2010
O Le Atua o lo Tatou Tama Moni Lava
Ianuari 2010

O Mea Tatou te Talitonu Ai

O Le Atua o lo Tatou Tama Moni Lava

O Le Atua o lo tatou Tama o i le Lagi, o le Tama o o tatou agaga. I le Aigaatua faatasi ma Ia, o loo i ai Iesu Keriso ma le Agaga Paia. O i latou o ni tagata mavaevae ma e i a ni matafaioi mavaevae peitai e tasi lo latou faamoemoe. O lenei upumoni, faatasi ai ma le tele o isi, na leiloloa ina ua mavae le maliu o Iesu Keriso ma Ana Aposetolo i le vaitaimi ua ta’ua o le Liliuese.

Na amata ona toefuatai e le Alii na upumoni na leiloloa i le tautotogo o le 1820, ina ua tatalo Iosefa Samita e 14 tausaga le matua i le vao e lata ane i lona fale i Manchester Township, Niu Ioka, e fia iloa po o fea o ekalesia e tatau ona auai. I le tali mai o ana tatalo, na ia vaai ai i le Atua le Tama ma Iesu Keriso. Na tusia mulimuli ane e le Perofeta o Iosefa Samita e uiga i lenei faaaliga: “Sa fetalai mai se tasi o i laua ia te au, ma valaau mai ia te au i lou igoa ma faapea mai, ao tusi atu i le isi—O Lo’u Atalii Pele lenei. Faalogo ia te Ia!” (Iosefa Samita—Talafaasolopito 2:17).

I le aso 16 o Fepuari 1832, na maua ai e le Perofeta ma Sini Rikitone se faaaliga. Ina ia folasia atu le faaaliga, sa la molimau atu ia Iesu Keriso ma le Atua le Tama: “O lenei, ina ua uma ona faia molimau e tele e uiga ia te ia [Iesu Keriso], o le molimau tupito mulimuli lenei i mau uma lava, ma te faia ia te ia: O loo soifua o ia! Aua na ma vaaia o ia, i le itu taumatau lava o le Atua; na ma faalogoina foi le siufofoga o molimau mai o ia lava lea o le Toatasi na Fanaua e le Tama” (MFF 76:22–23).

O aoaoga faavae o loo molimau mai i le Atua le Tama:

  1. Ua foafoaina i tatou i le faatusa o le Atua (tagai Mose 2:26).

  2. O Le Atua o Le Silisiliese na faia mea uma, ma “ua faailoaina mai i mea uma, e i ai le Atua” (Alema 30:44).

  3. O le Atua o lo tatou Tama Faalelagi, o se matua moni lava faaleagaga (tagai Eperu 12:9).1

  4. E i ai i le Atua le Tama le tino o aao ma ivi (tagai MFF 130:22).

  5. Na tuuina mai ia i tatou e lo tatou Tama Faalelagi le ata o le faaolataga (tagai Alema 34:9).

O auala e mafai ona tatou iloa ai lo tatou Tama Faalelagi:

  1. Ia fiafia i tusitusiga paia (tagai 2 Nifae 32:3).

  2. Ia iloa Iesu Keriso (tagai Ioane 14:9).

  3. Usiusitai i poloaiga a le Atua ma mulimuli i perofeta (tagai Ioane 14:21; MFF 1:38).

  4. Ma le faatuatua, tatalo i le Atua i le suafa o Iesu Keriso (tagai Iakopo 1:5; 3 Nifae 18:20).

Faamatalaga

  1. Tagai i le Aoaoga a Peresitene o le Ekalesia: Iosefa Samita [2007], 42.)

Ia faaavanoa se taimi e mata’i ai le lagi, lea e i ai taamilosaga a fetu ma paneta o ni faamaoniga ia “o le Atua o loo galue i lona mamalu sili ma le mana” (tagai MFF 88:41–47).

Tauagavale: ata o le paneta mai le faaaloaloga a le NASA/JPL; ata o fetu © NASA ma STScI; ata na tusia e Robert T. Barrett; ata na saunia e Wei-Hsiang Wang; taumatau: atavali o manu na saunia e Stanley Galli; ata o le Tama Faalelagi ma tamaiti na saunia e Paul Mann; faamatalaga mai le O Le Uluai Faaaliga, saunia e Del Parson; ata o le aiga na saunia e Welden C. Andersen; ata o se tamaloa na saunia e Welden C. Andersen; ata o Peresitene Monson pueina e Craig Dimond; ata o se fafine na saunia e Ruth Sipus