Ang Bag-ong Manwal nga Mga Baruganan sa Ebanghelyo
Kining maanindot nga volume mahimong usa ka talagsaon nga dugang sa bisan asa nga librarya sa panimalay ingon man usab sa lawak klasehanan sa Simbahan.
Sukad niadtong 1998 ang mga manwal sa leksyon sa mga klase alang sa Melchizedek Priesthood ug Relief Society mao ang mga volume sa Mga Pagtulun-an sa mga Presidente sa Simbahan (dinhi niining tibuok nga artikulo tawagon ko kini og Mga Pagtulun-an). Ang matag manwal nakapokus sa kinabuhi ug mga pagtulun-an sa usa sa atong hinigugmang mga propeta. Kining talagsaon nga mga basahon nakahimo og bililhon kaayo nga mga kapanguhaan alang sa mga miyembro sa tibuok kalibutan aron makaila ug mahigugma niining talagsaon nga mga tawo ug sa talagsaon nga mga doktrina nga ilang gitudlo. Ang ilang mga tambag sama ra ka makadasig ug tukma karong panahona sama sa dihang ang mga Kaigsoonan unang namulong niadtong mga pulonga nga gilakip adto nga mga basahon. Kami naglaum nga unta kamo mopadayon sa paggamit nianang dinasig nga literatura niining mga matinud-anong mga sulugoon sa Ginoo. Ang ilang mga pagtulun-an molungtad hangtud sa kahangturan.
Sugod sa 2010 kita mobiya og duha ka tuig sa pagtuon niining mga serye sa mga manwal. Ang puli niini, panahon sa mga klase sa Melchizedek Priesthood ug Relief Society sa ikaduha ug ikatulo nga Dominggo sa matag bulan, atong tun-an ang gibag-o nga manwal nga Mga Baruganan sa Ebanghelyo. Natural lamang, ang mga miyembro matingala nganong adunay kausaban ug sa unsang paagi kini makaapekto kanila. Ang mosunod mao ang pipila ka mga pangutana nga mahimong mahunahunaan ug ang mga tubag.
Nganong Giusab ang Kurikulum?
Sukad sa sinugdanan sa paggamit sa Mga Pagtulun-an, milyon ka mga tawo ang nagpamiyembro sa Simbahan. Kadaghanan kanila adunay tandugon pa nga mga pagpamatuod ug, uban sa limitado pa nga kasinatian diha sa Simbahan, kini makabenepisyo kaayo pinaagi sa pagpokus diha sa mga mahinungdanon sa ebanghelyo. Dugang pa, ang tanang mga miyembro sa Simbahan makabenepisyo pinaagi sa pagtuon og balik sa mga sukaranan. Sa pagkakaron usa ka mabinantayong pagtuon niining mahinungdanon nga bahin sa mga doktrina sama sa gipresentar sa bag-o ug gipalambo nga manwal nga Mga Baruganan sa Ebanghelyo makatabang sa mga miyembro nga molig-on ang ilang pagsabut sa mahinungdanong mga pagtulun-an sa ebanghelyo.
Ang mga manwal sa Mga Pagtulun-an nahimong talagsaon nga kurikulum alang sa atong mga klase ug bililhon nga mga dugang sa atong personal nga mga librarya. Sa 2012 ipadayon nato ang pagtuon sa mga pagtulun-an sa atong bantugan nga mga Presidente.
Sa Unsa nga Paagi Kini Makaapekto Kanako?
Ang manwal nga Mga Baruganan sa Ebanghelyo gamiton isip tun-anan alang sa ikaduha ug ikatulo nga Dominggo sa mga klase sa Melchizedek Priesthood ug Relief Society. Kini usab ang gamiton isip manwal sa klase sa Gospel Principle Sunday School alang sa bag-ong mga miyembro, mga investigator, ug mga miyembro nga bag-ong mibalik og simba. Tungod niini, ang pipila kaninyo matingala kon wala bay pipila nga nagbalik-balik. Siyempre aduna! Dili ba kini nindot nga kita makapahimulos sa gidugang nga benepisyo sa pagbalik-balik. Bisan ang Manluluwas mitudlo sa samang mga doktrina sa daghang mga higayon aron sa paghatag og gibug-aton sa mga konsepto. Hunahunaa kon kapila Siya nagtudlo kanato pinaagi sa mga kasulatan aron motuo ug magpabunyag (tan-awa, pananglit, 3 Nephi 11:23–38)!
Nasayud nga kita kinahanglan nga makat-on sa mga baruganan pagtulun-an ngadto sa lain nga pagtulun-an, lagda ngadto sa lain nga lagda, ang Ginoo nagbalik-balik sa daghang mga konsepto aron kita dili makalimot niini (tan-awa sa Isaias 28:10, 13; 2 Nephi 28:30; D&P 98:12; 128:21). Ang ingon ani nga instruksyon, nga pagahimoon sa maamumahong mga magtutudlo kinsa adunay interes sa kaayohan sa ilang mga miyembro sa klase, makatabang sa pagpalambo sa hugot nga pagtuo diha sa Ginoo nga si Jesukristo.
Sa paghimo niini, hinoon, adunay gamay lang nga pag-overlap kay sa sa atong gihunahuna. Ang mga klase sa Melchizedek ug Relief Society dayag lang nga mogamit sa manwal sa duha ka mga semana matag bulan, sa ikaduha ug ikatulo nga Dominggo, sama sa paggamit sa mga manwal sa Mga Pagtulun-an . Ang mga leksyon mosunod sa order nga magsunod-sunod nga atong mahuman ang manwal nga Mga Baruganan sa Ebanghelyo sulod sa duha ka tuig. Sa laing bahin, ang mga magtutudlo nga nag-andam alang sa klase sa Gospel Principles Sunday School mopahaum sa ilang mga leksyon matag semana sumala sa mga panginahanglanon sa ilang mga partisipante sa klase. Sa kinatibuk-an nga pagkasulti, ang bag-o nga mga miyembro, mga investigator, ug mga miyembro nga mibalik pagka-aktibo moapil sa klase sa Mga Baruganan sa Ebanghelyo sulod sa mga panahon nga gitino alang nila sa ilang bishop o sa branch president, human niini nga panahon sila motambong na sa klase sa Gospel Doctrine Sunday School.
Sama sa mga manwal sa Mga Pagtulun-an, walay bayranan ang pagdawat niining mga bag-o nga manwal. Ang matag ward o branch mosangkap sa gikinahanglan nga mga manwal alang sa mga miyembro.
Sa ubang mga bahin sa kalibutan, ang mga klase sa Melchizedek Priesthood ug Relief Society naggamit sa mga libro nga Mga Katungdanan ug mga Panalangin sa Pagkapari ug Ang Santos nga Babaye sa Ulahing Adlaw imbis sa Mga Pagtulun-an. Gimantala sa 45 ka mga pinulongan, ang bag-ong edisyon sa Mga Baruganan sa Ebanghelyo maana sa pipila niini nga mga yunit panahon sa tuig 2010 ug 2011. Sa mga dapit nga walay manwal nga bag-o, hinoon, ang daang edisyon nga manwal sa Mga Baruganan sa Ebanghelyo mao gihapon ang gamiton.
Sa Unsang Paagi nga ang Manwal nga Mga Baruganan sa Ebanghelyo Giusab?
Ang atong hilabihan ka nindot nga manwal nga Mga Baruganan sa Ebanghelyo unang gimantala labaw na sa 30 ka tuig ang milabay. Kini naggamit kaayo sa Simbahan isip manwal sa mga leksyon sa Sunday School, sa pagtudlo sa bag-ong mga miyembro kabahin sa nag-unang mga baruganan sa ebanghelyo, ug isip usa ka importante nga kapanguhaan sa panimalay. Hinoon, ang Kaigsoonan mibati nga kita makapalambo pinaagi sa manwal nga anaa ug makapanindot niini. Ang resulta mao ang usa ka nindot kaayo nga volume nga mahimong usa ka talagsaon nga dugang sa bisan unsa nga librarya sa panimalay ingon man usab sa lawak klasehanan sa Simbahan.
Ang bag-o nga edisyon adunay pipila ka importante kaayo nga mga hulagway sa desinyo ug teksto:
1. Desinyo:
Ang bag-ong edisyon mas lapad ug adunay bag-ong hapin susama sa mga volume sa Mga Pagtulun-an. Amo usab nga gi-update ang desinyo sa teksto aron mas sayon kini nga basahon. Ang mga biswal pagakoloran. Kining tanan maghatag og mas nindot nga kasinatian sa biswal nga mas makapanindot sa personal nga pagtuon.
2. Teksto
Ang teksto giusab aron ang manwal mahimong mas epektibo alang sa personal nga pagtuon, pagpangandam sa magtutudlo, ug mga panaghisgutan sa klase. Aron sa pagtabang sa personal nga pagtuon, daghang mga kinutlo ug tinubdan sa kinutlo sa sinulat gi-update aron sa pagsumpay niining libro ngadto sa mga volume sa Mga Pagtulun-an nga daan nang gimantala. Kini makapakat-on sa mga indibidwal og dugang pa gikan sa mga propeta kinsa gikutlo diha sa manwal nga Mga Baruganan sa Ebanghelyo. Ang paghiusa niining mga manwal makapalambo sa pagtuon diha sa lawak klasehanan ug sa panimalay.
3. Mga Sugyot sa Pagtudlo ug Pagkat-on
Sa matag kapitulo mao ang mga ideya nga makatabang sa mga magtutudlo nga mapalambo ang ilang pagtudlo. Ang mga ideya gibase sa maayong mga baruganan sa pagtudlo nga gikan sa Pagtudlo, Walay Labaw Ka Mahinungdanon nga Tawag, ang kapanguhaan sa Simbahan alang sa pagpalambo sa magtutudlo. Ang mga ideya gituyo aron sa pagtabang sa mga magtutudlo sa paghigugma sa ilang gipangtudloan, pagdapit sa makugihon nga pagtudlo, ug pagtudlo sa doktrina pinaagi sa Espiritu.
Dugang pa, adunay mga pangutana sa sinugdanan sa matag seksyon sa kapitulo motabang sa pagdasig og panaghisgutan ug pagdirekta sa mga miyembro sa klase ngadto sa kahulugan sulod sa seksyon. Ang mga pangutana human sa matag seksyon makatabang sa mga sakop sa klase sa pagpamalandong, paghisgut, ug paggamit unsa ang ilang nabasa.
Usa ka Libro nga Molungtad Hangtud sa Kahangturan
Kini ang among panghinaut nga ang bag-ong manwal nga Mga Baruganan sa Ebanghelyo adunay tataw nga dapit diha sa atong mga panimalay ug sa mga kinabuhi sa mga Santos sa Ulahing mga Adlaw. Ang bag-ong edisyon modasig sa pagtudlo ug mopanindot sa personal nga pagtuon. Mga kaigsoonan, pinaagi sa inyong pagtuon sa labing mahinungdanon nga mga doktrina sa ebanghelyo ni Jesukristo, ang inyong pagpamatuod molambo, ang inyong kalipay madugangan, ug kamo makakita og mas abunda nga mga panalangin sa Ginoo sa inyong kinabuhi.
Ang bag-o nga manwal nga Mga Baruganan sa Ebanghelyo adunay gikoloran nga mga litrato ug mga hulagway.
Ang matag seksyon magsugod og mga pangutana nga makapahunahuna o mga pahayag nga makatabang sa tagsa-tagsa nga pagtuon ug makadasig og panaghisgutan sa lawak klasehanan.
Ang mga sugyot sa pagtudlo sa matag kapitulo makatabang sa mga magtutudlo nga modapit og pagkat-on ug motudlo pinaagi sa Espiritu.
Mga paghulagway sa litrato pinaagi ni Robert Casey