Faamaloloina Mai le Misia o Lou Aiga

Na ou amata i le kolisi i le 18 o ou tausaga. Peitai, ina ua mavae sina taimi puupuu, sa siitia atu au i se isi iunivesite ma suia ai la’u matata. O lo’u iunivesite fou sa na o ni nai itula e mamao ese ai mai lo’u fale, ae sa ou matua misia lava lo’u aiga ma sa ou lotovaivai, ma manao e tuua [le aoga] ae toe foi i lo’u aiga. Ae sa ou iloaina pe afai ou te faia lena, o le a ou lafoa’ia lo’u avanoa e maua ai so’u faailoga.

I le faaiuga o se tasi o vaiaso e lei mamao atu talu ona amataina le tausaga aoga, na o uma ai lava au uo e asiasi i o latou aiga. Na ou iloaina pe afai ou te alu foi i le fale, o le a ou le toe foi mai. Sa oo lava i le vili ma talanoa atu i lo’u aiga sa le mafai ona fai ona o lo’u fefe nei tei ua ou tagi lotulotu ma lē mafai ai ona ou mafaufau i au meaaoga. Sa masani lava ona ou tatalo mo le malosi e foia ai lou misia o lou aiga, ae o lenei ua ou tatalo ou te fia iloa pe tatau ona ou nofo ai pea i le aoga ma faamaea lo’u faailoga.

I le taeao po lava o lena Aso Sa ao ou savalivali lemu atu i le lotoa filemu ou te alu atu ai i le lotu, sa ou tomanatu pe faapefea ona ou nofo ai pea i le aoga ae o loo ou matuai misia lava lou aiga ma le auaiga ma ua le mafai ona foia lou lagona nofotoatasi. Peitai o le a se mea o le a ou faia pe afai ou te aluese mai le aoga?

Ina ua ou taunuu atu i le lotu, e lei leva ona tuua le falesa e le uarota na muamua. Sa ou ulufale atu, ma le faamoemoe mo se taimi e tatalo ai mo se taiala. Ina ua ou maua se nofoaga e nofo ai ma faifai malie atu ai i se nofoa laupapa, sa ou iloa atu se polokalama lolomi mai le sauniga faamanatuga lea na mavae atu. Na i ai iina i luma o le pepa na gaugau ia upu nei: Atonu o se taunuuga sili ona taua o aoaoga uma o le tomai lea e te faatonuina ai oe lava e fai le mea e tatau ona e faia, pe a tatau ona fai, e tusa lava pe e te fiafia ai pe leai.”¹

I lena lava taimi sa ou iloaina le mea e manaomia ona ou faia. Sa taliina mai e le Alii au tatalo i se auala faigofie lava, ae na le mafai lava ona ou teena aua o le tali lava lena mea.

E lei leva atu lena Aso Sa ae mou ese atu loa lou lagona tuulafoaiina ma le faanoanoa. O se taunuuga, sa ou fiafia lava i ou tausaga ia na totoe i le aoga. Sa ou mauaina se faailoga, ni uo mo le olaga atoa, ma se molimau mausali e ala i le mulimuli i uunaiga a le Agaga.

I le taimi nei, e silia ma le 25 tausaga mulimuli ane, ou te tomanatu pea i lena tali o lau tatalo, ma ou te faaaogaina na upu lava e tasi mai lena polokalama o le sauniga faamanatuga e tautino atu ai lava au ia i ni galuega faigata. Sa ou faasoaina atu lenei aafiaga mo nisi o au uo pele ma aiga ma le faamoemoe o le a latou mauaina ai foi le malosi i ni taimi o faigata.

Ou te iloa e amanaia e le Alii o tatou lagona ma filifiliga o loo faia pea i aso taitasi, ma ou te iloa Na te tali mai i a tatou tatalo faamaoni.