Pagmaisugon: Pasiugdahi ang Kawsa sa Pagkahiyasnon

Gusto ba gayud ninyo nga makahimo og kalainan sa kalibutan apan wala masayud kon unsaon sa pagsugod? Gusto ba kamo nga makabarug alang sa usa ka butang nga matarung apan nagkulang sa kaisug tungod kay sa pagbuhat sa ingon makaangkon kamo og pagsaway gikan sa inyong mga ka-edad? Kini mao ang tuig nga kamo gipadala dinhi sa yuta aron mahimong lider. Karon, labaw pa gayud kay sa kaniadto, ang kalibutan nagkinahanglan sa inyong kahayag ug sa inyong pagkalider. Kamo makahimo og kalainan.

Ang 2010 nga tema nagdapit kanato nga “magmakusganon ka ug magmaisug” (Josue 1:9). Ang kalig-on ug kaisug mao ang mga kinaiya sa mga lider. Isip miyembro sa Simbahan, kamo lider sa kawsa sa pagkahiyasnon ug pagkamatarung.

Ang atong propeta, si Presidente Thomas S. Monson, nag-awhag kanato sa pagbaton og kaisug:

“Talagsaong kaisug ang gikinahanglan samtang kamo magpabilin nga putli ug hiyasnon taliwala sa mga panghunahuna nga gihangop sa panahon karon.

“Sa panglantaw sa kalibutan karon diyutay na lamang ang nagtuo nga ang batan-ong mga lalaki ug batan-ong mga babaye magpabiling limpyo sa moralidad ug putli sa dili pa ang kaminyoon. Mahimo bang madawat kini nga imoral nga pamatasan? Dili gayud!”¹

Ang inyong kaisug sa pagpangulo moabut samtang kamo magsunod sa mga sumbanan, maghimo og husto nga mga pagpili, ug mosunod sa propeta. Ang inyong kalig-on moabut samtang kamo manlimbasog sa matag adlaw aron sa pagpalambo sa inyong pagpamatuod sa Manluluwas pinaagi sa pag-ampo ug sa pagbasa sa Basahon ni Mormon. Ang inyong kalig-on sa pagpangulo sa uban moabut samtang kamo magsunod sa mga sumbanan nga makita diha sa booklet nga Alang sa Kalig-on sa mga Kabatan-onan. Samtang kamo nagbuhat niining mga butanga, kamo mobati og kamaayo sa inyong kaugalingon. Kamo makabaton og pagsalig, ug kamo motubo sa espirituhanon nga kalig-on.

Ug ayaw kalimot sa pagpahiyum! Pagbaton og positibo nga kinaiya. “Kita magmalipayon sa pagbuhat sa tanang mga butang nga ubos sa atong gahum; ug unya kita magmalinawon, uban ang labing dako nga kasiguroan nga makasaksi sa kaluwasan sa Dios” (D&P 123:17). Ang pagkasayud sa maayo ug dautan sa kanunay posible (tan-awa sa Moroni 7:16), ug kamo gisaaran nga ang Espiritu Santo mosulti kaninyo “sa tanan nga mga butang nga kinahanglan inyong buhaton” (2 Nephi 32:5). Samtang kamo nagtuon, paminaw alang sa paggiya sa ligdong, hinay nga tingog. Kamo adunay gisaad nga pasalig nga “pinaagi sa gahum sa Espiritu Santo kamo mahimo nga masayud sa kamatuoran sa tanan nga mga butang” (Moroni 10:5).

Bisan unsa pa ang inyong mga kahimtang, kamo natawo sa pagpangulo sa inyong pamilya, sa inyong eskwelahan, ug sa inyong komunidad. Busa niining tuiga, magmalig-on, magbaton og kaisug, ug maghimo og kalainan dinhi sa kalibutan! Kamo wala mag-inusara. Ang Langitnong Amahan maminaw ug motubag sa inyong mga pag-ampo ug mogiya kaninyo sa inyong mga buhat samtang kamo magpabilin nga putli ug takus sa makanunayong panag-uban sa Espiritu Santo.

Kamo anak nga mga babaye sa atong Langitnong Amahan, kinsa nahigugma kaninyo. Kini mao ang inyong mga adlaw. Kami nahigugma kaninyo ug nag-ampo nga kamo malig-on ug maisugon sa pagsunod sa mga sumbanan ug mag-una sa kawsa sa pagkahiyasnon. Ang inyong matarung nga ehemplo makahimo og kalainan!