O Le Ekalesia Moni

O la’u molimau o le Ekalesia moni lenei sa amataina mai i lo’u laitiiti. O se tasi o mea ou te manatuaina i lo’u laitiiti o se sauniga lea o le konafesi. Sa lauga ai se tamaloa ou te le iloaina. Na pau le ma na ou iloa o ia o se tagata na auina atu i si o matou tamai itu i le misona e se tasi sa umia le perisitua. Ou te le iloa mea sa ia tautala ai. Ae sa ou maua se molimau mamana, a e lei atoa le valu o o’u tausaga, ou te lei papatiso foi, sa ou faalogo i se auauna a le Atua i le Ekalseia moni a Iesu Keriso.

I tausaga o lo’u talavou, sa ou lagonaina ai le mana o korama a le perisitua faapea ma se epikopo alofa. Ou te manatua pea ma mafai ona ou lagonaina le mautinoa na oo mai a o o’u nofo i se korama a ositaulaga e sosoo ma se epikopo ma iloa ai o loo ia te ia ki o se faamasino moni ia Isaraelu.

Na vave foi ona oo mai lena lava molimau i lo’u olaga, i ni Aso Sa se lua. I tulaga nei taitasi, sa ou i ai i le aso sa faatulagaina ai se siteki. Na foliga mai o alii e masani ai sa ou iloaina lelei sa valaauina o ni peresitene o siteki. Sa sii i luga lo’u lima i na aso e pei ona outou faia i le aso ma maua se molimau na oo mai ia te au faapea ua valaauina e le Atua Ana auauna ma o le a faamanuiaina au i la latou auaunaga ma mo le lagolagoina o i latou. Ua le mafaitaulia foi ona ou lagonaina lena vavega i le Ekalesia.

Sa ou vaaia le siitia i luga o na peresitene o siteki i o latou valaauga. Ua ou vaaia foi lena lava vavega i le auaunaga a Peresitene Monson ina ua ia maua le valaauga e avea ai ma perofeta ma Peresitene o le Ekalesia ma faaaogaina ki uma o le perisitua i le lalolagi. Na oo mai faaaliga ma musumusuga ia te ia a o o’u i ai, lea ua faamautuina ai ia te au o loo faamamaluina e le Atua na ki. O au o se molimau ua vaaitino i ai.

Ou te tuuina atu ia te outou la’u molimau paia o le Ekalesia moni lenei ma le ola a Iesu Keriso. O le a tali mai e le Tama Faalelagi a outou tatalo faamaoni ina ia outou iloa ai lenei mea mo outou lava.