Tu Atu mo Kalepo

Sa amataina na pei lava o isi aso i le aoga. Sa tusitusi lo matou faiaoga o Miss Blackstock i luga o le laupapa, ae o loo ou saofai i lau kesi ma ou miti i ou mafaufauga. Ona savavali mai ai lea o le matou puleaoga faatasi ma se tamaititi ou te lei vaai muamua lava i ai. Sa musumusu atu e le puleaoga se mea i le taliga o Miss Blackstock, ma sa fifilemu tagata uma a o tau faalogologo atu i ai.

Sa tutu le tamaitiiti i luma o le vasega a o faataupupula atu i ai isi tamaiti. O lona ofutino matafi e oo foi. Sa i ai se masae i le tulivaeo lona ofuvae. Faatasi ai ma ona tauau ua faatautau, sa ia tuu ai ona lima i totonu o ana taga ma faatausisila lava i le foloa.

Ina ua aluese le puleaoga, sa faapea mai loa Miss Blackstock, “Vasega, ia ou te manao ina ia outou feiloai ia Kalepo Sanders. Faatoa me’i mai o ia mai Monatana. E fai lava si mamao o [Monatana] mai iinei! Kalepo, alu e nofo i le nofoa o loo i tafatafa o Luka.”

Sa tusi atu o ia i le nofoa sa i talane o lo’u nofoa, ma sa tilotilo atu le vasega a o savali atu Kalepo ma le popole i lona nofoaga. Ina ua toe liliu Miss Blackstock i le laupapa, sa tumu le potu i femusuaiga. O nisi o tamaiti sa faia ni upu faatiga e uiga i le faiga o lavalava o Kalepo.

“Sei vaai e ese lava nei seevae,” o le tala lea a se tasi.

“E mafai lava ona savali sopo ai o ia i luga o le Himeleia i seevae la!” o le faaopoopo mai lea a le isi tamaitiiti.

Sa ou tilotilo atu ia Kalepo, ae sa na o lona saofai lava ma faataupupula i le itulau avanoa o lana api ma uu lana penitala. Na ou iloaina sa ia lagonaina lava nei tala aua na ou vaai atu ua feminoiai ma le le mautonu i lona nofoa. Ona manu a’e lea o le featai leotetele a le isi aualii e toalua, o lea na tuu ai loa mea na tusitusi a Miss Blackstock.

“Ua ou vaai atu ua outou mananao uma lava e talanoa ia Kalepo, ia sei sau la o ia i luma nei e ta’u mai ia i tatou se mea e uiga ia te ia,” sa ia fai mai ai.

Sa fifilemu le vasega ma tau fai tilotilo atu ia Kalepo. Sa ou popole alofa lava ia te ia. Na kiki e le tamaitiiti sa i ona tua ane le pito i tua o le nofoa o Kalepo ma ula atu i ai, “Alu loa, tama mai le mauga.”

Sa savali lemu atu Kalepo i le pito i luma o le vasega. Na punitia e lona lauulu se vaega o ona mata, ma sa oloia le foloa i ona seevae pe a savali. Sa toe talie foi tamaiti sa i ou tafatafa. Na ou iloaina sa taumafai Miss Blackstock e fesoasoani, ae na ou popole o lenei mea o le a atili ai le leaga.

Na sii le lima o le isi tamaitiiti ma fesili atu, “O fea na e nofo ai i Monatana, i lalo o se papa?”

Na alu le talie a le vasega.

Na fesili le teineitiiti sa i le laina pito i luma, “E faapena le faiga o lavalava o tagata uma i Monatana?”

Sa ou faalogoina le vevela o ou foliga a o amata ona osooso ae lou ita. Afai o le a le taofia e se isi lenei mea, ou te iloa o le a tumau ai lava ona avea Kalepo ma tagata e faaesea i le taimi atoa o totoe o le tausaga aoga. Ae afai ou te tu mo ia, o lona uiga o le a talie mai foi tamaiti ia te au.

Ona ou manatua ai lea o le mea na faamatala mai e le toalua o lo’u tama ia te au i le taimi sa ou faataitai ai mo le au soka. Sa ia faamatala mai e uiga ia Tavita i le Feagaiga Tuai. O Tavita o le uii lea o ona uso uma lava, ae sa filifilia o ia e le Alii e fai ma tupu. Sa lei afaina pe na faapeī ona foliga. O nisi taimi e faamasino ai e tagata isi tagata i o latou foliga vaaia, ae o le Alii e vaai i le loto.

Sa ou iloaina sa manaomia e Kalepo le fesoasoani, o lea na sii ai lo’u lima. Sa tofi au e Miss Blackstock. Sa le’i tilotilo mai Kalepo i luma. Atonu sa faapea o ia o le a ou ula foi ia te ia.

“Na ou faalogo e i ai ni paka mananaia lava i Monatana lea e i ai ni auala sopo lelei lava. E faapeī na paka?” o lau fesili lea.

Sa fifilemu le vasega. Sa ou toe lagonaina foi le mumu o ou foliga, ae na ataata Kalepo. Sa ou iloa ai ua fiafia o ia e tali i se fesili agalelei. I se leo filemu sa amata ai loa ona tautala o ia.

Sa ia faamatala mai o lona aiga sa nonofo i se fanua tele sa tausi ai solofanua i Monatana, ma sa i ai foi sana solofanua. Sa ia faamatala mai e uiga i lana auala savali e sili ona fiafia i ai i le Paka a le Malo i Glacier ma lona vaai ai i se urosa moni ma ola. A o ia faamatalaina le tele o mea e uiga i lona aiga, sa amata ona fesili atu nisi tamaiti e uiga i le urosa, i savaliga sopo, ma le aeae i papa.

Ina ua tuua le aoga, sa ou le mautinoa pe o le a i ai se isi e fia nofo i ou tafatafa i luga o le pasi. Sa ou fusimauina la’u ato faafafa ma faatausisila atu i fafo i le faamalama o le pasi. Na faafuasei ona ou faalogoina se popo i lo’u tauau. O Kalepo.

“E mafai ona ou nofo i i?” o lana fesili lea ma le matamuli.

“Ioe!” sa ou tali atu ai, ma ou meimei e faaavanoa lona nofoaga.

Semanu ou te le mateina le taunuuga e ono iu i ai lena aso. Ua ou fiafia sa ou maua le lototele e agalelei atu ai ia Kalepo. O lenei la ua toatele ana uo—ma ou te mitamita lava i le avea o au ma se tasi o ia uo.