Auala Na Matou Iloa ai le Fiafia

Sa ou manatu lava e le aunoa e malosi lo matou aiga. O le ma fanau tama e toatolu ma teine e toalua e leai se faaletonu, ma o faafitauli lava e masani ai sa matou feagai. O nisi o taimi pe a latou le usiusitai, ona ou ita lea. Mulimuli ane ona ou toe mafaufau lea ia te au lava, “Aisea na e matuai ita ai ia i latou?”

Ou te lei iloa i lena taimi o le perestroika—o se vaitaimi o fesuiaiga faaupufai ma le tamaoaiga—lea ua amata i Rusia. Sa ou lei iloaina o le a le toe i ai ni oloa i luga o fata o faleoloa, ma mo masina ma mulimuli ane mo tausaga, o le a le toe mauaina ni totogi. Sa matuai faigata lava le olaga. Sa i ai o ma’ua tauiviga, ma sa toeitiiti lava ma tete’a ma lo’u toalua. Sa oo mai se faamai o le faaaogaina o fualaau faasaina, ma sa aafia ai se tasi o le ma fanau tama. Sa foliga mai sa le toe susulu mai le la i totonu o a matou faamalama. Sa ou le iloa po o ai ou te tatalo atu i ai, peitai sa ou aioi atu pea i le Atua mo se fesoasoani. Sa ma tauivi ma lo ma malosi atoa, ma mai lea taimi i lea taimi na mafai ona ma o ese mai lenei tauiviga.

I le taumafanafana o le 1998, na maua ai i matou e faifeautalai. Na suia o matou olaga i le 180 tikeri a o matou agai atu i se auala fou. I totonu o le lima tausaga [talu ona matou liliu mai] na matou auai atu i le malumalu ma ua faamauina o se aiga mo le faavavau.

Ina ua auauna atu faafaifeautalai le ma tama tama ogatotonu i le misiona o Sieki Ripapelika, sa ia tusi mai ia i matou i ana tusi uma, “Ia tumau ma faatuatua. O le tauaofaiga, o i matou o se aiga pito sili ona fiafia.” E oo lava i au uo latou te tau mai ia te au e foliga mai o au o le fafine pito i fiafia i le lalolagi i le i ai lea o le tele o le fanau ma fanau o le ma fanau ma le iloaina o le a le oo mai lava ia te au se mala o le faaesea.

I le toe vaai atu i tua, ua ou iloa ai e pei o tagata na faalogo i le Tupu o Peniamina, na oo i lo matou aiga se suiga tele o o matou loto, ma avea ai ma fanau a Keriso (tagai Mosaea 5:7). O se suiga tele lava mo au. Ae ou te lei avea ma se tasi o le Au Paia o Aso e Gata Ai, pe a ou manatu e uiga i le oti, o se faanoanoaga sili e le mafai ona gafatia na mau i lo’u loto ma lo’u agaga. Na faaaogaina lo’u malosi atoa e tafiesea ai na manatu mai ia te au. O lenei ua ou mauaina le filemu i lou agaga.

Ua ou iloa nei o le fiafia e oo mai i soo se tulaga. E mafai ona mauaina i ao pogisa ma pouliuli o faititili pe mamae foi le lalolagi mai le aasa. E i ai foi i ave mafanafana o le la i le lotolotoi o timuga. E i ai i se uluai laulaau lanumeamata o le tautotogo o loo ua amata ona totogo mai. E i ai i se vaega o le fugalaau paepae o loo tau amata ona totogo mai i se lala o le apu. O loo i ai i le pouliuli o le itulagi i le po ma le afe ma afe o fetu feilafi. O loo i ai i le pupula faanaunau a se tasi e pele. E pupula mai e ala mai mata susulu i atapue o aiga.

O le fiafia e oo mai foi ia te au pe a ou faia se mea lelei mo se isi. E faamafanafanaina lou agaga i se afi filemu pe a ou tatalo i lo tatou Tama Faalelagi. O nisi o taimi, pe a ou mafaufau ou te manao i nisi mea e sili atu, ou te manatua e manaomia ona ou aoao e faataua mea ua ou mauaina—na tuuina mai uma e le Alii Lava Ia ia te au.