lei lagonaina sa ou faia se mea aoga, ia pe o le faamaeaina foi “i le atoatoa.” Sa amata ona ou faatusatusaina au lava i isi, ae maise lava i au uo o e na faamaeaina a latou faailoga i kolisi, faia ni misiona, ma amataina ni aiga. Sa ou lagonaina lo’u mamao i tua [mai au uo].

Ona ou feiloai lea ia Sitefani. Sa sau o ia i le faleoloa i se tasi aso e fusi mai lona ulu i se sikafu lanu uliuli. A o ou faasinoina atu ia te ia le sukalati ou te fiafia lava i ai, sa uunaia au e fesili i lona tulaga. Sa ataata o ia, ma aveese le sikafu mai lona ulu, ma faasino atu i lona ulupoo, ma fai mai sa fai ana togafitiga e faaaoga ai vailaau kemikolo. O lena talanoaga na amatalia ai se faauoga faapitoa ma le faatuatuaina.

Sa sau lava Sitefani i le faleoloa e fiafia ai i se mataiai faapitoa ma talanoa e uiga i le olaga. Sa ou iloaina o ia o se tagata o le Ekalesia, ma sa tauivi o ia i le faaleagaga ma le faaletino. Sa ia faamatala mai ia te au e uiga i nisi o filifiliga faalogogata sa ia faia ma ana taumafaiga e salamo ai. Sa galue malosi o ia ina ia faamauina i lana tane i le malumalu.

I se tasi aso sa ou faasoa atu foi i ai nisi o ou lava luitau. Sa ou tauina atu foi ia te ia lo’u lotovaivai ona o ou tulaga. “O loo ou asuina lava le aisakulimi lea e tasi sa ou asuina i le aoga maualuga,” o lau tala atu lea. “E lei uma la’u misiona po o le kolisi, ma ua ou le iloa po o le a le mea o le a fai nei.”

Sa tali mai Sitefani, “Aisea e tatau ai ona e faaumaina le tuuga o le olaga i se taimi tuupoina? Aisea e le tau ai na o lou tamoe i le tuuga?”

Mo le taimi muamua lava, na ou iloaina ai o taumafaiga sa ou faia o mea sili ia ona lelei sa ou faia, ma sa lava ma totoe ia mea sili na ou faia. E alofa le Faaola ia te au, ma o Lona alofa tunoa, e ala mai i Lana Togiola, ua lava lea mo au, mo ou vaivaiga. E ui ina sa ou lagonaina sa ou sailia o Ia i lenei taimi atoa, seia oo ina faasoa mai e Sitefani ona manatu, ae na ou misia lava se lesona faapitoa e uiga i Lana matafaioi i lou olaga.

Fai mai le Eteru 12:27 “Ua lava lo’u alofa tunoa i tagata uma o e faamaulaloina i latou lava i o’u luma; aua afai latou te faamaulaloina i latou lava i ou luma, ma faatuatua ia te au, ona ou faia lea o mea vaivai ma mea malolosi ia te i latou.” Ina ua mafai ona ou faamaualaloina au lava ma maua le faatuatua i le Alii, ua ou vaaia ai pea lava pea Na te faia moni lava mea vaivai ma mea malolosi. O lau molimau faateleina e uiga i lenei upumoni ua fesoasoani ia te au e fetaiai ai ma ou luitau faatasi ma se faatuatua ma se faamoemoe sili atu.

O ni nai masina talu ona uma lena talanoaga, sa ou tuua ai lou nuu mo le amataina o se galuega fou ma sa ma le toe fesootai ai ma la’u uo. I se tasi aso na telefoni mai ai lo’u tina ma tau mai sa vaai i le faasilasilaga o le maliu o Sitefani i le nusipepa. Sa ou sau i le matou aiga ina ia ou auai i lona maliu ma iloa ai sa faamauina o ia i lana tane i le na o le tolu vaiaso na muamua atu a o lei maliu o ia.

Sa mapuea lo’u loto i le agaga faafetai ona o le oo mai o Sitefani i lou olaga ma mea sa ia aoaoina ai au e uiga i le tamoega i se tuuga atoatoa. Ou te le tau tamoe saosaoa i taimi uma. E seasea lava, ae o mea uma lava e mafai ona ou faia e fetaiai ai ma le tini. O le faia o le mea sili tatou te mafaia e agai ai i luma—tusa lava pe o le a le saoasaoa “o le mea sili tatou te mafaia” e—le afaina lea. E mafai ona faaatoatoaina a tatou taumafaiga aua ua lava le alofa tunoa o le Alii mo i tatou uma (tagai Moronae 10:32).