“Ako Hikaplagan Ninyo”

Sa pagkahuman sa among leksyon sa Sunday School, si Sister Hart mihangyo kanamo sa pagpakli ngadto sa Jeremias 29. Siya miingon nga siya mobasa og kusog sa mga bersikulo 12–14, ug mihangyo siya kanamo nga palandungon ang kahulugan sa mga pulong.

“Ug kamo managpanggilaba kanako,” siya mibasa, “ug kamo moadto ug manag-ampo kanako, ug ako magapatalinghug kaninyo.

“Ug kamo mangita kanako, ug makakaplag kanako, sa diha nga kamo mangita kanako uban ang inyong bug-os nga kasingkasing.

“Ug ako hikaplagan ninyo, nagaingon ang Ginoo …”

Si Sister Hart mipadayon, gihuman ang bersikulo 14, apan ang akong mga hunahuna nagpabilin nga malipayon, gitagamtam ang saad “Ako hikaplagan ninyo.” Ako napahinumduman sa mga higayon sa dihang ang akong asawa, si Emma, ug ako nakigdula ug tago-tago uban sa among gagmayng mga anak. Sa diha nga amo nang turno sa pagtago ug ilang turno ang pagpangita, amo kanunayng himoon ang among mga kaugalingon nga sayon makit-an. Usahay kami maghimo og mga kasaba o pasagdan ang usa ka tiil nga makita aron sila daling makakita kanamo. Usahay kami motago og balik sa sama gihapon nga lugar. Kami gusto nga ang mga bata mangita kanamo, apan kami usab gusto kanila nga makakita kanamo. Among gipaabut ang ilang mga gakus ug ilang masadyaon, dili pinugngan nga mga hagik-ik sa kadaugan.

Kini nga panumduman makapalawom sa akong salabutan sa gugma alang kanato sa atong Langitnong Amahan. Siya gusto nga kita mangita Kaniya, apan gusto usab Niya nga ato Siyang makit-an—Siya nasayud kon unsa kita ka malipayon kon atong mabuhat. Siya dili mosulay sa paglingla kanato. Hinoon, Iyang buhaton ang tanan Niya nga mahimo aron pagtabang kanato nga mahibalo kon hain ug unsaon sa pagpangita: Siya mihatag kanato sa mga kasulatan, mitawag og mga propeta, maminaw sa atong mga pag-ampo, mogiya kanato pinaagi sa gahum sa Espiritu Santo, mopanalangin kanato uban sa mga templo ug mga ordinansa sa priesthood ug pamilya ug mga higala. Ug kon ato Siya nga makit-an sa usa ka dapit sa makausa, kita sigurado nga makakaplag Kaniya didto pag-usab kon kita andam nga mobag-o sa atong pagpangita.

“Ako hikaplagan ninyo, nagaingon ang Ginoo.” Unsa ka makahupay nga saad! Sa kalibutan diin ang kasamok ug mga tintasyon daw dali nga makakita kanato, kini makapasalig pag-usab sa kahibalo nga ang atong labing mahinungdanon nga tinubdan sa kalig-on hilabihan ka sayon nga pangitaon.