Tasi se Gaoioiga Agalelei

E le iloa lava e se tasi se mea e mafai ona oo mai ona o se agalelei laitiiti. Ia Ianuari i se tasi aso, a o ou auauna atu i le Misiona a Nigeria Lagos, sa i ai sau tamai meaalofa sa ou manao e tuuina atu i se tasi. Sa ou tomanatu, “Po o ai e mafai ona ou tuuina atu i ai o le a faamanuiaina ai?” Sa ou aveina le meaalofa i le lotu mo Aso Sa e lua, ae sa ou le mautonu.

I le Aso Sa lona tolu, sa ou alu i le lotu ma le mafaufau o le a ou tuuina atu i se uo lelei. E lei sau o ia i le lotu i lena aso, peitai sa ou lagonaina sa i ai se tasi na manaomiaina. Ao ou autilo solo i le falesa, sa ou iloa atu se tamaitiiti e le auai ona matua i le Ekalesia. Sa foliga mai ua matua faaesea lava o ia. Sa ou lagona le uunaiga e tuuina atu ia te ia le meaalofa. Sa ou avatua ia te ia, ma le lagona fiafia i totonu.

O se mea matagofie na tupu. Na sau lona tina i le lotu i le Aso Sa na sosoo ai. Sa ia faafetai mai ia te au mo le meaalofa. Sa ia fai mai, “Sa ou folafola atu i la’u tama tama o le a ou sau i le lotu i se aso. O le asō ua ou sau e faaali atu lo’u agaga faafetai mo le meaalofa.” O le mafuaaga lena na ma feiloai atu ai ma la’u soa ia te ia; mai lena taimi ua auai o ia i le Ekalesia. E ese le fiafia o le tamaitiiti ina ua vaai atu ua iu lava ina papatiso lona tina.

Ou te iloa o mea faatauvaa ma mea faigofie ua faataunuuina ai mea tetele.