“E Maua Lava Au e Outou”

I le faaiuga o la matou lesona o le Aoga Sa, sa faatonu matou e Tuafafine Hart e sue le Ieremia 29. Sa ia fai mai o le a ia faitauina leotele fuaiupu 12–14, ma sa ia faimai ia matou manatunatu loloto i le uiga o upu.

“Ona outou valaau ai lea ia te au,” na ia faitau mai, “e o foi outou ma tatalo ia te au, ou te faalogo foi ia te outou.

“E saili mai outou ia te au, tou te maua foi, pe a outou saili mai ia te au ma o outou loto atoa.

“E maua lava au e outou, o loo fetalai mai ai Ieova …”

Sa faaauau pea Tuafafine Hart, ma faauma le fuaiupu e 14, ae sa tumau pea ma le fiafia ou mafaufauga i tua, ma olioli i le folafolaga “E maua lava au e outou.” Sa faamanatu mai ai ia te au taimi a o matou taaalo i-ve’a ma lou toalua, o Ema, ma le ma fanau laiti. Pe a oo i le taimi mo i maua e lalafi ai ao lo latou taimi e saili ai, sa masani lava ona ma faia ia maua gofie i maua. O nisi taimi ma te pao ai po o le faalala i fafo o se vae ina ia iloa mai ma ia vave ona mauaina i maua. O nisi taimi ma te lalafi pea lava i le nofoaga e tasi. Sa ma mananao i tamaiti e saili mo i maua, ae na ma mananao foi ia latou mauaina i maua. Ma te fiafia lava e faatalitali atu mo lo latou fusi mai ma a latou taliega fiafia o le manumalo, e le mafai ona taofiofia.

O lenei manatua na loloto ai lou malamalamaaga i le alofa o lo tatou Tama Faalelagi mo i tatou. E finagalo o Ia ia tatou saili mo Ia, ae finagalo foi o Ia ia tatou mauaina o Ia—Ua Ia silafia lo tatou fiafia pe a tatou mauaina o Ia. E le taumafai o Ia e faasee i tatou. Nai lo o lena, e faia e Ia mea uma lava na te mafaia e fesoasoani ai ia tatou iloaina po o fea ma pe faapefea ona saili: ua Ia tuuina mai ia i tatou tusitusiga paia, valaauina perofeta, faafofoga ia tatou tatalo, taitaiina i tatou e le mana o le Agaga Paia, faamanuiaina i tatou i malumalu ma sauniga o le perisitua ma aiga ma uo. Ma afai na tatou mauaina o Ia i se mea muamua, e mautinoa lava tatou te toe mauaina o Ia iina pe a fai ua tatou naunau e faafou la tatou sailiga.

“E maua lava au e outou, o loo fetalai mai ai le Alii.” O se folafolaga faamafanafana! I se lalolagi e foliga mai e matua maua gofie ai i tatou i faigata ma faaosoosoga, e ese le toafilemu o le iloa o lo tatou faapogai maoae o le malosi e matua faigofie lava ona maua.