Pag-atubang sa mga Hagit uban sa Kaisug

Nabalaka ba kamo mahitungod sa pagsukod sa usa ka tahas? Hunahunaa kon unsa kaha ang gibati ni Josue isip maoy mopuli sa bantugang propeta nga si Moises. Ang bug-at nga responsibilidad sa pagpangulo sa katawhan sa Israel ngadto sa gisaad nga yuta natugyan ngadto ni Josue. Hinumdumi nga ang gisaad nga yuta gipuy-an sa daghang Canaanite nga mga nasud, kadaghanan niini makahahadlok ug gusto og gubat. Mahunahuna ba ninyo nga si Josue tingali mibati og walay kasiguroan sa iyang mga abilidad sa pagtuman sa ingon ka makahahadlok nga tahas, tingali gani nahadlok?

Diha sa luna sa upat ka mga bersikulo sa unang kapitulo sa Josue, ang Ginoo mimando kang Josue nga magmakusganon ug magmaisug—tulo ka mga higayon! (tan-awa sa mga bersikulo 6–9). Dayon ang Ginoo misaad ni Josue nga siya molampus sa pagdala sa mga Israelite ngadto sa ilang kabilin nga yuta, kana nga kalig-on ug kaisug moabut kaniya tungod sa iyang pagkamasulundon sa tanang mga balaod, ug—ang labing mahinungdanon—nga ang Ginoo magauban kaniya bisan asa siya moadto.

Ang 2010 nga tema sa Mutual mao ang ikatulong higayon nga mitawag ang Ginoo ni Josue aron “magmakusganon ug magmaisug” (Josue 1:9). Kanang sama nga tawag sa kaisug maimoha. Ug ang sama nga mga saad maimoha usab. Uban sa tabang sa Manluluwas, kamo usab molampus sa inyong mga calling ug sa inyong kinabuhi. Kamo makabaton og kalig-on nga makabarug sa bisan unsang pagtintal samtang kamo nagsunod sa mga sugo ug maghupot sa mga sumbanan nga makit-an sa Alang sa Kalig-on sa mga Kabatan-onan. Samtang nagtamud kamo sa priest-hood ug sa matag semana nagbag-o sa inyong mga pakigsaad nga inyong gihimo sa pagbunyag, kamo makabaton sa Espiritu sa Manluluwas diha kaninyo—kanunay.

Dihay daghang mga butang nga wala mahibaloi ni Josue. Wala siya masayud kon sa unsang paagi niya madala ang mga anak sa Israel ngadto sa gisaad nga yuta, apan misalig siya sa Ginoo. Kamo nag-atubang og mga hagit sa inyong kinabuhi. Tingali kamo usa sa pipila nga mga miyembro sa Simbahan diha sa inyong eskwelahan o gani sa inyong pamilya. Kamo tingali mibati nga nag-inusara o nawad-an og kadasig o nahadlok. Kamo tingali mibati og kawalay kasiguroan mahitungod sa inyong kaugmaon niining masamok nga mga panahon. Apan pagmaisugon. Ang Ginoo magauban kaninyo. Kamo makasalig Kaniya. Siya motabang kaninyo nga molampus.

Kining maanindot nga pahinumdom makita sa Mga Proverbio 3:5: “Sumalig ka kang Jehova sa bug-os mong kasingkasing; ug ayaw pagsalig sa imong kaugalingong salabutan.” Samtang nagserbisyo kita sa atong calling, kita mipasalig nga mosalig sa Ginoo. Kami nag-awhag kaninyo sa pagbuhat sa ingon. Kami nahigugma kaninyo. Kami misalig kaninyo. Kamo kabahin sa pinili nga henerasyon sa lig-on ug maisug nga batan-ong mga lalaki.