Mensahe sa Visiting Teaching
Pagkahimong Mapaningkamuton sa Kaugalingon
Itudlo kini nga mga kasulatan ug mga kinutlo o, kon gikinahanglan, pagtudlo og lain nga baruganan nga mopanalangin sa mga sister nga inyong bisitahan. Pagpamatuod kabahin sa doktrina. Dapita kadtong inyong gitudloan sa pagpakigbahin unsay ilang gibati ug nakat-unan.
Unsa ang Pagpaningkamot sa Kaugalingon?
“ ‘Ang kaugalingong paningkamot nagpasabut og paggamit sa tanan natong mga panalangin gikan sa Langitnong Amahan sa pag-amuma sa atong mga kaugalingon ug sa atong mga pamilya ug sa pagpangita og mga solusyon sa atong mga kaugalingong problema.”’ Ang matag usa kanato adunay responsibilidad sa pagpaningkamot nga malikay sa mga problema sa dili pa kini mahitabo ug sa pagkat-on unsaon sa pagbuntog og mga hagit kon kini mahitabo. …
“Sa unsang paagi kita mahimong mapaningkamuton sa kaugalingon? Mahimo kitang usa ka mapaningkamuton sa kaugalingon pinaagi sa pag-angkon og igo nga kahibalo, edukasyon ug kahibalo sa pagbasa ug pagsulat; pinaagi sa pagdumala sa kwarta ug mga kapanguhaan sa maalamong paagi, espirituhanong kalig-on, pagpangandam alang sa mga emerhensya ug mga panghitabo; ug pinaagi sa pagbaton og pisikal ug sosyal ug emosyonal nga malipayong kahimtang.”1
Julie B. Beck, Kinatibuk-ang Presidente sa Relief Society.
Usa ka Responsibilidad sa Ebanghelyo
“Samtang kita magpuyo uban sa pagkamadaginuton ug mopadaghan sa atong mga gasa ug mga talento, kita mahimong mas mapaningkamuton sa kaugalingon. Ang pagpaningkamot sa kaugalingon mao ang pag-angkon og responsibilidad alang sa atong kaugalingon nga espiritwal ug temporal nga kaayohan ug alang niadtong mga gisalig kanato sa Langitnong Amahan nga atong ampingan. Diha lamang sa pagpaningkamot sa atong kaugalingon nga kita mahimong matinud-anon nga makasunod sa Manluluwas sa pagpangalagad ug pagpanalangin sa uban.
“Importante nga masabtan nga ang pagpaningkamot sa kaugalingon usa ka pamaagi aron makab-ot ang usa ka katuyoan. Ang atong katapusang tumong mao ang pagkahimong sama sa Manluluwas, ug kana nga tumong gipadako pinaagi sa atong dili hinakog nga pagserbisyo ngadto sa uban. Ang atong abilidad sa pag-alagad mahimong mapadako o mapagamay pinaagi sa matang sa atong pagka mapaningkamuton sa kaugalingon.”2
Elder Robert D. Hales sa Korum sa Napulog Duha ka mga Apostoles.
“Ang pagpaningkamot sa kaugalingon resulta sa atong pagtrabaho ug mosuporta sa tanan pang mga buhat sa welfare. Kini usa ka mahinungdanon kaayo nga elemento sa atong espiritwal ug ingon man sa atong temporal nga kaayohan. Kabahin niini nga baruganan, si Presidente Marion G. Romney [1897–1988] miingon: ‘Kita kinahanglang motrabaho alang sa atong gikinahanglan. Kita kinahanglan nga maningkamot sa kaugalingon ug makabarug sa kaugalingon. Ang kaluwasan dili maangkon pinaagi sa lain nga baruganan. Ang kaluwasan usa ka tagsa-tagsa nga buluhaton, ug kita kinahanglan nga maningkamot sa atong kaugalingon nga kaluwasan sa temporal ug ingon man sa espiritwal nga mga butang.’ …
“Si Presidente Spencer W. Kimball [1895–1985] midugang sa pagtudlo kabahin sa pagpaningkamot sa kaugalingon: ‘Ang responsibilidad sa sosyal, emosyonal, espiritwal, pisikal, o ekonomikanhong kaayohan alang sa matag tawo mag-una diha sa iyang kaugalingon, ikaduha diha sa iyang pamilya, ug ikatulo diha sa Simbahan kon siya usa ka matinud-anon nga miyembro niini.’”3
Presidente Thomas S. Monson.