Autalavou e Faamanatu Se Tausaga Fou A’ia’i

Ua mauaina e iunite uma o le Ekalesia i le lalolagi atoa se DVD ua faaigoaina O Se Tausaga Fou A’ia’i: Faafiafiaga a Autalavou 2010. Ua faailoa mai i le DVD le autu o le Mutuale 2010 ma e mafai ona faaaogaina e faaopoopo atu i vasega a le autalavou, fonotaga a korama, Mutuale, talanoaga a le epikopo ma le autalavou, ma isi gaoioiga o le tausaga.

O le autu o le Mutuale mo le 2010 o le “Ia e faamalosi ma loto tele; aua e te fefe, aua e te mata’u: aua o Ieova lou Atua o loo ia te oe i mea uma e te alu i ai” (Iosua 1:9; ua faaopoopo le faamamafa). O le vaega muamua o le O Se Tausaga Fou A’ia’i: Faafiafiaga a Autalavou 2010 ua faaalia ai se savali faapitoa mai ia Elder M. Russell Ballard, o se sui o le Korama a Aposetolo e Toasefululua, ma se tuufaatasiga faamusika a autalavou i le lalolagi atoa.

O loo i ai foi i le DVD ni vaega faaopoopo se iva, e aofia ai savali musuia o loo aumaia i tala, molimau, musika, ma savali faapitoa mai au peresitene aoao o Alii Talavou ma Tamaitai Talavou. O nei vaega e faamamafa lava i tulaga faatonuina o le talalelei mai le Mo Le Malosi o le Autalavou, e aofia ai a’oga, aiga ma uo, musika ma siva, tafaoga faamasani ma le mama, soifua maloloina, auaunaga, ma le salamo.

O tagata talavou uma mai le lalolagi atoa o loo faasoa mai o latou manatu ma molimau i lenei DVD.

“Matou te maofa lava mo le autalavou a le Ekalesia i le mafai ona latou fevaaia’i i lenei DVD ma faamalolosia ai i molimau a isi,” na saunoa ai Elaine S. Dalton, le peresitene aoao o Tamaitai Talavou. “O i latou o e matamata ai o le a latou vaaia autalavou totoa i soo se mea, ua filifili e ola i tulaga faatonuina [o le Ekalesia] ma faia ai se eseesega i le lalolagi. Matou te faamoemoe o le a faaaoga e perisitua ma taitai o ausilali ma faiaoga le DVD ia latou vasega e aoao ai tulaga faatonuina ma gaoioiga e fesoasoani ai i autalavou e tautino le ola ai ma faaaoga nei tulaga faatonuina i o latou olaga.”

Ua fautuaina e taitai o le Ekalesia taitai perisitua faalotoifale ma ausilali e toe iloilo le DVD ma faaaoga ia latou fonotaga ma gaoioiga. E mafai ona faaaoga le vaega muamua o le DVD i gaoioiga o le Po o le Vaeluaga o le Tausaga Fou po o isi mea faapitoa lea e tuuina atu ai le autu. O isi vaega o totoe ua mamanuina e faaaoga i le tausaga atoa e faalautele atu ai le autu.

Ua lomiaina vaega faatasi ma faamatalaga tusia i le faa-Kenitonisia, Igilisi, Farani, Siamani, Italia, Iapani, Korea, Meniterini, Potukale, Rusia, ma le Sipaniolo. O mea uma mai le DVD ua mafai foi ona maua i le Initoneti.