Kinsa, Ako? Motudlo?

Ug karon atong ihatag ang panahon kang [palihug isulat ang inyong ngalan] alang sa atong leksyon.” Kon kamo makadungog niini nga mga pulong sa simbahan sunod Dominggo, kamo ba mobati og kahadlok o masaligon sa kaugalingon?

Sa dili madugay ang matag miyembro sa Simbahan mamahimong usa ka magtutudlo. Kini mahimong mahitabo sa Primary, sa Relief Society, o sa korum sa priesthood, sa visiting o home teaching, o sa family home evening. Alang sa daghang mga tawo kinsa mga bag-o nga miyembro sa Simbahan, ang papel [role] sa magtutudlo mahimong dili kaayo pamilyar. Bisan niadtong kinsa kadaghan na nakatudlo maghunahuna kon sa unsang paagi nga sila mas masaligon ug mas epektibo sa pagtandog sa mga kinabuhi alang sa kaayohan.

Aniay pipila ka yano nga mga ideya nga makatabang sa matag usa kanato nga makatuman sa atong mga assignment sa pagtudlo:

1. Ang pag-ampo usa ka importante nga himan sa pagtudlo. Sugdi ang matag bahin sa pagpangandam sa inyong leksyon pinaagi sa mapainubsanong pag-ampo alang sa giya sa Espiritu. Saligi ang saad sa Ginoo alang sa tanang mga magtutudlo: “Ang Espiritu ihatag nganha kaninyo pinaagi sa pag-ampo diha sa hugot nga pagtuo” (D&P 42:14).

2. Halos sa matag leksyon adunay mas daghan nga materyal sa manwal kay sa inyong matudlo sa klase. Basaha ang leksyon, ug sa mainampuong paagi pagpili og usa o duha ka mahinungdanon nga mga baruganan nga inyong gibati nga labing ikaayo sa inyong mga sakop sa klase.

3. Mainampuong magtuon sa mga kasalutan nga may kalabutan sa inyong leksyon, ug pagkuha og mga ehemplo ug mga baruganan gikan niini. Ang pulong sa Dios mahimong adunay “labaw nga gamhanan nga sangputan diha sa mga hunahuna sa mga katawhan kay sa … bisan unsa pa” (Alma 31:5).

4. Dawata ang kamatuoran nga dili ninyo kinahanglang mahibalo sa tanang butang kabahin sa leksyon aron mahimong usa ka epektibo nga magtutudlo. Pagplano og yano nga mga pangutana nga motugot sa inyong mga miyembro sa klase nga mopakigbahin sa ilang mga kasinatian ug mga panghunahuna. Kini mahimong labaw nga makatandog ug halandumon nga bahin sa inyong leksyon.

5. Isip magtutudlo, kamo usab gitawag aron makakat-on. Ang pagtudlo sa ebanghelyo “nanawagan sa inyong makugihon nga mga paningkamot sa pagpausbaw sa inyong pagsabut ug pagpalambo sa inyong mga kahanas, nasayud nga ang Ginoo mopalambo kaninyo samtang kamo magtudlo sa paagi nga Iyang gisugo.”¹

Alang sa dugang mga ideya sa pagtudlo, tan-awa ang Pagtudlo, Walay Labaw Ka Mahinungdanon nga Tawag.