Sa auai atu tagata o le Ekalesia i le silia ma le 30 o atunuu i Aferika ma suō ma uilipaelo ma foliga ataata ma taoofu samasama, i le Galuega Faatino lona tolu o Auaunaga a Aferika-Atoa i le aso 22 o Aokuso, 2009.

Sa latou faaleleia auala, i se tasi aai o Ivory Coast. Sa latou faaleleia fale tuai o aiga, i se taulaga i Liberia. Sa latou faamamaina alavai, i Sierra Leone. I Nigeria, sa latou veleina le vao tele sa ola i se fale o le malo. I Kana, sa latou saluina atoa se maketi ma aveese uma uta o lapisi. I Kenya, i Aferika i Saute, Cameroon, ma tala atu, sa olo faamama ai e le aupaia potu o falepuipui ma falelēta’ua, toto laau, faaleleia auala, ma galulue i nofoaga mo tamaiti ua matuaoti. Sa latou faamamaina falema’i ma fale; sa latou veleina vao ma vali ia faailoilo.

Na saunoa Elder Eric Jackson, le faatonu mo mataupu tau i le va i fafo mo le Eria o Aferika i Saute, e faapea, “O le mea na faamaonia e le au paia ia i latou lava e faapea, a na lava tagata e o mai, e le faapea se telē o se galuega faatino mo i matou.”

O le mea lava sa galulue ai le au paia, sa faapotopoto foi i ai le au tusitala e matau ma tusi faamatalaga.

E toatele isi tagata e ese mai le Ekalesia na auai i le galuega faatino. Na faipaaga le Ekalesia ma vaega tautua i le lotoifale, o aulotu a isi ekalesia, ma faalapotopotoga a le malo ia na ofo fua atu a latou meafaigaluega ma mea uma, ma auai foi i le taumafaiga.

“O le toatele, ina ua latou faalogo ua matou faia [le auaunaga] aua na matou faataitai i galuega lelei a Keriso, na vivii ae i le Alii ma fai mai e mananao foi e fesoasoani mai,” na saunoa ai Elder Adesina Olukanni, le Fitugafulu Eria ma le faatonu o Mataupu Tau i le Va i Fafo i Aferika i Sisifo.

I le masina o Iulai 2009 e sili atu ma le 160 autalavou ma talavou matutua na faapotopoto mo se aso o faauooga, mafutaga faaleaoaoga, siva, ma molimau i le konafesi muamua a autalavou na faia i Itiopia.

Talu ai e lei faatulagaina paranesi e fa i se itu, e toatele le au paia latou te lei iloa o i ai isi paranesi ma tagata o le Ekalesia i Itiopia. O se vaega o le faamoemoega o le konafesi o le faatagaina lea o i latou e galulue faatasi ma a latou paaga ao siitia ai faaleagaga.

O Wondwossen Amanuel, e 23 tausaga, o lē na tuuina atu ona pepa mo le misiona ina ia avea ma faifeautalai muamua mai le Paranesi a Awasa, na fai mai, “E te maua ai le faamalosiauga pe a o mai faatasi e faia gaoioiga faapea. E laitiiti la matou paranesi, ao iina na matou lagona ai o loo matou i ai i le lafu—ma e pei lava o se aiga.”

Na faaaoga ma le fiafia e e na auai ia mama FMT ma mitiafu o loo teuteuina i upu “Tumau ma Mautinoa,” o le autu o le konafesi.

O le lua o masina o taumafaiga malosi a faifeautalai, peresitene o paranesi, ma le faalapotopotoga alofa o le Faamoemoe Siitia, na aumaia faatasi ai Au Paia paionia mai paranesi tetele e fa i le falelotu i Addis Ababa, i Itiopia.

Na malaga mai sui auai i le pasi e oo atu i le lima itula e auai i le konafesi, ma e sili atu ma le afa o i latou o tagata lē lolotu ma tagata sailiili [i le ekalesia]. E toalua na papatisoina i vaiaso na sosoo ai.

“Ina ua iloa e [le autalavou] o loo i ai isi talavou o loo i ai o latou faamoemoega, o miti, o faafitauli, ma popolega, sa faateleina o lo latou lagona mautinoa. Na latou iloa ua le tuua na o i latou, ma na faamalosia ai lava i latou,” na saunoa ai Elder Brad Wilkes, o se faifeautalai o lē, faatasi ma lona faletua, o Sister Karen Wilkes, na fesoasoani i le faatulagaina o le konafesi.

E toalima ni tamaitai talavou ma o latou taitai mai le Itu o Bucharest Romania, faatasi ma se uo lē lotu, na auai i le tolauapiga muamua a Tamaitai Talavou o le Ekalesia i Romania mai le aso 24 i le 26 o Aokuso, 2009. O Dina Cojocaru le peresitene o Tamaitai Talavou o le Itu na taitaia le tolauapiga faatasi ai ma le fesoasoani a faifeautalai sinia o Elder Don ma Tuafafine Edie Van Noy.

Sa faia e teine ma taitai ia faigalotu i taeao ma afiafi, ma suesue faatasi i tusitusiga paia i aso uma. Sa faia e Elder ma Tuafafine Van Noy ni aoaoga i autu e pei o le mama ma le auala e tuuina atu ai tautalaga anoa i le lotu. I se tasi o aoaoga, sa aoaoina ai teine i laei talafeagai ma le mananaia o le faiga o o latou ofu a o tumau pea i le amiosa’o.

O Alina Mateescu, o se tasi o tamaitai talavou, na fai mai na ia mafaufau pe faapefea ona avea ma se tamaitai talavou amio mama, ae i le mafutaga faaleaoaoga e uiga i le mama, na ia mautinoa ai e mafai ona ia avea ma faataitaiga o le tamaitai amiosa’o o loo finagalo ai le Atua mo ia.

O Romania, o se atunuu i sautesasa’e o Europa, pe tusa ma le 2,736 le au paia i paranesi e 17.