O Le Polo Lole

Sa ala ae i luga Rasela ma le fiaai. Sa ia oso i lalo mai le moega ma tamoe atu i le kapoti e teu ai meaai. Sa ia tatalaina le faitotoa ma autilo atu i le fata pito i luga. Sa tu mai iina—le fagu lole! I totonu o le fagu, o loo feilafi mai e pei o ni mapu iila, o ana lole e sili ona fiafia i ai. O ni polo lanu mumu-lanu moli ma ni sukalaki mananaia i le ogatotonu e le mafai ona faafitia.

Sa vaavaai solo faavave Rasela e vaai po o autilo mai Tina po o Tama. Sa ia lagonaina o la leo, ae sa le iloa atu i laua. E aunoa ma se pisa, sa ia tuleiina se nofoa i le kapoti meaai ma ae atu i luga. Ona ia aapa atu lea ma tatalaina le tapuni o le fagu-lole. Sa ia luluuina mai se luuga o lole, toe faamau le tapuni, ma tamoe vave atu e agai atu i lona potumoe. Ae ina ua lalata mai leo o ona matua, sa ia oso vave atu i le faletaele ma tapuni le faitotoa.

Ao tilotilo atu Rasela ma le fiaai i lana lole, sa ia taumanatunatu, “Pe mafai ona ou togiina i le ea ma pueina i lo’u gutu?” Ma e aunoa ma se toe mafaufau faalua sa ia togiina loa se lole maualuga i le ea. Sa lele i luga ae o lona ulu, ma palasi sao ifo lava i totonu o lona gutu o loo faamaga-tele ma mau ai loa i lona faai. Sa le mafai ona ia manava!

Sa ia taumafai e faataio peitai sa leai sona leo. “Tama, fesoasoani mai ia te au!” sa ia tagi atu ai i lona loto. “Tama Faalelagi, faamolemole fesoasoani mai ia te au!” sa ia tatalo ai. Sa tafe ifo loimata i ona alafau ao ia tauivi e manava lea na le mafai. Sa ia lagonaina le ma’i ma le niniva.

Sa faafuasei, ona oso mai lona tama i totonu o le potu. Sa ia siiina i luga Rasela mai tua ma fusi mau ao ia oomiina ona lima faataamilo ia te ia. Plop! Sa pau mai i fafo le lole ma pau atu i totonu o le pesini fulumata. Sa manavanava loloa Rasela. Sa tuuina o ia i lalo e Tama ma fusi mau mai o ia. “O loo lelei mea uma, Rasela,” sa ia musumusu atu ai. “O lea ua e manuia.”

“Faafetai Tama,” o lana tala lea. “Ou te faatoese atu sa ou aveina lole ae lei faanoi atu. Ou te alofa ia te oe.

Sa sau Tina i totonu o le faletaele. “O le a le mea na tupu?” na ia fesili ai.

“Na ou faalogo i se leo,” o le tala lea a Tama. “Na faapea mai, ‘O loo tulaga faaletonu lou afafine! Alu i ai!’ Sa ou mauaina Rasela i le faletaele, ae sa ou le iloaina po o le a le mea na tupu. Ona faapea mai lea o le leo, ‘Sii o ia i luga!’ Sa ou siiina i luga, ae pau mai ai se lole mai lona gutu.”

Sa opoina mai e Tina ia Rasela i se opo lapoa lava.

Sa tele ni mafaufauga na faia e Rasela i lena aso. Sa ia mafaufau e uiga i le lole ma e uiga foi i le faamaoni. Sa ia mafaufau e uiga i le manaia tele o le tofoina o le ea i manava taitasi. Sa ia mafaufau e uiga i lona alofa tele i le Tama Faalelagi ma Tina ma Tama. Ae o le mea sili o na mea uma, sa ia mafaufau e uiga i le Agaga Paia. Na mafai e Tama ona faasaoina o ia mai le laoa ona sa faalogo o ia [tamā]. Na manao o ia ia pei o Tama ma faalogo pea e le aunoa i le Agaga Paia.