O La’u Taua Muamua

Ina ua 17 ou tausaga, sa ou lesitala ai i le Ami Faaleoleo a le Royal Canadian. Sa auina atu au i se nofoaga mo aoaoga faamasani, ma mo le taimi muamua i lo’u olaga, sa tuua ai na o au e filifili le ala o lou olaga. Sa ou faapea o le a faaosoosoina au ia aua nei tumau lo’u malosi i le ekalesia ma o le a luitauina la’u molimau.

Ina ua ou taunuu atu i le nofoaga autu, sa ave matou e le satini sa faatautaia le aoaoga mo se maimoaga taamilo i fale ma lotu eseese. Sa uunaia au ou te fesili po o fea e tu ai le paranesi a le AAG. Sa tu le satini mo sina taimi. Ona ia fai mai lea, e le o i ai se Ekalesia a le AAG i le nofoaga a le ami, ae afai ou te fia alu i le lotu, e mafai ona matou o ma lona toalua. O ia o se tagata e le’i leva ona liliu mai i le Ekalesia ma sa fiafia lava na te aveina soo se tasi e manao e alu. Sa ou fiafia i le maua ai o le filifiliga ou te alu, e ui ina ou te lei filifili pe o le a ou alu i lena Aso Sa. Ma le isi, sa na o au ma na ou saoloto nei e filifili mo au lava. Ae na tau mai e se mea o lo’u loto e tatau ona ou alu.

O le po o le Aso Toonai lena, o se tasi lea o po sa sili ona faigata i lo’u olaga. Sa ou tauina lea aafiaga o la’u “laau o le ola.” Sa amataina ina ua mananao au uo matou te tafafao faatasi i le potutele o le faleaiga. Sa ou iloaina lava o le a latou inu pia ai, ma o lea na ou fai atu i ai e tatau ona ou moe ona ou te fia alapo mo le lotu. Sa latou talie i la’u filifiliga ma o lava.

Ina ua latou tuumuli, sa ou faapalasi i luga o lo’u moega. Mai lo’u moega, sa mafai ona ou vaavaai atu i fafo o le faamalama ma matamata atu i au uo sa i luma o le faapaologa o le faleaiga, o inupia ma talie. Ou te manatua lo latou taufaalilili mai ia te au ona o lo’u le auai faatasi ma i latou. Sa ou lagonaina lava le pei ou te vaai faalemafaufau i lagona na oo ia Liae ina ua ia vaai atu i le faletele i le vateatea, lea foi na talie mai ai tagata ia te ia (tagai 1 Nifae 8:26–27). Sa ou faliu ese ina ia ou faasaga atu i la’u kesi, ae na ou iloa atu ai au tusitusiga paia. Sa ou susueina ma le naunautai ma amata loa ona faitau. O au ai uamea nei, e pei lava ona faasaogalemuina e le afioga a le Atua le aiga o Liae, sa ou iloa foi o le a faapena foi ona latou puipuia au.

Ou te le manatua mea na ou faitauina i lena po, ae ou te manatuaina le Agaga na ou lagonaina. Sa ou toe lagonaina foi ina ua ou alu i le lotu i le taeao na sosoo ai. O le auai atu i le lotu i Aso Sa uma lava a o ou nofo ai i le nofoaga o le ami, na ou fausia ai se molimau mausali e uiga i le talalelei a Iesu Keriso. Talu mai lava lo’u taimi i le tolauapiga o aoaoga faamasani, sa ou maua ai le avanoa e faasoa atu ai la’u molimau i isi o se faifeautalai faamisiona i le Misiona a Kalefonia Sacramento.