O Lena Tusi Na Oso ai Lo’u Fiailoa

I se tasi aso na matou potopoto ai ma au uo e faafiafia. I le fale o la’u uo, sa matou talatalanoa, fai le inuga, ma ulaula. Ae o se tasi o a’u uo, o Paterika, e lei auai. Ona ou iloaina lea e le faia lava e Paterika se tasi o mea ia matou te faia; ma ou manatua ai o ia o se Mamona.

Ina ua leva le afiafi, na taape uma tagata sei vagana ai ma’ua ma Paterika. Na ma o ese faatasi i le sipi [taavale]. Ao o’u tau manatunatu pea i le le auai o Paterika, sa ou toe tomanatu ai i se tasi aso i le fa tausaga talu ai, ao tai 16 o ma’ua tausaga. Ou te manatua sa ma savalivali i le ala i talaane o la matou aoga na ou fai atu ai ia te ia e fia avea a’u ma se ositaulaga i se aso.

“I la matou ekalesia semanu ua leva ona avea oe ma ositaulaga,” o le tali lea a Paterika. “Na o le faauu lava o oe. Ae a 19 loa ou tausaga, ona mafai loa lea ona e talai atu le talalelei o se faifeautalai.”

“Matua’i faavalevalea lena mea,” sa ou fai atu ai, ma lo’u manatu e le tele sona iloa e uiga i le talalelei. “Pe mafai faapefea e se 19 tausaga ona tala’i atu i tagata? E umi lava se taimi e aooga ai faifeau ina ia mafai ona latou talai atu.”

Na tumau pea le manatu o Paterika e mafai e le tai 19 tausaga le matutua i lana ekalesia ona talai atu. Na ia ta’u mai ia te au o lana ekalesia e i ai le isi a latou tusitusiga paia, ona ia aumaia lea o le kopi ia te a’u. Sa ou tilotilo i ai i le fale, ma ou lagona ai se mea e le mafai ona faamatalaina i lena tusi. Ae sa ou le popole tele lava i ai; sa ou tuuina le tusi i se pusa, lea na taatia ai lava mo le isi fa tausaga.

I le taimi nei, ao ma tietie i le sipi ina ua uma le pati, sa ou fesili ia Paterika po o fea e alu i ai. “Ou te alu e feiloai ma nisi o au uo. O alii—faifeautalai.” Na ou manatua lo’u vaai pea ia i la’ua. Na ou fesili ia Paterika pe mafai ona ia ave a’u i faifeautalai ina ia ou fesili atu ia i la’ua e uiga i la latou ekalesia.

Na matou feiloai ma faifeautalai i se faleoloa i talaane o le latou itu, ona la faafeiloai lea o maua e ala i le faatalofa mai. O se mea na aloaia lelei. Peitai ina ua maea ona la ta’u mai o la suafa ia te au, na ou iloa na pei lava i la’ua o nisi tama masani. Sa la mananao e seti se taimi talafeagai e tali ai a’u fesili.

“Ua lelei, aumai le lua numera ou te avatu ai se feau feaveai [text] pe a ou avanoa,” o la’u tali lea. Ou te lei fuafuaina lava e ave i ai se feau feaveai [text].

Ina ua ou taunuu i le fale, sa ou tago loa i le tusi na aumai ia te a’u e Paterika i le fa tausaga talu ai—o se mea e uiga i (lena tusi) na mafua ai ona ou fiailoa. O le aso na sosoo ai na ou aveina ai loa la’u feau feaveai (text) i faifeautalai e aoao a’u. Na la amata mai i le Toefuataiga o le talalelei. Na ese lava i la’u faalogo, ona ou faapea ane lea, “Aisea e mananao ai tagata e toefuatai ni mea pe a latou iloa e ese lava augatupulaga matutua mai augatupulaga o aso nei?

Ina ua maea lesona e lua na ou manatu ai ou te le toe alu i ai. Ina ua fesiligia a’u pe aisea, na ou tali atu, “Ou te le o toe fiafia i ai.” Na mavae atu le vaiaso. Sa ou saofa’i ma sioa atu i le Tusi a Mamona, ma mafaufau loloto i le mea ua uma ona aoaoina ai a’u. Na amata ona ou faitau i le mea na tau mai e faifeautalai i le 3 Nifae 11. Na ou faitau na malaga atu Iesu i se isi nuu e faailoa atu ai o Ia o le Faaola ma le Mesia. I le 3 Nifae 15, na ou matauina ai se fuaiupu na ou faitau i ai muamua i le Tusi Paia, i le Ioane 10:16. O se mea e lei aoaoina ai a’u e faifeautalai.

Na tafe ifo loimata i o’u foliga, ma ou tagi lotulotu ai i lo’u potu. Na ou iloaina ai le alofa o Iesu Keriso mo i tatou. O Lona alofa tele mo i tatou na Ia tuuina mai ai Lona lava soifua e laveai ai i tatou mai a tatou lava agasala. Ou te lei faatali ae tatalo loa, ma fesili atu e fia iloa pe moni le Tusi a Mamona o loo ou u’uina. O le tatalo i lo’u potu, na o a’u lava, na faafuasei lava ona ou lagonaina ai se tasi na i ai iina e faalogologo mai ia te a’u.

Na faamaluluina lo’u loto i uunaiga na ou mauaina. Sa ou tu i luga ma faapea ane, “O le Ekalesia moni lenei. Ua ou iloa o le Ekalesia lenei na toefuatai mai e Iesu Keriso.”

O le aso a’o loma lo’u papatisoga, sa ou toe faia lea vaega o le tatalo. Na ou toe faalogoina ma lagona ua goto ifo i lo’u loto, ma na ou iloa ai ua faailoa mai e le Agaga Paia ia te au le mea moni. Na ou iloa le mea moni o Iesu o le Keriso. Na ou lagona i lo’u loto ma lo’u mafaufau na ou manao ou te papatiso, ma lo’u talitonuga e mafai ona faamamaina a’u e ala i le Togiola a Iesu Keriso.

Na totogi e Iesu Keriso a tatou agasala, ma o le mafuaaga tonu lena o lo’u liua. Na ou iloa na o Ia lava o loo i ai le mana ma le pule e toe fausia ai Lana Ekalesia i lo tatou tisipenisione. O lo’u i ai la i le taimi nei o se faifeautalai i le Misiona a Cagayan de Oro i Filipaina, o loo ou taumafai i le mea sili ou te mafaia e fesoasoani ai i tagata ia lagona le fiafiaga maoae o i ai nei ia te a’u.