Ang FamilySearch midugang sa 1851, 1861, ug 1871 nga mga indeks sa census sa Canada ngadto sa online collection niini, diin naglakip na sa 1881 ug 1916 nga mga census sa Canada. Adunay mga plano dili madugay sa pagdugang sa 1891 census sa Canada. Ang mapangitaan [searchable] nga mga online database, nga makit-an sa FamilySearch.org, naglakip sa gibana-bana nga 17 ka milyon nga mga rekord. Ang libre nga paggamit sa publiko niining giindeks nga mga census mas makapasayon alang sa mga tawo aron madugangan ang ilang kasayuran sa ilang family history.

Ang kinatung-an sa siyudad sa Detroit, Michigan, USA, naila na kaayo sa krimen, kalihokan sa gang, ug paggamit sa druga. Tungod sa daghan kaayong walay trabaho ug gamay ra ang migradwar nianang dapita, ang Stake sa Bloomfield Hills Michigan nakigtambayayong sa Unity Church sa pagtabang sa mga bata nga nag-eskwela isip kabahin sa tibuok siyudad nga Neighborhoods Day sa Detroit. Ang duha ka mga grupo nagpundok ug nanghatag og labaw pa sa 250 ka mga school backpack nga kompleto sa mga notebook, mga lapis, mga krayola, mga eraser, ug uban pang mga gamit sa eskwelahan.

Labaw pa sa 70 ka mga miyembro sa Simbahan ang mipahawa sa ilang mga panimalay, kadaghanan kanila mipasilong sa ubang miyembro nga mga pamilya, tungod sa sunog sa kakahoyan sa Utah ug California, USA, sa miaging Septyembre 2009. Ang kalayo miugdaw og labaw pa sa 123,000 ka mga acre (50,000 ka ektarya) sa Sacramento ug Los Angeles, California, nga mga dapit, mikalas og duha ka bombero ug miugdaw og labaw pa sa 100 ka mga bilding. Sa dapit sa New Harmony, Utah, ang mga kalayo miugdaw og labaw pa sa 10,000 ka mga acre (4,000 ka ektarya) ug pipila ka mga bilding. Sa duha ka mga estado, ang lokal nga mga lider sa priesthood mitabang sa naapektohan nga mga miyembro.