Atong Pahina
Ang mga bata sa Primary sa Tlaxcallan Ward, Chiautempan Mexico Stake, migahin og duha ka adlaw nga magbisita ug mag-alagad sa nabiyuda nga mga sister ug ubang mga pamilya sa ward. Sila nanganta og mga himno, mitabang sa pagpatuka sa mga manok, ug nanglimpyo sa pipila sa mga panimalay.
Niadtong Nobyembre 2008 sa Brazil, dihay baha uban sa ulan ug mga pagdahili sa yuta. Sa eskwelahan nakadawat kami og gamayng sulat [flyer] nga nangayo og mga donasyon. Ako midonar og usa ka sako nga mga butang uban sa akong dulaan nga truck sa bombero ug duha ka mga dulaan nga sakyanan sa pulis.
Inacio F., edad 4, Brazil
Gusto ko nga motabang sa usa sa akong mga kauban sa klase sa eskwelahan. Ang iyang ngalan si Alessandro, ug nagkinahanglan siya og daghang tabang. Ang among mga magtutudlo hilabihan ka suod kaniya tungod sa iyang mga panginahanglan, ug siya akong gitabangan sa pagbuhat sa mga butang nga gihangyo sa mga magtutudlo nga among buhaton.
Martina Z., edad 7, Italy
Kami mobati og kalipay kon kami makakanta og mga awit sa Primary sa simbahan kauban sa among inahan. Ang pagpanganta makatabang sa mga tawo nga mobati sa Espiritu, ug ang sakrament miting magpadayon og labaw pa ka maayo kon ang Espiritu magauban kanato.
Sephora B., edad 8, ug Sariah B., edad 10, Guadeloupe
Andrés O., edad 9, Costa Rica
Maamumahon nga Ig-agaw
Ang akong ig-agaw gidala sa ospital tungod kay hilabihan ka sakit ang iyang tiyan. Kinahanglan nga siya maeksamin og tarung. Siya akong gisulatan ug gisultihan siya nga magmaisug ug ako mag-ampo alang kaniya. Ako usab nagputos og maayo nga libro ug makaon, diin among gidala sa ospital. Sa dihang kami mibiya, ako nakabaton og hilabihan ka maayong pagbati sa kahiladman. Ako nasayud nga kon kita maghimo og mabination nga mga butang alang sa uban makahatag kini kanato og maayong pagbati ug makalipay kini sa Langitnong Amahan.
Jake S., edad 7, Alberta, Canada
Tukma Kaayo nga Pagbalik
Kami naglangoy sa pool sa usa ka hotel ug nakakita og relo de bulsa sa ilawom sa pool. Kami nangutana sa daghang mga tawo kon ang relo ilaha ba. Silang tanan miingon nga dili. Pagkahuman sa adlaw, among gibati nga ganahan kaming moadto sa pool sa makausa pa dala ang relo. Dihay pamilya sa pool. Among gipangutana kon ang relo ilaha ba. Sila miingon nga ila, ug sila nangita niini sa tibuok semana. Kini gipanag-iya sa ilang amahan, ug kini mahal kaayo pagkapalit. Ako nalipay nga kami naminaw sa Espiritu Santo aron ang relo mauli.
Huntley, Sarabeth, ug Caelin C., mga edad 10, 9, ug 7, California, USA
Paghulagway sa relo pinaagi ni Joe Flores