Unsa ang Atong Angay nga Buhaton Kon Kita Wala Masayud Unsa ang Atong Buhaton?

Ang mga kasulatan nagpasidaan kanato nga ang dili pagkahibalo dili usa ka rason sa dili pagbuhat. Si Nephi “nagtinguha nga masayud sa mga butang nga nakita sa [iyang] amahan,” namalandong niini sa iyang kasingkasing, ug “gibayaw diha sa Espiritu sa Ginoo” (1 Nephi 11:1). Si Laman ug Lemuel, sa laing bahin, migugol sa ilang panahon sa “paglalis sa usag usa mahitungod sa mga butang diin gipamulong [ni Lehi] ngadto kanila” (1 Nephi 15:2).

Ang Ginoo naglaum kanato nga kita mangutana, magtuon, ug molihok—bisan adunay daghang mga butang nga dili nato masayran niining kinabuhia. Usa niining mga butanga mao ang oras sa Iyang Ikaduha nga Pag-anhi. Siya miingon, “Busa pagtukaw: kay wala kamo mahibalo unsang adlawa moabut ang inyong Ginoo” (Mateo 24:42). Tungod niining pagkawalay kasiguroan, si Presidente Wilford Woodruff (1807–98) mitambag sa mga miyembro sa Simbahan sa pagpangandam, apan siya misiguro nga siya magpadayon og trabaho alang sa umaabut.¹

“Kon kamo nagpuyo nga takus ug ang inyong pagpili uyon kanunay sa mga pagtulun-an sa Manluluwas ug kamo kinahanglan nga mobuhat, padayon uban sa pagsalig,” miingon si Elder Richard G. Scott sa Korum sa Napulog Duha ka mga Apostoles. Kon kita sensitibo sa aghat sa Espiritu, midugang si Elder Scott, “bisan ang kasamok sa hunahuna, buot ipasabut sayop nga pagpili, o ang kalinaw o ang kainit sa dughan mabati, nga magpamatuod nga ang inyong gipili husto [tan-awa sa D&P 9:8–9]. Kon kamo nagpuyo nga matarung ug nagbuhat uban sa pagsalig, ang Dios dili motugot nga kamo moabut og layo nga walay pahimangno kon nakahimo kamo og sayop nga desisyon.”²

Duha ka mga kasinatian sa akong kinabuhi—sa dihang ako dili pa sigurado unsa ang buhaton—mopakita sa kaimportante sa pagtuman sa mga sugo ug pagsunod sa buhi nga mga propeta. Sa kolehiyo pa ako nahutdan ko og kwarta, busa ako nangita og part-time nga trabaho. Sa dihang akong nadawat ang akong unang sweldo, ako wala masayud kon kini paigo ba sa mga gastuhonon hangtud nga akong madawat ang sunod nga sweldo. Apan ako nakahinumdom sa saad sa Ginoo kabahin sa ikanapulo: “Sulayi ninyo ako karon … kong dili ba buksan ko kaninyo ang mga tamboanan sa langit, ug buboan ko kamo sa panalangin” (Malaquias 3:10).

Ako mihukom sa pagsulay sa Ginoo. Akong giuna og bayad ang akong ikanapulo, ug Siya mipanalangin kanako nga makalahutay. Sa proseso ako mikat-on sa pagsalig sa Iyang mga saad.

Mga pipila ka tuig ang milabay, sa dihang si Sister Ellis ug ako adunay gagmay nga mga bata ug ako nagsugod og bag-o nga panginabuhi, ang akong employer miusab sa akong medical insurance plan. Ang karaang insurance motapos inigka Hunyo 1 ug ang bag-o magsugod sa Hulyo 1, nakapahimo kanamong walay insurance sulod sa usa ka buwan. Kami wala masayud kon unsa ang buhaton, apan nianang higayuna ako nakahinumdom sa pamulong ni Presidente N. Eldon Tanner (1898–1982) diin siya mitambag ngadto sa mga miyembro sa Simbahan nga kanunay gayud nga adunay health insurance.³

Ako nakig-istorya sa kompaniya, ug kami nagkasinabut og usa ka kontrata nga mapadayon ang insurance sa tibuok Hunyo. Niadtong Hunyo 28, ang among kinamagulangang anak nga lalaki, nga si Matt, natagak gikan sa taas nga diving board sa pool sa among silingan ug napantok sa sementado nga sawog. Siya nakaangkon og buak sa bagol-bagol ug pagkabun-og sa utok. Siya gidali pagdala pinaagi sa helicopter ngadto sa ospital, diin siya gitambalan sa mga espesyalista. Ang bayranan hilabihan ka dako ug moguba sa among pinansyal nga bahin. Maayo gani, ang health insurance mibayad sa kadaghanan sa iyang pagpatambal.

Busa unsa ang atong angay nga buhaton kon kita wala masayud unsa ang atong buhaton? Kita dili na kinahanglan mangita og labaw pa kay sa mga propeta, mga kasulatan, ug sa Manluluwas alang sa tubag. Kining bililhon nga mga kapanguhaan motudlo kanato sa:

Ug sa matag usa niining mga lakang, unta kita mosunod sa tambag ni Presidente Boyd K. Packer, Presidente sa Korum sa Napulog Duha ka mga Apostoles: “Kanunay, sunda kanunay ang mga aghat sa Espiritu.”⁴